ឃាត់ខ្លួនបុរសម្នាក់ តាមពាក្យបណ្តឹងជនរងគ្រោះ ករណីជេរប្រមាថ និងគំរាមបាញ់សម្លាប់
ខេត្តពោធិ៍សាត់៖ជនសង្ស័យម្នាក់ ដែលជេរប្រមាថ និងគំរាមបាញ់សម្លាប់ជនរងគ្រោះ ត្រូវបានកម្លាំងសមត្ថកិច្ចចាប់ឃាត់ខ្លួន កាលថ្ងៃពុធ ១៣រោច ខែបុស្ស ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី២២ ខែមករា ឆ្នាំ២០២០ ស្ថិតក្នុងភូមិក្បាលដំរី ឃុំអន្សាចំបក់ ស្រុកក្រគរ ខេត្តពោធិ៍សាត់ បន្ទាប់ពីទទួលបានពាក្យបណ្តឹងពីជនរងគ្រោះ។
សមត្ថកិច្ចបានឲ្យដឹងថា៖ជនសង្ស័យមានឈ្មោះ ចាន់ ណាក់ ភេទប្រុស អាយុ២៩ឆ្នាំ ជនជាតិខ្មែរ បច្ចុប្បន្ន រស់នៅភូមិ/ឃុំកើតហេតុខាងលើ។ការឃាត់ខ្លួនសង្ស័យរូបនេះបានធ្វើឡើង បន្ទាប់ពីទទួលបានពាក្យបណ្ដឹងពីជនរងគ្រោះឈ្មោះ ប៊ិន ភាព ភេទប្រុស អាយុ៥២ឆ្នាំ ជនជាតិខ្មែរ ដែលជនសង្ស័យប្រព្រឹត្តកាលពីវេលាម៉ោងជាង៦យប់ថ្ងៃទី២១ ខែមករា ឆ្នាំ២០២០កន្លងមកនេះ នៅចំណុចកាច់កង់តូបលក់ដូររបស់ឈ្មោះ ឡុង កាលី ភេទប្រុស ស្ថិតក្នុងភូមិក្បាលដំរី ឃុំអន្សាចំបក់ ស្រុកក្រគរ ។
ក្រោយពីឃាត់ខ្លួនសមកិច្ចបានដកហូតបាននូវវត្ថុតាងអាវុធកែច្នៃ(ខ្យល់) និងឧបករណ៍កែច្នៃ(ឆក់)ផងដែរ រួចបញ្ជូនទៅអធិការនគរបាលដ្ឋានស្រុកក្រគរ ដើម្បីបន្តតាមនីតិវិធី។
សមត្ថកិច្ចបញ្ជាក់នៅចំពោះមុខសមត្ថកិច្ចជនសង្ស័យបានឆ្លើយសាភាពថា ខ្លួនពិតជាបានជេរប្រមាថ និងគំរាមបាញ់សម្លាប់ជនរងគ្រោះមែន ដោយខឹងហាមឃាត់មិនឲ្យខ្លួនទៅរកស៊ីដាក់អន្ទាក់សត្វព្រៃ នៅតំបន់ព្រៃភ្នំដំរីស្រុត៕
![]()
![]()
![]()