ឯកឧត្តម ឧបនាយករដ្ឋមន្ត្រី ហោ ណាំហុង អនុញ្ញាតឲ្យឯកអគ្គរដ្ឋទូតអាមេរិកថ្មី ប្រចាំកម្ពុជា ជួបសម្តែងការគួរសម នៅទីស្ដីការគណៈរដ្ឋមន្ត្រី
រាជធានីភ្នំពេញ៖នៅព្រឹកថ្ងៃទី៨ ខែមករា ឆ្នាំ២០២០នេះ ឯកឧត្តមឧបនាយករដ្ឋមន្ត្រី ហោ ណាំហុង បានអនុញ្ញាតឲ្យឯកឧត្តម ផាត់ទ្រីក មឺហ្វី (Patrick Murphy) ឯកអគ្គរដ្ឋទូតអាមេរិកថ្មី ប្រចាំកម្ពុជាជួបសម្តែងការគួរសម និងពិភាក្សាការងារ នៅទីស្ដីការគណៈរដ្ឋមន្ត្រី។
ឯកឧត្តមបានបញ្ជាក់ប្រាប់ទៅទូតអាមេរិកថា យើងគប្បីធ្វើយ៉ាងណា ឲ្យទំនាក់ទំនង និងកិច្ចសហប្រតិបត្តិការ រវាងប្រទេសទាំងពីរឲ្យកាន់តែមានភាពខ្លាំងក្លា និងជិតស្និទថែមទៀត លើអ្វីដែលយើងមានស្រាប់ ដោយយើងសម្លឹងមើលមេរៀន ដែលបណ្តាប្រទេសមួយចំនួន នៅតំបន់មជ្ឈឹមបូព៌ា ដែលប្រជាជនខ្លួន ស្រែកឃ្លាននូវលទ្ធិប្រជាធិបតេយ្យខ្លាំងពេក បានធ្វើឱ្យបណ្តាប្រទេសនោះរងគ្រោះ វិនាសព្រាតប្រាស់ដោយសារតែភ្លើងសង្គ្រាម ដូច្នេះ ដោយសារតែមេរៀនរបស់បណ្តាប្រទេសទាំងនេះ រាជរដ្ឋាភិបាលកម្ពុជា បានដាក់ចេញនូវគោលនយោបាយឈ្នះ-ឈ្នះ នៅខែធ្នូ ឆ្នាំ១៩៩៨ ដែលនាំយកសន្តិភាពយ៉ាងលំបាកបំផុតជូនមាតុភូមិកម្ពុជា។
ឧបនាយករដ្ឋមន្ត្រី ហោ ណាំហុង បានបន្ថែមទៀតថា តាមរយៈសុខសន្តិភាពនេះ បានធ្វើឱ្យប្រទេសកម្ពុជា មានការអភិវឌ្ឍលើគ្រប់វិស័យ ធ្វើឱ្យប្រជាពលរដ្ឋសប្បាយរីករាយ បានជួបជុំក្រុមគ្រួសារ ដូចអ្វីដែលឯកឧត្តមឯកអគ្គរដ្ឋទូត បានមើលឃើញដូចសព្វថ្ងៃនេះ។
ពាក់ព័ន្ធនឹងការលើកឡើង របស់ឯកឧត្តមឧបនាយករដ្ឋមន្ត្រី ឯកឧត្តម ផាត់ទ្រីក មឺហ្វី នៅក្នុងជំនួបនេះ បានលើកឡើងថា ឯកឧត្តមក៏ចង់ឃើញទំនាក់ទំនងរវាងកម្ពុជា និងអាមេរិក កាន់តែល្អផងដែរ។ឯកឧត្តម ចាត់ទុកប្រទេសកម្ពុជា មានមូលដ្ឋានល្អ សម្រាប់អនុវត្ត លទ្ធិប្រជាធិបតេយ្យ ដោយមានប្រជាពលរដ្ឋយ៉ាងច្រើន បានចេញទៅបោះឆ្នោត ទោះបីលទ្ធិប្រជាធិបតេយ្យកម្ពុជា មានភាពក្មេងខ្ចីក៏ដោយ៕
![]()
![]()
![]()