ឆ្លងចរន្តអគ្គីសនី ឆេះផ្ទះប្រជាពលរដ្ឋ១ខ្នង អស់ទាំងស្រុង នៅខណ្ឌឫស្សីកែវ
រាជធានីភ្នំពេញ៖ផ្ទះប្រជាពលរដ្ឋ០១ខ្នង ត្រូវអគ្គីសនីឆាបឆេះអស់ទាំងស្រុង កាលពីវេលាម៉ោង០១ និង៥០នាទីរំលងអាធ្រាតុ ឈានចូលថ្ងៃទី១៥ ខែកុម្ភៈ ឆ្នាំ២០២០ នៅចំណុចផ្លូវលំ ក្រុមទី៤ ភូមិសាមគ្គី សង្កាត់ឫស្សីកែវ ខណ្ឌឫស្សីកែវ រាជធានីភ្នំពេញ ដោយសាឆ្លងចរន្តអគ្គីសនី។
បើតាមប្រភពព័ត៌មានបានឱ្យដឹងថា ម្ចាស់ផ្ទះដែលរងការឆាបឆេះអស់ទាំងស្រុងមានឈ្មោះហាក់ គឹមនី ភេទស្រី អាយុ៦៦ឆ្នាំ មុខរបរនៅផ្ទះ មានទីលំនៅផ្ទះលេខ៥៣ច ផ្លូវលំ ក្រុមទី៤ ភូមិសាមគ្គី សង្កាត់ឫស្សីកែវ ខណ្ឌឫស្សីកែវ រាជធានីភ្នំពេញ (ក្នុងនោះមានអ្នកជួលស្នាក់នៅចំនួន០៨បន្ទប់ ស្មើនឹង០៨គ្រួសារ) និងឆេះរោលចំនួន០៥ខ្នងផងដែរ។
នៅក្នុងកិច្ចប្រតិបត្តិការនេះកម្លាំងសមត្ថកិច្ចបានចុះជួយសង្គ្រោះមនុស្សសរុបចំនួន០៥នាក់ (ក្មេង ០២នាក់១/ ឈ្មោះ សុខ ចាន់សម្បត្តិ ភេទប្រុស អាយុ០៦ឆ្នាំនិង២/ ឈ្មោះ សុខ ចាន់អារីយ៉ា ភេទស្រី អាយុ០៤ឆ្នាំ)។ដោយប្រើរបាស់រថយន្តពន្លត់អគ្គីភ័យចំនួន២០គ្រឿងរបស់ស្នងការដ្ឋាននគរបាលរាជធានីភ្នំពេញចំនួន១៨គ្រឿង,រថយន្តសាលាខណ្ឌឫស្សីកែវចំនួន០១គ្រឿង និងរថយន្តស្រាបៀរកម្ពុជាចំនួន០១គ្រឿង ទើបគ្រប់គ្រងពន្លត់ជាស្ថាពរនៅវេលាម៉ោង០២ និង៣០នាទីថ្ងៃខែឆ្នាំដដែល។
ចំពោះករណីខាងលើនេះបានខូចខាតសម្ភារៈមួយចំនួនធំ តែពុំមានប៉ះពាល់ដល់អាយុជិវិតប្រជាពលរដ្ឋឡើយ៕