យុវជន៣នាក់បានស្លាប់ភ្លាមៗ ដោយសារតៃកុងរថយន្តដឹកត្រី របស់ក្រុមហ៊ុនដឹកជញ្ជូនK ២០២០ បើកបរងោក បណ្តាលឱ្យបុកពេញម៉ូតូទំហឹង
ខេត្តបន្ទាយមានជ័យ៖យ៉ាងហោចណាស់មានមនុស្សចំនួន៣នាក់បានស្លាប់ភ្លាមៗនៅនឹងកន្លែងកើតហេតុ ដោយសារតែតៃកុងរថយន្តដឹកត្រីរបស់ក្រុមហ៊ុនដឹកជញ្ជូនK ២០២០ បើកបរក្នុងស្ថានភាពងោក បណ្តាលឱ្យបុកម៉ូតូជនរងគ្រោះពេញទំហឹងលាន់ដូចរន្ទះ កាលពីវេលាម៉ោង២យប់ នៅថ្ងៃទី១៤ ខែកុម្ភះ ឆ្នាំ២០២០ នៅលើផ្លូវជាតិលេខ៥ ត្រង់ចំណុចមុខស្នងការដ្ឋាននគរបាលខេត្ត ស្ថិតនៅក្នុងភូមិក្បាលស្ពាន សង្កាត់ព្រះពន្លា ក្រុងសិរីសោភ័ណ ខេខេត្តន្ទាយមានជ័យ។
បើតាមលោកវរសេនីយ៍ឯក សន គឹមគឹមសួគ៍ នាយការិយាល័យនគរបាលចរាចរណ៍ នៃស្នងការដ្ឋាននគរបាលខេត្តបន្ទាយមានជ័យបានប្រាប់អ្នកយកព័ត៌មានឲ្យដឹងថា ជនរងគ្រោះទាំង៣នាក់ដែលបានស្លាប់មានឈ្មោះ សុភី ,ឈ្មោះ វិន ថាដា ,ឈ្មោះ នុន រស់នៅក្នុងភូមិព្រៃទទឹង ឃុំភ្នំតូច ស្រុក មង្គលបូរី ខេត្តបន្ទាយមានជ័យ។
លោកវរសេនីយ៍ឯក សន គឹមគឹមសួគ៍ បញ្ជាក់ថា នៅមុនពេលកើតហេតុមានម៉ូតូម៉ាកហុងដាទ្រីម ពណ័ ខ្មៅពាក់ស្លាកលេខ បន្ទាយមានជ័យ ១T ៧៤១៤ មានអ្នកជិះចំនួន៣នាក់ ចេញពីផ្សារហ៊ុយឡេងសំដៅទៅផ្ទះ នៅព្រៃទទឹង ក្នុងទិសខាងជើង ទៅត្បូង លុះជិះមកដល់ចំណុចកើតហេតុ ស្រាប់តែមានរថយន្ត ព័ណ ស របស់ក្រុមហ៊ុនដឹកជញ្ជូនK ២០២០ ពាក់ស្លាលេខបន្ទាយមានជ័យ៣A ១៥៤២ ដឹកត្រីពីភ្នំពេញយកមកលក់នៅផ្សារចិនខ្មៅ បើកពីត្បូងមកជើង ច្រាសទិស និងម៉ូតូ លុះ បើកមកដល់ចំណុចកើតហេតុ អ្នកបើករថយន្តដឹកត្រីប្រហែលបើកយប់ពេកអត់ងងុយងោក១ភាំង បណ្តាលឲ្យរថយន្តបើករេចូលគន្លងផ្លូវគេបណ្តាលឲ្យបើក ទៅបុកម៉ូតូពេញទំហឹង ធ្វើឲ្យអ្នកបើក និងអ្នកជិះពី២នាក់ក្រោយ ចូលក្រោមរថយន្តស្លាប់ពេញថ្នល់ជាតិ។
ចំណែកអ្នកបើករថយន្តត្រូវសមត្ថកិច្ចឃាត់ខ្លួនកសាងសំនុំរឿងទៅតុលាការ រីឯសពយុវជនទាំង៣នាក់ ត្រូវក្រុមគ្រួសារដឹកយកទៅធ្វើបុណ្យនៅផ្ទះរៀងខ្លួន។ដោយឡែករថយន្តបង្ក និងម៉ូតូសមត្ថកិច្ចយកទៅរក្សាទុកនៅស្នងការ ដើម្បីដោះស្រាយទៅតាមផ្លូវច្បាប់៕
