ចាប់ឃាត់ខ្លួនបុសម្នាក់ ប្រើហឹង្សាទៅលើប្រពន្ធបណ្តាលឲ្យរងរបួស ព្រោះតែរឿងប្រចណ្ឌ
ខេត្តបន្ទាយមានជ័យ៖បុរសម្នាក់ត្រូវបានកម្លាំងកងរាជអាវុធហត្ថក្រុងប៉ោយប៉ែត ដែលដឹកនាំដោយលោកវរសេនីយ៍ត្រី នួន នីណារ៉ូ មេបញ្ជាការកងរាជអាវុធក្រុង បានចុះឃាត់ខ្លួនកាលពីវេលាម៉ោង១០ព្រឹក ថ្ងៃទី៥ ខែមករា ឆ្នាំ២០២០ នៅចំណុចម្ដុំផ្សាររាត្រី ស្ថិតក្នុងភូមិបាលិលេយ្យ១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ ពាក់ពន្ធ័រឿងប្រើហឹង្សាទៅលើប្រពន្ធបណ្តាលឲ្យរងរបួស ព្រោះតែរឿងប្រចណ្ឌ។
លោកវរសេនីយ៍ត្រី នួន នីណារ៉ូ បានឲ្យដឹងថា ជនសង្ស័យមានឈ្មោះ អ៊ូ សុភ័ក្រ ភេទប្រុស អាយុ៣៣ឆ្នាំ ត្រូវជាប្ដីជនរងគ្រោះរស់នៅក្នុងភូមិបាលិលេយ្យ១ សង្កាត់ប៉ោយប៉ែត ក្រុងប៉ោយប៉ែត។
លោកបានបញ្ជាក់ឲ្យដឹងទៀតថា នៅមុនពេលកើតហេតុនោះជនសង្ស័យដោយសាររឿងប្រច័ណ្ឌប្រពន្ធខ្លាំងពេក ឈានដល់វាយធ្វើទារុណកម្មប្រពន្ធ ជាបន្តបន្ទាប់បណ្តាលឲ្យរងរបួសធ្ងន់ ត្រូវបានឃាត់ខ្លួនហើយបានបញ្ជូនមកទីបញ្ជាការកងរាជអាវុធហត្ថខេត្ត ដើម្បីចាត់ការបន្ត។
លោកវរសេនីយ៍ឯក ម៉ែន ភិរម្យ មេបញ្ចាការរងកងរាជអាវុធហត្ថខេត្ត ទទួលការងារយុត្តិធម៌បានឲ្យដឹងថា យោងតាមពាក្យបណ្ដឹងរបស់ជនរងគ្រោះឈ្មោះ លឹម ស្រីវណ្ណថា ភេទស្រី អាយុ៣២ឆ្នាំត្រូវជាប្រពន្ធបានប្រាប់កម្លាំងជំនាញថា ប្តីរបស់ខ្លួនពិតជាបានវាយធ្វើបាបខ្លួនជាញឹកញាប់កន្លងមករហូតដល់ថ្ងៃកើតហេតុដោយស៊ូទ្រាំ និងអំពើព្រៃផ្សៃរបស់ប្តីតទៅទៀតមិនបានដោយសាររឿងប្រចណ្ឌនោះក៏បានប្តឹងទៅអាវុធហត្ថតែម្តង ជនសង្ស័យត្រូវបានកម្លាំងជំនាញការិយាល័យប្រឆាំងការជួញដូរមនុស្សកសាងសំណុំរឿង បញ្ជូនទៅសាលាដំបូងខេត្តដើម្បីផ្ដន្ទាទោសតាមច្បាប់៕
