ឯកឧត្ដម ខៀវ កាញារីទ្ធ ស្នើឱ្យអ្នកសារព័ត៌មាន គោរពតាមក្រមសីលធម៌ វិជ្ជាជីវៈ និងច្បាប់របបសារព័ត៌មាន ឱ្យបានល្អ ជៀសវាងការផ្សព្វផ្សាយខុស
រាជធានីភ្នំពេញ៖អ្នកសារព័ត៌មាន ទាំងអស់ត្រូវខិតខំប្រឹងប្រែងរៀនឱ្យបានច្រើន គោរពតាមក្រមសីលធម៌ វិជ្ជាជីវៈ និងច្បាប់ស្តីអំពីរបបសារព័ត៌មានឲ្យបានល្អ ជៀសវាងការផ្សព្វផ្សាយខុស ហើយក្រសួងព័ត៌មាន នឹងធ្វើការបើកសិក្ខាសាលាដល់អ្នកសារព័ត៌មានបន្តទៀត។
ឯកឧត្ដម ខៀវ កាញារីទ្ធ រដ្ឋមន្ត្រីក្រសួងព័ត៌មាន មានប្រសាសន៍បែបនេះក្នុងឱកាសដែលឯកឧត្តមបានអញ្ជើញជាអធិបតីក្នុងសិក្ខាសាលាផ្សព្វផ្សាយ ស្តីពីការផ្សាយព័ត៌មានប្រកបដោយវិជ្ជាជីវៈ និងក្រមសីលធម៌។ដែលប្រព្រឹត្តទៅនាព្រឹកថ្ងៃពុធ ៤រោជ ខែមាឃ ឆ្នាំកុរ ឯកសក័ ព.ស.២៥៦៣ ត្រូវនឹងថ្ងៃទី១២ ខែកុម្ភៈ ឆ្នាំ២០២០ នៅសាលសត្យាទីស្ដីការក្រសួងព័ត៌មាន ដោយមានសិក្ខាកាម(អ្នកសារព័ត៌មាន)ចូលរួមជាង២០០នាក់ មកពីបណ្ដារាជធានី-ខេត្តទាំង២៥។
រដ្ឋមន្ត្រីក្រសួងព័ត៌មានបានបញ្ជាក់ថា ក្នុងនាមជាអ្នកសារព័ត៌មាន មិនត្រូវវាយតម្លៃអ្វីថាល្អ ឬអាក្រក់នោះទេ ប៉ុន្តែក្នុងនាមជាអ្នកសារព័ត៌មាន ត្រូវឈរនៅផ្លូវកណ្តាលហើយអ្នកសារព័ត៌មាន ត្រូវនិយាយតែព្រឹត្តិការណ៍ណាដែលបានកើតមានឡើងនៅក្នុងសង្គម។
ជាងនេះទៅទៀតឯកឧត្តមបានបញ្ជាក់បន្ថែមទៀតថា ក្រមសីលធម៌មានសារសំខាន់ វាមិនមែនមានលក្ខណៈបង្ខំ ត្រូវមានទោស ឬឧក្រិដ្ឋកម្មបទល្មើសទេហើយការប្រើប្រាស់ភាសា និងការរក្សាភាពថ្លៃថ្នូរ របស់អ្នកសារព័ត៌មាន បានបង្ហាញឱ្យដឹងពីកម្រិតសិក្សាអប់រំ ការយល់ដឹងរបស់អ្នកសារព័ត៌មាន៕
