សិស្សសាលាចំនួន៥នាក់ លង់ទឹកនៅរមណីយដ្ឋាន កោះស្នា បណ្តាលឲ្យស្លាប់៣នាក់ សង្គ្រោះជីវិតបាន២នាក់
ខេត្តត្បូងឃ្មុំ៖សិស្សសាលាបចំនួន៥នាក់ លង់ទឹកនៅរមណីយដ្ឋានមួយកន្លែងមានឈ្មោះថា រមណីយដ្ឋានកោះស្នា បណ្តាលឱ្យស្លាប់៣នាក់ ហើយ២នាក់ផ្សេងទៀតសង្គ្រោះជីវិតបានទាន់ពេលវេលា ។
ហេតុការណ៍ភ្ញាក់ផ្អើលនេះ បានកើតឡើង កាលពីវេលាម៉ោង១០ព្រឹក ថ្ងៃទី០១ ខែមករា ឆ្នាំ២០២០ នៅរមណីយដ្ឋាន កោះស្នា ត្រង់ចំណុចក្នុងទន្លេមេគង្គ ស្ថិតក្នុងភូមិព្រែកពាម ឃុំពាមជីលាំង ស្រុកត្បូងឃ្មុំ ខេត្តត្បូងឃ្មុំ។ហើយរមណីយដ្ឋាននេះដែរ ត្រូវបានគេដឹងថា មិនមានច្បាប់អនុញ្ញាតនោះទេ។
បើតាមប្រភពពីប្រជាពលរដ្ឋបានឱ្យដឹងថា រមណីយដ្ឋាននេះបានបើកឱ្យ ភ្ញៀវចូលលេងជាច្រើនថ្ងៃមកហើយ តែទើបតែនៅព្រឹកថ្ងៃកើតហេតុនេះទើបមានហេតុករណ៍ ក្មេងស្រីសិស្សសាលាលង់ទឹកស្លាប់ រហូតដល់៣នាក់ ហើយសង្គ្រោះទាន់ពេលវេលាចំនួន២នាក់។
ប្រភពព័ត៌មាននៅកន្លែងកើតហេតុបានឱ្យដឹងថា ក្មេងស្រីទាំង៥នាក់នោះ
ទី១ ឈ្មោះ បួក ស្រីមួយ ភេទស្រី អាយុ១៣ ឆ្នាំ ជនជាតិខ្មែរ រស់នៅភូមិកំពង់ចន្លុះលិច ឃុំពាមជីលាំងស្រុកត្បូងឃ្មុំ ( រស់ )។
ទី២.ឈ្មោះ ពេជ្រ ម៉ូលីកា ភេទស្រី អាយុ១៣ ឆ្នាំ ជនជាតិខ្មែរ រស់នៅភូមិព្រែកផ្ដៅ ឃុំពាមជីលាំង ស្រុក/ខេត្តត្បូងឃ្មុំ ( រស់ )។
ទី៣.ឈ្មោះ គង់ ថារី ភេទស្រី អាយុ១៣ ឆ្នាំ ជនជាតិខ្មែរ រស់នៅភូមិកំពង់ចន្លុះកើត ឃុំពាមជីលាំង ( រកឃើញស្លាប់ )។
ទី៤.ឈ្មោះ បូណា ជីជីង ភេទស្រី អាយុ១៣ ឆ្នាំ ជនជាតិខ្មែរ រស់នៅភូមិបឹងព្រួល ឃុំបឹងព្រួល ស្រុកត្បូងឃ្មុំ បាត់ខ្លួន( ស្លាប់) ។
ទី៥.ឈ្មោះ លាង តុននា ភេទស្រី អាយុ១៣ ឆ្នាំ ជនជាតិខ្មែរ រស់នៅភូមិព្រែកផ្ដៅ ឃុំពាមជីលាំងស្រុកត្បូងឃ្មុំ ( ស្លាប់ )។
លោកវរសេនីយ៍ឯក សួស ស៊ាងលី អធិការនគរបាលស្រុកត្បូងឃ្មុំ បានឱ្យ ដឹងនៅល្ងាចថ្ងៃដដែលថា លោកបានសួរទៅលោកអភិបាលស្រុកត្បូងឃ្មុំ រួចហើយថា ម្ចាស់រមណីយដ្ឋាន ខាងលើបានមកសុំច្បាប់ដែរតែខាងអាជ្ញាធរស្រុក និងអាជ្ញាធរខេត្តមិនទាន់ចេញអាជ្ញាប័ណឱ្យនៅឡើយទេ។
លោកអធិការបន្តទៀតថា ប៉ុន្តែម្ចាស់រមណីយដ្ឋាន បានអះអាងថា រមណីយដ្ឋាន របស់ខ្លួនមិនទាន់ដំណើរការនៅឡើយទេ គឺកំពង់តែសាងសង់ ។
ប្រភពព័ត៌មានពីប្រជាពលរដ្ឋបានឱ្យដឹងថា បើទីតាំង រមណីយដ្ឋាន របស់ខ្លួនមិនទាន់ដំណើរការ ហេតុអីក៏ម្ចាស់ទីតាំងបណ្ដោយឱ្យ ភ្ញៀវចូលទៅកំសាន្ត បណ្ដាលឱ្យ គ្រោះថ្នាក់ដល់អាយុជីវិតមនុស្សបែបនេះ ៕