រដ្ឋបាលខេត្តកណ្តាល បើកិច្ចប្រជុំ ពិភាក្សាដោះស្រាយ ផលប៉ះពាល់ ដោយសារគម្រោងហេដ្ឋារចនាសម្ព័ន្ធផ្លូវល្បឿនលឿន ភ្នំពេញ-ខេត្តព្រះសីហនុ
ខេត្តកណ្តាល៖ឯកឧត្ដម គង់ សោភ័ណ្ឌ អភិបាល នៃគណៈអភិបាលខេត្តកណ្ដាល នៅព្រឹកថ្ងៃទី២៤ ខែធ្នូ ឆ្នាំ២០២០ បានដឹកនាំកិច្ចប្រជុំពិភាក្សាដោះស្រាយផលប៉ះពាល់ដោយសារគម្រោងហេដ្ឋារចនាសម្ព័ន្ធផ្លូវល្បឿនលឿន ភ្នំពេញ-ខេត្តព្រះសីហនុ ដែលមានពាក់ព័ន្ធនឹងប្រជាពលរដ្ឋ រស់នៅឃុំឆក់ឈើនាង ស្រុកអង្គស្នួល ខេត្តកណ្តាល។
កិច្ចប្រជុំនេះមានការអញ្ជើញចូលរួមពីលោក នៃ ចារី អភិបាលរងខេត្ត លោកព្រះរាជអាជ្ញារងអមសាលាដំបូងខេត្តកណ្តាល ស្នងការរងនគរបាលខេត្ត មេបញ្ជាការរងកងរាជអាវុធហត្ថខេត្ត ក្រុមការងារគណៈកម្មការអន្តរ ក្រសួង និងលោក លោកស្រី ក្រុមការងារដោះស្រាយផលប៉ះពាល់ និងប្រជាពលរដ្ឋប្រមាណ៥៨គ្រួសារ។
គម្រោងសាងសង់ហេដ្ឋារចនាសម្ព័ន្ធផ្លូវល្បឿនលឿន ភ្នំពេញ-ក្រុងព្រះសីហនុ មានប្រវែង១៨៧ គីឡូម៉ែត្រ ជាគម្រោងដែលផ្តល់អត្ថប្រយោជន៍យ៉ាងច្រើនទាំងផ្នែកសង្គម សេដ្ឋកិច្ច និងនយោបាយ របស់រាជរដ្ឋាភិបាលកម្ពុជា ត្រូវអនុវត្តក្នុងក្របខណ្ឌភាព ជាដៃគូរវាងរដ្ឋ និងឯកជន ដែលរដ្ឋនៅតែជាម្ចាស់កម្មសិទ្ធិលើទីតាំងដីទាំងអស់ដែលបានធ្វើលទ្ធកម្មសម្រាប់គម្រោង ហើយក្រុមហ៊ុនសម្បទានិកនឹងត្រូវប្រគល់ហេដ្ឋារចនាសម្ព័ន្ធទាំង អស់នេះ មកឱ្យជាកម្មសិទ្ធិទាំងស្រុងរបស់រដ្ឋក្រោយផុតរយៈពេលប្រតិបត្តិការ ដែលបានកំណត់ក្នុងកិច្ចព្រមព្រៀងសម្បទាន៕
