អភិបាលខេត្តកំពត ជម្រុញឲ្យមន្ទីរ អង្គភាពជំនាញពាក់ព័ន្ធនិងអាជ្ញាធរមូលដ្ឋាន សហការគ្នាល្អរវាងក្រុមហ៊ុន(IGB) ដើម្បីធ្វើឲ្យគម្រោងការអភិវឌ្ឍឆ្នេរ តំបន់កែបថ្មីនេះ លេចរូបរាងឡើង
ខេត្តកំពត៖ឯកឧត្តម ជាវ តាយ អភិបាល នៃគណៈអភិបាលខេត្តកំពត បានណែនាំនិងជម្រុញឲ្យមន្ទីរ អង្គភាពជំនាញពាក់ព័ន្ធនិងអាជ្ញាធរមូលដ្ឋាន សហការគ្នាល្អរវាងក្រុមហ៊ុន(IGB) ដើម្បីធ្វើយ៉ាងណាអោយគម្រោងការអភិវឌ្ឍឆ្នេរតំបន់កែបថ្មីនេះ បានលេចរូបរាងឡើង។ សំដៅធ្វើឲ្យបានសម្រេចតាមគោលបំណង ដែលរដ្ឋបាលខេត្តចង់បាន ក្នុងការពង្រឹងពង្រីកសក្ដានុពលវិស័យទេសចរណ៍នៅក្នុងខេត្ត ប្រកបដោយនិរន្តរភាពនិងចីរភាព។ពិសេស ការបម្រើកំសាន្តសប្បាយជូនប្រជាពលរដ្ឋ ក៏ដូចជាភ្ញៀវទេសចរជាតិ និងអន្តរជាតិ ឱ្យបានលេចរូបរាងឡើង ជាបណ្ដើរៗ មុនឱកាសបុណ្យចូលឆ្នាំថ្មីប្រពៃណីជាតិខ្មែរ មកដល់នាពេលខាងមុខនេះ។
ឯកឧត្តមអភិបាលខេត្តមានប្រសាសន៍បែបនេះ ក្នុងឱកាសដែលឯកឧត្តមបានដឹកនាំកិច្ចប្រជុំជាមួយ នឹងប្រធានក្រុមហ៊ុន( IGB) ពាក់ព័ន្ធនឹង ការជំរុញអនុវត្តគម្រោងវិនិយោគអភិវឌ្ឍឆ្នេរនៅតំបន់កែបថ្មី ឃុំបឹងទូក ស្រុកទឹកឈូ នាព្រឹកថ្ងៃពុធន១៤កើត ខែបុស្ស ឆ្នាំកុរ ឯកស័ក ព.ស២៥៦៣ ត្រូវនឹងថ្ងៃទី០៨ ខែមករា ឆ្នាំ២០២០ ដោយមានការអញ្ជើញចូលរួមពីឯកឧត្តម លោកជំទាវ អភិបាលរងខេត្ត មន្ទីរអង្គភាពជំនាញពាក់ព័ន្ធ និងអាជ្ញាធរមូលដ្ឋានព្រមទាំងម្ចាស់ក្រុមហ៊ុន(IGB) អភិវឌ្ឍន៍ឆ្នេរតំបន់កែបថ្មី។
ក្នុងនោះពាក់ព័ន្ធនឹងគម្រោងអភិវឌ្ឍន៍នេះ ជាជំហានដំបូងនេះ ឯកឧត្តមអភិបាលខេត្តក៏បានណែនាំជំរុញឲ្យមាន កិច្ចសហសការយកចិត្តទុកដាក់ លើហេដ្ឋារចនាសម្ព័ន្ធ ផ្លូវ អគ្គិសនី ប្រព័ន្ធទឹកប្រើប្រាស់ រួមនិងសេវាកម្មបម្រើដល់ភ្ញៀវចូលមកកំសាន្តផងដែរ។
គួររំលឹកបញ្ជាក់ថា ឆ្នេរតំបន់កែបថ្មីនេះជាតំបន់មួយមានការវិនិយោគ ហើយមានច្បាប់ អនុញ្ញាតសម្រេចរបស់ក្រុមប្រឹក្សាជាតិអភិវឌ្ឍកម្ពុជា(CDC) នៅក្នុងនោះគឺមានទំហំដី២០០ហិកតាគឺរដ្ឋបាលខេត្តទទួលបាន៤០ភាគរយអ្នកវិនិយោគទទួលបាន៦០ភាគរយ មានន័យថារដ្ឋបាលខេត្តទទួលបានដី៨០ហិកតាអ្នកវិនិយោគទទួលបាន១២០ហិកតា៕