ឈើប្រភេទលេខ១ចំនួន៧១កំណាត់ ដែលឈ្មួញលាក់ទុកនៅក្នុងចម្ការស្វាយចន្ទី ត្រូវបានម្លាំង អាវុធហត្ថមូលដ្ឋាន ស្រុកអណ្តូងមាស ចុះបង្ក្រាប
ខេត្តរតនគិរី៖កម្លាំងអាវុធហត្ថខេត្តរតនគិរី សហការជាមួយកម្លាំង អាវុធហត្ថមូលដ្ឋានស្រុកអណ្តូងមាស ដោយក្រោមការបញ្ជាផ្ទាល់ពីលោកឧត្តមសេនីយ៍ត្រី ថាវ យ៉េន មេបញ្ជាការកងរាជអាវុធហត្ថខេត្តរតនគិរី បានចុះបង្ក្រាបនិងរឹបអូសបានឈើប្រណិតចំនួន៧១កំណាត់ ស្មើនឹង ១១,៣៨៧ម៉ែត្រត្រីគុណ ដែលឈ្មួញបានដឹកជញ្ជូនយកមកលាក់ទុក នៅក្នុងចម្ការស្វាយចន្ទីរបស់ប្រជាពលរដ្ឋ នៅចំណុចនិយាមកាលេខ (០៧៥១១៧០.១៥៤៦០០៣) ស្ថិតនៅក្នុងភូមិម៉ុយ ឃុំញ៉ាង ស្រុកអណ្តូងមាស ខេត្តរតនគិរី។
ការចុះប្រតិបត្តិការនេះបានធ្វើឡើងកាលពីថ្ងៃទី៤ ខែមករា ឆ្នាំ២០២០ ខណៈដែលកម្លាំងកំពុងដើរល្បាតក្នុងភូមិសាស្ត្ររបស់ខ្លួន ក៏ប្រទះឃើញគំនរឈើមួយកន្លែង នៅក្នុងចម្ការស្វាយចន្ទីរបស់ប្រជាពលរដ្ឋ ដែលក្រុមឈ្មួញ បានដឹកជញ្ជូនយកមកលាក់រង់ចាំឱកាសល្អ និងដឹកបន្តទៅប្រទេសវៀតណាម។
យោងតាមរបាយការណ៍ពីអាវុធហត្ថខេត្ត បានឲ្យដឹងថា ក្នុងប្រតិបត្តិការនេះមានកម្លាំងអាវុធហត្ថមានចំនួន៨នាក់ សហការជាមួយកម្លាំងជំនាញរដ្ឋបាលព្រៃឈើចំនួន២នាក់ ដឹកនាំដោយលោក អនុសេនីយ៍ឯក សោម សុផល នាយការិយាល័យផែនការសន្តិសុខ បានចុះបង្រ្កាប និងរឹបអូសគំនរឈើលេខ១ ប្រភេទសុក្រំ ចំនួន៧១កំណាត់ ស្មើនឹង ១១,៣៨៧ម៉ែត្រត្រីគុណ ដែលឈ្មួញបានដឹកជញ្ជូនយកមកលាក់ទុកនៅចំណុចខាងលើ។
ក្រោយពីការចុះបង្ក្រាប កម្លាំងបានរឹបអូសយកវត្ថុតាងឈើខាងលើនេះ ដឹកជញ្ជួនយកមករក្សាទុកនៅស្នាក់ការសន្តិសុខ៧៨៧ ដើម្បីចាត់ការបន្តទៅតាមនិតិវិធី៕
