បុរសម្នាក់ត្រូវខ្មាន់កាំភ្លើង បាញ់ប្រហារយ៉ាងព្រៃបំផុត នៅក្នុងភោជនីដ្ឋានហេបភីណេស ស៊ុប និងខារ៉ាអូខេគ្រួសារ
រាជធានីភ្នំពេញ៖កាលពីវេលាម៉ោងជាង៤ទៀបភ្លឺ ថ្ងៃទី០៩ ខែមករា ឆ្នាំ២០២០ ករណីដែលគួរឱ្យភ្ញាក់ផ្អើលមួយបានកើតឡើង ដោយ បុរសម្នាក់ ត្រូវជនដៃដល់បាញ់សម្លាប់ យ៉ាងព្រៃបំផុត នៅក្នុងភោជនីដ្ឋានហេបភីណេស ស៊ុប និងខារ៉ាអូខេគ្រួសារ នៅចំណុចលើផ្លូវត្រសក់ផ្អែម (ផ្លូវ៦៣) ស្ថិតនៅក្នុងសង្កាត់បឹងរាំង ខណ្ឌដូនពេញ រាជធានីភ្នំពេញ។
បើតាមបុគ្គលិកនៅក្នុងភោជនីដ្ឋានហេបភីណេស ស៊ុប និងខារ៉ាអូខេបានបញ្ជាក់ថា មុនពេលកើតហេតុគេឃើញបុរសរងគ្រោះ និងបុរសម្នាក់ទៀតដែលជាជនដៃដល់ បានជិះរថយន្តមកជាមួយគ្នា ដើម្បីហូបស៊ុប ពេលជិតមកដល់ភោជនីយដ្ឋាន ជនរងគ្រោះបានដើរចូលក្នុងហាងអង្គុយតុមុន ឯជនដៃដល់ក៏នៅរៀបចំចតរថយន្តនៅខាងក្រៅ។បន្ទាប់ពីចតរថយន្តរួចជនដៃដល់ ក៏បានដើរចូលក្នុងហាង ក៏ស្រាបតែទាញកាំភ្លើងបាញ់ចំផ្អឹបសៀតផ្កាជនរងគ្រោះ១គ្រាប់ បណ្តាលឲ្យស្លាប់អង្គុយលើតុ យ៉ាងអណោចអធមជាទីបំផុត។
ប្រភពដដែលបញ្ជាក់ទៀតថា បន្ទាប់ពីធ្វើសកម្មភាពបាញ់រួច ជនដៃដល់ក៏បានដើរចេញពីហាង ដោយមានបុរស២នាក់ផ្សេងទៀត បើករថយន្ត និងជិះម៉ូតូ១គ្រឿងមកទទួល បើកគេចខ្លួនបាត់ស្រមោល។
បច្ចុប្បន្ន កម្លាំងសមត្ថកិច្ចកំពុងតែធ្វើការស្រាវជ្រាវរកមុខឃាតករ ដើម្បីចាប់យកមកផ្តន្ទាទោសតាមច្បាប់៕