ឯកឧត្តម ជាវ តាយ អភិបាលខេត្តកំពត ដឹកនាំកិច្ចប្រជុំ គណៈអភិបាលខេត្ត ប្រចាំខែធ្នូ ឆ្នាំ២០១៩
ខេត្តកំពត៖នៅព្រឹកថ្ងៃទី០២ ខែមករា ឆ្នាំ២០២០នេះ ឯកឧត្តម ជាវ តាយ អភិបាល នៃគណៈអភិបាលខេត្តកំពត បានដឹកនាំកិច្ចប្រជុំគណៈអភិបាលខេត្ត ប្រចាំខែធ្នូ ឆ្នាំ២០១៩ ដែលកិច្ចប្រជុំនេះមានការចូលរួមពី លោក លោកស្រី អភិបាលរងខេត្ត លោក លោកស្រី សមាជិកក្រុមប្រឹក្សាខេត្តមួយចំនួន មន្ទីរអង្គភាពជុំវិញខេត្ត និងអាជ្ញាធរក្រុង ស្រុក សរុបចំនួន៧៦នាក់។
កិច្ចប្រជុំនេះបានផ្ដោតលើរបៀវារៈសំខាន់ៗរួមមាន៖
១-ពិនិត្យពិភាក្សាលើសេចក្ដីព្រាងរបាយការណ៍ប្រចាំខែធ្នូ និងប្រចាំឆ្នាំ២០១៩ ស្ដីពីការអនុវត្តការងាររបស់រដ្ឋបាលខេត្ត។
២-ពិនិត្យពិភាក្សាលើការបែងចែក ប្រាក់រង្វាន់លើកទឹកចិត្តជូនមន្ត្រីរាជការប្រចាំខែធ្នូឆ្នាំ២០១៩។
៣-របាយការណ៍លទ្ធផលនៃការតាមដាន ត្រួតពិនិត្យនិងវាយតម្លៃការអនុវត្តគម្រោងកម្មវិធីវិនិយោគបីឆ្នាំរំកិលខេត្តឆ្នាំ២០១៩។
៤-ពិនិត្យនិងផ្ដល់យោបល់ លើសេចក្ដីព្រាងកម្មវិធីវិនិយោគបីឆ្នាំរំកិលខេត្ត (២០២០-២០២២ )។
មានប្រសាសន៍នៅក្នុងកិច្ចប្រជុំ ឯកឧត្តម ជាវ តាយអភិបាលខេត្ត បានធ្វើការវាយម្លៃខ្ពស់ចំពោះលទ្ធផលការងារដែលរដ្ឋបាលខេត្តកំពត សម្រេចបាន នារយះពេលពេញមួយឆ្នាំ២០១៩ ដែលទើបតែឆ្លងផុតទៅថ្មីៗនេះ ហើយឯកឧត្តមអភិបាលខេត្ត បានធ្វើការកត់សម្គាល់លើកឡើង ក្នុងកិច្ចប្រជុំផងដែរ ដោយផ្តោតសំខាន់ទៅលើការងារផ្សេងៗរបស់បងប្អូនប្រជាពលរដ្ឋតាមតំបន់ និងភូមិសាស្ត្រ ដូចជាការបង្កបង្កើនផល របស់ប្រជាពលរដ្ឋ ការងារអភិវឌ្ឍន៍មូលដ្ឋាន និងការងារបម្រើសេវារដ្ឋបាល គឺតម្រូវឱ្យអាជ្ញាធរសហការគ្នា ដើម្បីបម្រើផលប្រយោជន៍ជូនប្រជាពលរដ្ឋឱ្យមានជីវភាពកាន់តែរីកចម្រើននិងល្អប្រសើរ។
ឯកឧត្តម ជាវ តាយ អភិបាលខេត្តក៏បានលើកឡើងទៀតថា យើងទាំងអស់គ្នា ជាថ្នាក់ដឹកនាំ មន្ត្រីរាជការ កងកម្លាំងប្រដាប់អាវុធ រួមនិងប្រជាពលរដ្ឋ ត្រូវតែរួមសាមគ្គីគ្នាថែរក្សាឲ្យបានដាច់ខាតនូវតម្លៃសុខសន្តិភាពនេះឲ្យបានគង់វង្សយូរអង្វែងតរៀងទៅ៕