សិស្សានុសិស្សចំនួន៣៥នាក់ នៅវិទ្យាល័យបន្ទាយឆ្មា មានកើតអាការៈ ឈឺពោះ ក្អួតចង្អោរ រាគ វិលមុខ និងអស់កម្លាំងកំពុងសង្គ្រោះបន្ទាន់
ខេត្តបន្ទាយមានជ័យ៖យ៉ាងហោចណាស់មានសិស្សានុសិស្ស ចំនួន៣៥នាក់ ក្នុងនោះមានសិស្សស្រីចំនួន២៦នាក់ សិស្សប្រុសចំនួន៧នាក់ លោកគ្រូចំនួន១នាក់ លោកស្រីជំទប់ទី២ មួយនាក់នៅសាលាវិទ្យាល័យបន្ទាយឆ្មារ ឃុំបន្ទាយឆ្មារ ស្រុកថ្មពួក ខេត្តបន្ទាយមានជ័យ កើតអាការៈ ឈឺពោះ ក្អួតចង្អោរ រាគ វិលមុខ និងអស់កម្លាំងដោយមិនដឹងមូលហេតុ ក្រោយពីកើតហេតុ នាយកសាលា លោកគ្រូ អ្នកគ្រូ សមត្ថកិច្ច និងមន្ត្រីអាជ្ញាធរមូលដ្ឋាន និងគ្រូពេទ្យជួយដឹកតាមរថយន្តសង្ក្រោះបន្ទាន់ទៅកាន់មណ្ឌលសុខភាពបន្ទាយឆ្មារ និងទៅមន្ទីពេទ្យបង្អែកថ្មពួក កាលពីវេលាម៉ោង១០ព្រឹក ថ្ងៃទី២៥ ខែមករា ឆ្នាំ២០២០។
លោក វរសេនីយ៍នទោ សៅ សារឿន អធិការនគរបាលស្រុកថ្មពួកបានប្រាប់អ្នកយកព័ត៌មានឲ្យដឹងថា ដោយមានការយកចិត្តដាក់ពី លោកឧត្តមសេនីយ៍ទោ អាត់ ខែម ស្នងការនគរបាលខេត្តបន្ទាយមានជ័យ លោកទទួលបានព័ត៌មានថា មានសិស្សកើតអាការៈ ឈឺពោះ ក្អួតចង្អោរ រាគ វិលមុខ និងអស់កម្លាំង ភ្លាម លោកបានដឹកនាំកម្លាំង ចុះជួយ សហការជាមួយគ្រូពេទ្យដល់កន្លែងកើតហេតុ ហើយបានធ្វើអន្តរាគមន៍ជួយបីដឹកតាមរថយន្តសង្គ្រោះយ៉ាងញាប់ដៃញាប់ជើង រហូតដល់ម៉ោងនេះស្ថានភាព ពួកគាត់ពេលនេះមានភាពធូស្រាលបន្តិចឡើងវិញហើយ។
តាមការអះអាងរបស់លោកគ្រូពេទ្យបាននិយាយថា ការដែលសិស្សដួលសន្លប់ទាំង៣៥នាក់នោះ អាការៈ ឈឺពោះ ក្អួតចង្អោរ រាគ វិលមុខ និងអស់កម្លាំងនោះ យោងតាមការសន្និដ្ឋានរបស់ក្រុមគ្រូពេទ្យ គឺពុំទាន់ដឹងមូលហេតុនៅឡើយ កំពុងធ្វើការស្រាវជ្រាវសង្ឃឹមថា សិស្សទាំងអស់នោះ និងរកមូលហេតុឃើញនៅពេលខាងមុខនេះ តែសិស្សទាំងអស់មិនបណ្តាលឲ្យមានសិស្សណារងគ្រោះដល់អាយុជីវិតនោះទេ៕
