រដ្ឋបាលក្រុងប៉ោយប៉ែត និមន្តព្រះសង្ឃចំនួន៥៤អង្គ សូត្រមន្ត រាប់បាត្រ បួងសួងសុំសេចក្តីសុខ តាមប្រពៃណីព្រះពុទ្ធសាសនា នៅអាស្រមលោកយាយម៉ៅ ដើមពោធិ៍
ខេត្តបន្ទាយមានជ័យ៖ស្របពេលបុណ្យឆ្លងឆ្នាំសកល២០២០ ឈានចូលឆ្នាំ២០២១ នៅព្រឹកថ្ងៃទី៣១ ខែធ្នូ ឆ្នាំ២០២០ រដ្ឋបាលក្រុងប៉ោយប៉ែតដឹកនាំដោយលោក គាត់ ហ៊ុល អភិបាលនៃគណៈអភិបាលក្រុង លោកឧត្តមសេនីយ៍ត្រី អ៊ុំ សុផល ស្នងការរងខេត្តបន្ទាយមានជ័យ កម្លាំងនគបាលក្រុងប៉ោយប៉ែត ដឹកនាំដោយលោកវរសេនីយ៍ឯក សៅ សារឿន អធិការនគបាលក្រុង លោកឧកញ្ញ៉ា ឡាច ប៊ុន លីម អគ្គនាយកក្រុមហ៊ុនបុរីមានជ័យ រួមនឹងប្រជាពលរដ្ឋ បាននិមន្តព្រះសង្ឃចំនួន៥៤អង្គ សូត្រមន្ត និងរាប់បាត្រ បួងសួងសុំសេចក្តីសុខដល់អ្នកដំណើរទាំងអស់ឲ្យជៀសផុតពីគ្រោះថ្នាក់នានា ពិសេសគ្រោះថ្នាក់ចរចរណ៍តែម្តង ពីបារមីលោកយាយម៉ៅ ដើមពោធិ៍ ដែលប្រជាពលរដ្ឋខ្មែរមានជំនឿថាពូកែស័ក្កសិទ្ធិ នៅចំណុចអាស្រមលើដងផ្លូវជាតិលេខ៥ ស្ថិតនៅក្នុងភូមិអណ្ដូងថ្មមាស សង្កាត់ផ្សារកណ្ដាល ក្រុងប៉ោយប៉ែត ខេត្តបន្ទាយមានជ័យ។
ពិធីនេះបានប្រារព្ធឡើងតាមកន្លងប្រពៃណីព្រះពុទ្ធសាសនារបស់ខ្មែរ ដែលប្រជាពលរដ្ឋខ្មែរយើងមានជំនឿជឿថា នៅលើលោកនេះ អ្នកខ្លាំងពូកែចែកឋានទៅ ពិតជាបានប្រើប្រាស់ប្រលឹងរបស់ខ្លួន នៅតាមថែរក្សាកូនចៅជំនាន់ក្រោយ ដូច្នេះអាជ្ញាធរ មន្ត្រីរាជការគ្រប់ស្ថាប័ននិងប្រជាពលរដ្ឋ ទាំងទីជិត និងឆ្ងាយ ដែលបានធ្វើដំណើរឆ្លងកាត់តែងតែចូលទៅបួងសួងសុំសេចក្តីសុខ នឹងសុំប្រាថ្នាផ្សេងៗទៀត ដែលខ្លួនចង់បាន ពីបារមីលោកយាយម៉ៅ ដើមពោធិ៍ ដែលប្រជាពលរដ្ឋខ្មែរល្បីនឹងមានជំនឿថាមានបារមីពូកែស័ក្កសិទ្ធនោះ។
សូមបញ្ចាក់ដែរថា ពិធីនេះមិនមែនទើបតែធ្វើនោះទេ ពោលគឺបានប្រារព្ធឡើងតាំងពីលោកឧត្តមសេនីយ៍ត្រី អ៊ុំ សុផល ស្នងការរងខេត្តបន្ទាយមានជ័យ នៅជាអធិការនគរបាលក្រុងប៉ោយប៉ែតម្លេះ ដោយធ្វើជារៀងរាល់ឆ្នាំម្តង នៅបំណាច់ឆ្នាំនិងឈានចូលឆ្នាំថ្មី ឆ្នាំសកល៕