សាខាកាកបាទក្រហមកម្ពុជា ខេត្តព្រះវិហារ ប្រារព្ធពិធីអបអរសាទរខួបលើកទី៦៥ ថ្ងៃកំណើតកាកបាទក្រហម និងបំពាក់កន្សែងជូនយុវជនកាកបាទក្រហមកម្ពុជា
ខេត្តព្រះវិហារ៖ឯកឧត្តម ប្រាក់ សុវណ្ណ ប្រធានគណៈកម្មាធិការសាខាកាកបាទ ក្រហមកម្ពុជា ខេត្តព្រះវិហារ និងជាអភិបាលខេត្តព្រះវិហារ បានរំលឹកពីប្រវត្តិរបស់កាកបាទក្រហមកម្ពុជា ជូនសមាជិក សមាជិកា និងប្អូនៗយុវជនកាកបាទក្រហមកម្ពុជា ដែលក្រោមការដឹកនាំប្រកប ដោយគតិបណ្ឌិតរបស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន។
ក្នុងនោះដែរឯកឧត្តមក៏បានផ្តាំផ្ញើដល់យុវជនអោយខិតខំរៀនសូត្រ ត្រូវធ្វើជាកូនល្អ សិស្សល្អ មិត្តល្អ ជៀសអោយឆ្ងាយពីគ្រឿងញៀន ត្រូវចូលរួមគោរពច្បាប់ចរាចរណ៍ និងត្រូវខិតខំធ្វើយ៉ាងណាអោយក្លាយខ្លួនជាទំពាំងស្នងឬស្សី និងជាធនធានមនុស្សក្នុងការចូលរួមជួយអភិវឌ្ឍន៍សង្គមជាតិ។
ឯកឧត្តមប្រធានគណៈកម្មាធិការសាខាកាកបាទ ក្រហមកម្ពុជា ខេត្តព្រះវិហារ និងជាអភិបាលខេត្តព្រះវិហារ បានមានប្រសាសន៍បែបនេះក្នុងឱកាសដែលឯកឧត្តម អញ្ជើញអធិបតីក្នុងពិធីអបអរសាទរខួបលើកទី៦៥ ( ១៨ កុម្ភៈ ១៩៥៥ -១៨ កុម្ភៈ ២០២០) ថ្ងៃកំណើតកាកបាទក្រហមកម្ពុជា និងពិធីបំពាក់កន្សែងជូនយុវជនកាកបាទក្រហមកម្ពុជា វិទ្យាល័យចំណេះទូទៅ និងបច្ចេកទេស ជា ស៊ីម ត្បែងមានជ័យ វិទ្យាល័យសម្តេចតេជោ ហ៊ុន សែន ហ្មសែត និងវិទ្យាល័យ ហ៊ុន សែន ត្បែងមានជ័យសរុបចំនួន១៥០នាក់នៅព្រឹកថ្ងៃទី១៨ ខែកុម្ភៈ ឆ្នាំ២០២០។
សូមបញ្ជាក់ផងដែរថា៖ពិធីនេះដែរក៏បានផ្តល់ជូនយុវជនកាកបាទក្រហមកម្ពុជាចំនួន១៥០នាក់ ក្នុងម្នាក់ៗសៀវភៅ២ក្បាល ប៊ិច១ដើម អាវ៥ និងថវិកាមួយចំនួន។
ប្រធានកិត្តិយសក្លឹប លោកគ្រូ អ្នកគ្រូ ទីប្រឹក្សាយុវជនចំនួន៨នាក់ ក្នុងម្នាក់ៗសៀវភៅ៥ក្បាល ប៊ិច ២ដើម អាវ៥ និងថវិកាមួយចំនួន ព្រមទាំងបានផ្តល់ប័ណ្ណសសើរជូនលោក ពៅ លីហៀង ប្រធានកិត្តិយសក្លឹបផងដែរ៕
