ទើបចេញពីមណ្ឌលកែប្រែបាន៤ថ្ងៃ ដើររើសអេតចាយតាមចិញ្ជើមផ្លូវ ដេកដួលស្លាប់នៅលើសួនច្បារមាត់ទន្លេ សង្ស័យជម្ងឺគាំបេះដូង
រាជធានីភ្នំពេញ៖បុរសម្នាក់ ដែលគេដឹងថា ទើបតែចេញពីមណ្ឌលកែប្រែបាន៤ថ្ងៃប៉ុណ្ណោះ មកស្នាក់នៅសួនច្បារមាត់ទន្លេ ដើម្បីដើររើសអេតចាយលក់យកលុយទិញអាហារហូប បានដេកដួលស្លាប់ កាលពីវេលាម៉ោងប្រមាណជា១១ព្រឹក ថ្ងៃទី១៣ ខែកុម្ភ: ឆ្នាំ២០២០ នៅត្រង់ចំណុចសួនច្បារមាត់ទន្លេ ក្នុងសង្កាត់ផ្សារកណ្ដាលទី១ ខណ្ឌដូនពេញ រាជធានីភ្នំពេញ (ខាងជើងវត្តឧណ្ណាលោម) បង្កការភ្ញាក់ផ្អើល។
ជនរងគ្រោះមានឈ្មោះ ជ្រុយ ភេទប្រុស អាយុ៣៧ ឆ្នាំ មុខរបរ និងស្នាក់នៅមិនពិតប្រាកដ ព្រមទាំងគ្មានសាច់ញាតិទ្បើយ។
បើតាមប្រភពព័ត៌មានបញ្ជាក់ថា មុនពេលកើតហេតុវេលាម៉ោង៩ព្រឹកថ្ងៃខែកើតហេតុគេបានឃើញជនរងគ្រោះស្រែកប្រាប់អ្នកធ្វើដំណើរ នៅជិតកន្លែងកើតហេតុថា «ខ្លួនមានអាការចុកឆ្អល់ក្នុងពោះពិបាកដកដង្ហើម ភ្លាមនោះពលរដ្ឋ បានទាក់ទងទៅខាងអង្គការមិត្តសំឡាញ់មណ្ឌលកែប្រែ នៅឯព្រែកស្ពឺឱ្យមកទទួលយកជនរងគ្រោះទៅកាន់មន្ទីរពេទ្យ។ប៉ុន្តែខាងអង្គការបានប្រាប់ថា ម៉ោង១រសៀលទើបមកទទួលបាន ស្រាប់តែវេលាម៉ោង១១ព្រឹកជនរងគ្រោះបានប្រកាច់ននៀលស្រែកខ្លាំងៗ លើស្មៅសួនច្បារកន្លែងកើតហេតុ រួចក៏ដាច់ខ្យល់ស្លាប់តែម្ដង។
ក្រោយពីកើតហេតុកម្លាំងសមត្ថកិច្ច បានចុះទៅធ្វើកោសល្យវិច័យ ដោយសន្និដ្ឋានថា ជនរងគ្រោះ ស្លាប់ដោយសារគាំងបេះដូង ពេលធ្វើកំណត់ហេតុរួចបានទាក់ទងទៅរថយន្តសាមុយដឹកសពទៅវត្តទួល រង់ចាំធ្វើការបូជានៅពេលក្រោយ៕
