នគរបាលខេត្តសៀមរាប បន្តនាំខ្លួនអ្នកលែងFacebook ម្នាក់ទៀតមកសួរនាំ ករណីបង្ហោះរឿងមិនពិត
ខេត្តសៀមរាប៖ស្ត្រីម្នាក់ឈ្មោះ កាន់ សុភ័ក្រ ភេទស្រី អាយុ១៩ឆ្នាំ ជនជាតិខ្មែរ សញ្ជាតិខ្មែរ អាសយដ្ឋានផ្ទះលេខ០៥ ភូមិតាព្រហ្ម ឃុំសង្វើយ ស្រុកជីក្រែង ខេត្តសៀមរាប មុខរបរជាងអ៊ុតសក់ ដែលបានប្រើប្រាស់គណនីហ្វេសបុកឈ្មោះ Sopheak Love ចែកចាយ និងផ្សព្វផ្សាយ ព័ត៌មានមិនពិត ដែលបាន ធ្វើឲ្យមានការភ័យខ្លាចដល់ប្រជាពលរដ្ឋ ពាក់ពន្ឋ័ករណីឆ្លងជំងឺរលាកសួត ដោយវីរុសកូរ៉ូណា នៅក្នុងខេត្តសៀមរាប ត្រូវបានកម្លាំងផែនការងារសន្តិសុខ នៃស្នងការដ្ឋាននគរបាលខេត្តសៀមរាប ដឹកនាំដោយលោកឧត្តមសេនីយ៍ត្រី ហួត សុធី ស្នងការរងទទួលការងារសន្តិសុខ នាំខ្លួនមកសួរនាំនៅព្រឹកថ្ងៃទី៣០ ខែមករា ឆ្នាំ២០២០នេះ។
ក្រោយពីនាំខ្លួនមកសាកសួរនារីខាងលើបានសារភាពកំហុសរបស់គេ នៅចំពោះមុខសមត្ថកិច្ច និងបានសន្យាថា ឈប់ចែកចាយព័ត៌មានប្រឌិតបែបនេះទៀតហើយ។
បើតាមលោកឧត្តមសេនីយ៍ត្រី ហួត សុធី ស្នងការរងទទួលការងារសន្តិសុខ នៃស្នងការដ្ឋាននគរបាលខេត្តសៀមរាបបានបញ្ជាក់ថា ក្រៅពីស្ត្រីម្នាក់ខាងលើនេះ កម្លាំងផែនការងារសន្តិសុខ បានឃាត់ខ្លួនអ្នកផ្សេងចំនួន២នាក់ផងដែរ ដែលបានចែកចាយព័ត៌មានប្រឌិត ពាក់ព័ន្ធនឹងការរកឃើញមានជំងឺរលាកសួត កូរ៉ូណា ក្នុងខេត្តសៀមរាបនេះ
មានឈ្មោះ ម៉ែន ចាន់នឿន ភេទប្រុស អាយុ៣៤ឆ្នាំ និងឈ្មោះ អ៊ឹង ជិងសេរីរតនៈ ភេទស្រី អាយុ២០ឆ្នាំ ដែលពួកគេជាបុគ្គលិកក្រុមហ៊ុនទេសចរណ៍ ពួកគេក៏បានមកសារភាពកំហុស ចំពោះមុខសមត្ថកិច្ច កាលពីថ្ងៃទី២៨ ខែមករា ឆ្នាំ២០២០កន្លងទៅដែរ។
លោកឧត្តមសេនីយ៍ត្រី បានបញ្ជាក់ទៀតថា ពួកគេទាំង៣នាក់បានសន្យា នៅចំពោះមុខសមត្ថកិច្ចថា នឹងមិនបន្តផ្សព្វផ្សាយព័ត៌មានមិនពិត ដែលបណ្តាលឲ្យមានការចលាចល ដល់ប្រជាជនក្នុងខេត្តសៀមរាប និងប្រជាពលរដ្ឋទូទាំងប្រទេសទៀតឡើយ ក្រោយធ្វើកិច្ចសន្យារួចអ្នកទាំង៣នាក់ ត្រូវបានអនុញ្ញាតឲ្យត្រឡប់ទៅផ្ទះវិញ។
សូមជម្រាបថា នៅល្ងាចថ្ងៃទី២៨ ខែមករា ឆ្នាំ២០២០ អាជ្ញាធរខេត្តសៀមរាប បានចេញមកបំភ្លឺថា ពុំទាន់រកឃើញាមានករណីជំងឺរលាកសួត ដោយវីរុសកូរ៉ូណាថ្មី (2019-CoV) ណាមួយនៅក្នុងទឹកដីរបស់ខ្លួនឡើយ។
លោកឧត្តមសេនីយ៍ត្រី ហួត សុធី ស្នងការរងទទួលការងារសន្តិសុខ ក៏បានសំនូមពរ និងអំពាវនាវ ដល់បងប្អូនប្រជាពលរដ្ឋទាំង ត្រូវប្រើប្រាស់បណ្ដាញសង្គមអោយបានត្រឹមត្រូវ មិនត្រូវបង្ហោះរឺ ចែកចាយ(share)ពត៌មានមិនពិត រឺប្រឌឹតដែល មិនមានប្រភពច្បាស់លាស់ ធ្វើអោយប៉ះពាល់ សន្តិសុខសណ្តាប់ធ្នាប់សង្គម ដែលនាំអោយជាអំពើខុសច្បាប់មានទោស ៕
