អភិបាលខេត្តកំពត ចុះណែនាំ មន្ត្រីច្រកទ្វារព្រំដែន អន្តរជាតិព្រែកចាក និងចែម៉ាសជូនពលរដ្ឋ ដើម្បីបង្ការ និងទប់ស្កាត់ការឆ្លង វីរូសកូរ៉ូណា
ខេត្តកំពត៖ដោយអនុវត្តនូវប្រសាសន៍ដ៏ខ្ពង់ខ្ពស់ របស់សម្តេចតេជោ ហ៊ុន សែន ប្រមុខរាជរដ្ឋាភិបាលកម្ពុជា ក្នុងការណែនាំដល់មន្ត្រី អាជ្ញាធរ និងប្រជាពលរដ្ឋ ឲ្យរួមគ្នាប្រុងប្រយ័ត្នអោយបានខ្ពស់ក្នុងការបង្ការទប់ស្កាត់ នៃការឆ្លងនូវ មេរោគវីរុស កូរ៉ូណា ក្នុងប្រទេសកម្ពុជាយើង នៅថ្ងៃទី៣០ ខែមករា ឆ្នាំ២០២០ ឯកឧត្តម ជាវ តាយ អភិបាល នៃគណៈអភិបាលខេត្ត អមដំណើរ ដោយមន្ត្រីជំនាញពាក់ព័ន្ធ និងមន្ទីរ អង្គភាពមួយចំនួនក្នុងខេត្ត បានអញ្ជើញចុះស្វែងយល់ស្ថានភាព និងណែនាំមន្ត្រី ដើម្បីពង្រឹងវិធានការណ៍បង្ការ និងទប់ស្កាត់ការឆ្លង វីរូសកូរ៉ូណា នៅតំបន់ច្រកទ្វារព្រំដែនអន្តរជាតិព្រែកចាក។
នៅក្នុងឱកាសនោះ ឯកឧត្តម ជាវ តាយ អភិបាលខេត្ត បានលើកបញ្ជាក់ថា បើទោះបីនៅបណ្ដាប្រទេសមួយចំនួនក៏ដូចជា ពិភពលោក មានការព្រួយបារម្ភ ចំពោះបញ្ហាមេរោគវីរុសកូរ៉ណានោះក្ដី ប៉ុន្តែសម្រាប់នៅកម្ពុជាយើងតាមការកត់សម្គាល់ ដោយយកចិត្តទុកដាក់របស់រាជរដ្ឋាភិបាល ក៏ដូចជាក្រសួងសុខាភិបាល បញ្ហាមេរោគវីរុសកូរ៉ណានេះ នៅមិនទាន់មានអ្វីគួរអោយបារម្មណ៍ឡើយ។
តែទោះបីយ៉ាងនេះក្ដី រាជរដ្ឋាភិបាល កម្ពុជាយើងមិនបានព្រងើយកន្តើយ ដោយគ្មានការប្រុងប្រយ័ត្ន និងយកចិត្តទុកដាក់ ចំពោះបញ្ហានេះដែរ។ដូច្នេះឯកឧត្តមអភិបាលខេត្ត ក៏បាន ណែនាំដល់មន្ត្រីគ្រប់ជំនាញដែលឈរជើងនៅតំបន់ច្រកទ្វារព្រំដែនអន្តរជាតិព្រែកចាក ទាំងអស់ត្រូវរួមសហការគ្នាយកចិត្តទុកដាក់ខ្ពស់ ពង្រឹងនូវវិធានការបង្ការ និងទប់ស្កាត់ការឆ្លងនូវ វីរុស កូរ៉ូណានេះ ពិសេសការអនុវត្តនូវអ្វីដែលរាជរដ្ឋាភិបាល ក៏ដូចក្រសួងសុខាភិបាលបានណែនាំ ពោលតាមរយៈការស្គេនរក ដោយម៉ាស៊ីនកំដៅ ការចែកម៉ាស់ការពារ មេរោគចំពោះអ្នកដំណើរឆ្លងកាត់ទាំងជាតិនិងអន្តរជាតិ ក៏ដូចច្រកទ្វារទ្វេភាគីនានាតាមព្រំដែនឲ្យបានជាប់ជាប្រចាំ៕