នគរបាលណា ប្រឡងជាប់ក្របខ័ណ្ឌនគរបាលជាតិហើយ ត្រូវដាក់ខ្លួនបន្ទន់កាយបំរើប្រជាពលរដ្ឋដោយឥតគឹតថ្លៃ
ខេត្តបន្ទាយមានជ័យ៖នគរបាលដែលប្រឡងជាប់ ក្របខ័ណ្ឌនគរបាលជាតិហើយនោះ មិនត្រូវយកតួនាទី ភារកិច្ច របស់ខ្លួន ទៅធ្វើអ្វីដែលខុសផ្ទុយពីកាតព្វកិច្ចរបស់ខ្លួន ពីច្បាប់និងពីវិន័យ សេចក្តីថ្លៃថ្នូររបស់កងកម្លាំងនគរបាលជាតិនោះឡើយ ត្រូវដាក់ខ្លួនបន្ទន់កាយបំរើប្រជាពលរដ្ឋដោយឥតគឹតថ្លៃ។
លោកឧត្តមសេនីយ៍ទោ អាត់ ខែម ស្នងការដ្ឋាននគរបាលខេត្តបន្ទាយមានជ័យមានប្រសាសន៍បែបនេះនៅព្រឹក ថ្ងៃទី១៤ ខែកុម្ភះ ឆ្នាំ២០២០ នៅសាលប្រជុំស្នងការនគរបាលខេត្តដោយមាន ការចូលរួម កងកម្លាំងនគរបាលជាតិ នៃស្នងការដ្ឋាននគរបាលខេត្តបន្ទាយមានជ័យ។
លោកឧត្តមសេនីយ៍ទោបញ្ជាក់ថា ក្រោយពីនគរបាលទាំងនេះ បានបញ្ចប់វគ្គសិក្សា និងមានឈ្មោះក្នុងក្របខ័ណ្ឌជាកងកម្លាំងនគរបាលជាតិ ចំនួន៣ជំនាន់វគ្គ គឺជំនាន់វគ្គឆ្នាំ២០១៧ ឆ្នាំ២០១៨ និងឆ្នាំ២០១៩ សរុបចំនួនជាង២៥០នាក់ មកពីតាមបណ្តាការិយាល័យជំនាញ អធិការដ្ឋាននគរបាលគ្រប់ស្រុក ក្រុង និងវរសេនាតូចនគរបាលការពារព្រំដែនគោកទាំង៤។
ជាងនេះទៅទៀតលោកឧត្តមសេនីយ៍ទោកូសបញ្ជាក់ដែរថា ប្អូនៗ ក្មួយៗ គឺជាទំពាំងស្នងប្ញស្សី ក្នុងជួរកងកម្លាំងនគរបាលជាតិ នៃស្នងការនគរបាលខេត្តបន្ទាយមានជ័យ ដូច្នេះប្អូនត្រូវតែយកចិត្តទុកដាក់ក្នុងការបំរើប្រជាជន ការពារបូរណភាពទឹកដី ការពារសន្តិសុខ សណ្តាប់ធ្នាប់ជូនប្រជាពលរដ្ឋនៅក្នុងមូលដ្ឋាន។
លោកបានបញ្ជាក់ឲ្យដឹងទៀតថា ធ្វើជានគរបាលហើយកុំបំរើឲ្យគ្រួសានិយម បក្សពួកនិយមត្រូវបំពេញតួនាទីតាមវិជ្ជាជីវៈរបស់ខ្លួន ដើម្បីបំរើជាតិនិងប្រជាពលរដ្ឋ បំរើផលប្រយោជន៍រួម ផលប្រយោជន៍ជាតិនិងប្រជាពលរដ្ឋ។លោកស្នងការបានផ្តាំផ្ញើដល់ប្អូនៗទាំងអស់ ត្រូវខិតខំសិក្សារៀនសូត្រ ស្វែងយល់ពីច្បាប់និងជំនាញផ្សេងៗ ដើម្បីជាគ្រឹៈ ក្នុងការអនុវត្តន៍ការងារស្នូលរបស់ខ្លួនឲ្យទទួលបានជោគជ័យ ពិសេសគឺត្រូវគោរពនូវវិន័យរបស់កងកម្លាំងនគរបាលជាតិ មានក្រមសីលធម៌ វិជ្ជាជីវៈនិងសេចក្តីថ្លៃថ្នូរ ជាកងកម្លាំងនគរបាលជាតិ បំរើប្រជាពលរដ្ឋ និងប្រជាទេសជាតិ គោរនូវរាល់បទបញ្ជារបស់ថ្នាក់ដឹកនាំអង្គភាព ដែលបានប្រគល់ជូននិងរាយការណ៍មកវិញនូវកិច្ចការទាំងឡាយណាដែលអនុវត្តបានជូនថ្នាក់លើវិញនេះគឺជាក្រិត្យការងាររបស់កងកម្លាំងប្រដាប់អាវុធ។
មិនត្រូវនៅពីក្រោយខ្នងជនល្មើស និងប្រើប្រាស់គ្រឿងញៀនជាដាច់ខាត ដែលនាំឲ្យខូចអនាគត់និងសេចក្តីថ្ងៃថ្នូររបស់ខ្លួនក៏ដូចជាកងកម្លាំងនគរបាលជាតិ។ត្រូវត្រៀមខ្លួនជានិច្ច ដើម្បីជួយប្រជាពលរដ្ឋ ដែលរងគ្រោះដោយប្រការផ្សេងៗផងដែរ៕
