រថយន្តដឹកទឹកថយក្រោយ មិនប្រយ័ត្ន បណ្តាលឲ្យកិនម៉ូតូ និងមនុស្ស ស្លាប់ស្ត្រីម្នាក់ ក្មេងតូចរួមដំណើរជាមួយរងរបួសស្រាល
ខេត្តកំពង់ស្ពឺ៖ជិះម៉ូតូ១គ្រឿងឈប់នៅក្រោយរថយន្តពេល រថយន្តដឹកទឹកធ្វើផ្លូវថយមកក្រោយមើលមិនឃើញបណ្តាលឲ្យកិនស្លាប់ស្រ្តីម្នាក់ភ្លាមៗនៅកន្លែងកើតហេតុ ចំណែកក្មេងតូចអាយុ៧ឆ្នាំ រួចផុតពីសេចក្តីស្លាប់របួសស្រាល។
ហេតុការណ៍គ្រោះថ្នាក់ចរាចរខាងលើនេះ បានកើតឡើងកាលពីវេលាម៉ោង ១០និង៣៥នាទីព្រឹកថ្ងៃទី០១ ខែធ្នូ ឆ្នាំ២០២០ នៅចំណុចផ្លូវលំ លេខ១៤២ ស្ថិតក្នុងភូមិរស្មី ឃុំរស្មីសាមគ្គី ស្រុកឱរ៉ាល់ ខេត្តកំពង់ស្ពឺ។
បើតាមលោកអធិការនគរបាលស្រុកឱរ៉ាល់ទទួលផែនចរាចរណ៌ បានឲ្យដឹងថា ករណីគ្រោះថ្នាក់ចរាចរណ៍បានកើតឡើងរវាងរថយន្តស៊ីទែនដឹកទឹកស្រោចផ្លូវ បានថយក្រោយកិនម៉ូតូបណ្តាលឲ្យមនុស្សដួលចំកង់ក្រោយរថយន្តបណ្តាលឲ្យស្លាប់មនុស្ស០១នាក់។
សមត្ថកិច្ចបានបញ្ជាក់ថា នៅមុនពេលកើតហេតុមានរថយន្ត របស់ក្រុមស្ថាបនាផ្លូវថ្នល់០១គ្រឿងម៉ាកហ៊ីណូ ពណ៍សរ ពាក់ស្លាកលេខ ភ្នំពេញ 3E-2250 បើកបរដោយជនស្គាល់អត្តសញ្ញាណ (បានរត់គេចខ្លួនបាត់ក្រោយកើតហេតុ) និងម៉ូតូ០១គ្រឿងម៉ាកហុងដាវ៉េវអាល់ហ្វា ពណ៍ក្រហម ពាក់ស្លាកលេខ ព្រៃវែង 1T-8591បើកបរដោយឈ្មោះ ឡោម ចន្ដា ភេទស្រី អាយុ៣០ឆ្នាំ ឌុបក្មួយឈ្មោះ សៀក ករុណា ភេទស្រី អាយុ០៧ឆ្នាំ ទាំង០២នាក់រស់នៅភូមិអូរផ្តៅ ឃុំរស្មីសាមគ្គី ស្រុកឱរ៉ាល់ ខេត្តកំពង់ស្ពឺ ក្នុងទិសដៅស្របទិសគ្នាពីកើតទៅលិច (រថយន្តបើកពីមុខម៉ូតូ) លុះដល់ចំណុចកើតហេតុស្រាប់តែរថយន្តបានឈប់រួចថយក្រោយ ភ្លាមនោះម៉ូតូគេចមិនរួច បណ្ដាលឲ្យកិនស្រ្តីខាងលើស្លាប់ភ្លាមៗ នៅក្រោមរថយន្តយ៉ាងអាណោចអាធ័ម។
ក្រោយកើតហេតុ សមត្ថកិច្ចជំនាញបានសហការជាមួយកម្លាំងប៉ុស្តិ៍ បានចុះធ្វើការវាស់វែងរួចយកវត្ថុតាងទាំង០២ យកមករក្សាទុកនៅអធិការរដ្ឋាននគរបាលស្រុកឱរ៉ាល់ ដើម្បីរងចាំការដោះស្រាយតាមនិតិវិធី។ចំណែកសពសមត្ថកិច្ចបានប្រគល់ឲ្យសាច់ញាតិយកទៅធ្វើបុណ្យ តាមប្រពៃណី៕
