គ្រួសារសព សមាជិកសមាគមមិត្តនគរបាលជាតិកម្ពុជា ដែលទទួលមរណៈ ដោយរោគគារពាធ ទទួលបានថវិកា ពីស្នងការខេត្តបាត់ដំបង
ខេត្តបាត់ដំបង៖ដោយអនុវត្តតាមលក្ខន្តិកៈសមាគមមិត្តនគរបាលជាតិកម្ពុជា នាព្រឹកថ្ងៃ អង្គារ ៣រោច ខែ មាឃ ឆ្នាំកុរឯកស័កព.ស.២៥៦៣ត្រូវនឹងថ្ងៃទី១១ ខែ កុម្ភៈ ឆ្នាំ ២០២០ ឯកឧត្តម ឧត្តមសេនីយ៍ទោ អ៊ុច សុខុន ស្នងការនៃស្នងការដ្ឋាននគរបាលខេត្តបាត់ដំបង និងជាប្រធានគណៈកម្មាធិការមូលដ្ឋានសមាគម មិត្តនគរបាលជាតិកម្ពុជា នៃស្នងការដ្ឋាននគរ បាលខេត្តបាត់ដំបងបានចាត់តាំងលោកឧត្តម សេនីយ៍ត្រី សៅ សាម៉ុន ស្នងការរងផែនការងារធនធានមនុស្ស និងជាអនុប្រធានគណៈកម្មាធិការមូលដ្ឋានសមាគមមិត្តនគរបាលជាតិកម្ពុជា នៃស្នងការដ្ឋាននគរបាលខេត្តបាត់ដំបង ជាតំណាងក្នុងការប្រគល់ថវិកាសមាគមមិត្តនគរបាលជាតិកម្ពុជា ជូនដល់ក្រុមគ្រួសារសពលោក ប៉ូយ ឆាវ ជានិវត្តន៍ជននិងជាអតីតនាយប៉ុស្តិ៍នគរបាលរដ្ឋបាលគាស់ក្រឡ នៃអធិការដ្ឋាននគរបាលស្រុកគាស់ក្រឡ ដែលលោកបានទទួលមរណៈភាពកាលពីថ្ងៃទី១០ ខែកុម្ភៈ ឆ្នាំ ២០២០ ក្នុងអាយុ៥៧ឆ្នាំដោយរោគគារពាធ។
ពិធីបុណ្យសពប្រារព្វធ្វើនៅគេហដ្ឋាននៃសពស្ថិតនៅភូមិវត្តចាស់ ឃុំតាលាស់ ស្រុកមោងឫស្សី ខេត្តបាត់ដំបង។ថវិកាសមាគមមិត្តនគរបាលជាតិកម្ពុជាចំនួន៦,០ ០០,០០០រៀល( ប្រាំមួយលានរៀល ) បានប្រគល់ជូនក្រុមគ្រួសារសពដើម្បីបានចាត់ចែងប្រើប្រាស់ក្នុងពិធីបុណ្យនេះ ។
ឈ្លៀតក្នុងឱកាសនោះដែរលោកឧត្តមសេនីយ៍ត្រី សៅ សាម៉ុន បានពាំនាំនូវការផ្តាំផ្ញើចូលរួមរំលែកទុក្ខពីសំណាក់ថ្នាក់ដឹកនាំក្រសួងមហាផ្ទៃដែលមានសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃនិងជាប្រធានកិត្តិយសសមាគមមិត្តនគរបាលជាតិកម្ពុជា ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ និងជាប្រធានសមាគមមិត្តនគរបាលជាតិកម្ពុជា ព្រមទាំងឯកឧត្តម នាយឧត្តមសេនីយ៍ ប៉ែន វិបុល អគ្គស្នងការរងនគរបាលជាតិ ប្រធាននាយកដ្ឋានបុគ្គលិក និងជាអគ្គលេខាធិការសមាគមមិត្តនគរបាលជាតិកម្ពុជា និងថ្នាក់ដឹកនាំស្នងការដ្ឋាននគរបាលខេត្តបាត់ដំបងចំពោះក្រុមគ្រួសារសព៕