រដ្ឋបាលខេត្តកែប រៀបចំពិធីបួងសួងបើកព្រះនេត្របារមីរូបសំណាកសេះស ដើម្បីសុំសេចក្តីសុខចម្រើន
ខេត្តកែប៖នៅព្រឹកថ្ងៃព្រហស្បតិ៍ ១៥កើត ខែបុស្ស ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី០៩ ខែមករា ឆ្នាំ ២០២០ នេះ រដ្ឋបាលខេត្តកែប បាននិមន្តព្រះសង្ឃ រៀបចំពិធីបួងសួងបើកព្រះនេត្របារមីរូបសំណាកសេះស ដើម្បីសុំសេចក្ដីសុខចម្រើន ជូនដល់ថ្នាក់ដឹកនាំ មន្ត្រីរាជការ កងកម្លាំងប្រដាប់អាវុធ បងប្អូនប្រជាពលរដ្ឋ ព្រមទាំងភ្ញៀវទេសចរជាតិ-អន្តរជាតិ ដែលអញ្ចើញមកសម្រាកលំហែកម្សាន្តក្នុងខេត្តកែប។
ពិធីនេះប្រព្រឹត្តទៅក្រោមអធិបតីភាព លោក កែន សត្ថា អភិបាល នៃគណអភិបាលខេត្ត លោក សំ សារីន ប្រធានក្រុមប្រឹក្សាខេត្ត និងលោក ស៊ឹម ស៊ីថា ប្រតិភូរាជរដ្ឋាភិបាល ទទួលបន្ទុក អគ្គនាយក រដ្ឋាករទឹក ស្វយ័ត រាជធានីភ្នំពេញ ព្រមទាំងមានការអញ្ចើញចូលរួមពីសំណាក់ លោក លោកស្រី សមាជិក សមាជិកា ក្រុមប្រឹក្សាខេត្ត លោក លោកស្រី អភិបាលរងខេត្ត កងកម្លាំងប្រដាប់អាវុធទាំងបី មន្ត្រីរាជការគ្រប់លំដាប់ថ្នាក់ លោកគ្រូ អ្នកគ្រូ សិស្សានុសិស្ស និងបងប្អូនប្រជាពលរដ្ឋជាច្រើនរូបផងដែរ។
ក្នុងឱកាសនេះ លោក កែន សត្ថា អភិបាលខេត្ត ព្រមទាំងថ្នាក់ដឹកនាំគ្រប់ជាន់ថ្នាក់ និងមន្ទីរ អង្គភាពក្នុងខេត្ត កងកម្លាំងប្រដាប់អាវុធ ព្រមទាំងមន្ត្រីរាជការទាំងអស់ បានអុជធូបបួងសួងនៅមុខរូបសំណាកសេះស ដើម្បីសុំសេចក្តីសុខ សេចក្តីចម្រើន ពិសេសបែរបន់សូមឱ្យប្រជាពលរដ្ឋនិងភ្ញៀវទេសចរណ៍ដែលមកសម្រាក លម្ហែ នៅក្នុងរមណីយដ្ឋានឆ្នេរកែប ជួបតែក្តីសុខ និងមានសុវត្ថិភាពគ្រប់ពេលវេលា ហើយក៏សូមឧទ្ទិសកុសល ជូនដល់ដួងព្រលឹងជនរងគ្រោះដែលបានស្លាប់បាត់បង់ជីវិត ក្នុងឧប្បត្តិហេតុបាក់រលំអគារកម្ពស់៦ ជាន់កាលពីពេលថ្មីៗនេះផងដែរ៕