Mon,14 December 2020 (Time 07:16 AM)
ដោយ ៖ ឆន្ទៈកូនខ្មែរ (ចំនួនអ្នកអាន: 316នាក់)

ខេត្តបាត់ដំបង៖កម្លាំងការិយាល័​យព្រហ្មទណ្ឌកម្រិតស្រាល សហការជាមួយកម្លាំង ក្រុមអ​ន្តរាគមន៍ បង្ការ បង្ក្រាបនិងកម្លាំងនគរបាល​ក្រុងបាត់ដំបង បានចុះប្រតិបត្តិការបង្ក្រា​បទីតាំងអិន​ធឺណែត​(internet)បង្កប់ ល្បែងស៊ីសងខុសច្បាប់ចំនួនពី​រកន្លែងក្នុងបទល្មើសជាក់ស្តែង។

លោកវរសេនីយ៍ឯក ឈឿង គឹមសុង នាយការិយាល័យព្រហ្មទណ្ឌកម្រិតស្រាល បានអោយដឹងថា ដោយអនុវត្តតាមបទបញ្ជារបស់លោកឧត្តមសេនីយ៍ទោ សាត គឹមសាន ស្នងការនៃស្នងការដ្ឋាន​នគរបាលខេត្តបាត់ដំបង និងដោយបានការអនុញ្ញាតពីឯ​កឧត្តមគឺ ប៊ុណ្ណា រ៉ា ព្រះរាជ​អាជ្ញាអ​មសាលា​ដំបូងខេត្តផងនោះ ជាក់ស្តែងនៅ​រសៀលថ្ងៃទី១៣ ខែធ្នូ ឆ្នាំ២០២០ លោកបានដឹកនាំកម្លាំងនគ​របាលក្នុងផែន សហការជាមួយកម្លាំងក្រុមអន្តរាគមន៍ បង្ការ បង្ក្រាប និងកម្លាំងនគរបាល ក្រុងបា​ត់ដំបង ដែលមានលោកវរសេនីយ៍ឯក ឆាង វណ្ណឆៃ ជាអធិការ បានចុះបង្ក្រាប​ទីតាំង អិនធឺណែត (Inthernet) ដែលសង្ស័យថា​មានបង្កប់ល្បែងស៊ីសងខុសច្បាប់(ភ្នាល់បាល់តាមប្រព័ន្ធអិនធឺណែត​) ចំនួន០២ទីតាំងស្ថិតនៅក្នុងក្រុមទី០៨ ភូមិកម្មករ សង្កាត់ស្វាយប៉ោ ក្រុងបាត់ដំបង។

ជាមួយកិច្ចប្រតិបត្តិការនេះ​ដែរសមត្ថកិច្ចជំនាញបានធ្វើការនាំខ្លួនអ្នកពាក់ព័ន្ធ ប្រុសស្រីចំនួន​១២នាក់ និងរឹបអូសវត្ថុមួយចំនួនធំផងដែរ បញ្ជូនទៅកាន់ស្នងការដ្ឋាន ដើម្បីធ្វើការសាកសួរ។

សមត្ថកិច្ចបញ្ជាក់បន្ថែមថា ទីតាំងដែលបានបើកប្រកបមុខរបរអិនធឺណែត (Internet )ដែលមាន ច្បាប់​អនុញ្ញាត​ត្រឹមត្រូវ តែមានលួច​លាក់បង្ក​ប់នូវស​កម្មភាព ល្បែងស៊ីសង​ដោយខុសច្បាប់នោះ សមត្ថកិច្ចនឹង​ចាត់វិធានការបង្រ្កាបនិងបញ្ជូនទៅតុលាការ ដើម្បីផ្តន្ទាទោសតាមផ្លូវច្បាប់ ដូច្នេះម្ចាស់​ទីតាំងដែលកំ​ពុងប្រកបមុខរបរនេះ សូមកុំប្រព្រឹត្ត​សកម្មភាពល្មើស ច្បាប់ឱ្យសោះ​។

ហើយចំពោះមុខ ជនសង្ស័យពាក់ព័ន្ធប្រុសស្រីទាំង១២នាក់រួមនឹងវត្ថុតាង រហូតមកដល់ពេល​នេះត្រូវបានការិ​យាល័យជំនាញ​កំពុងកសាងសំណុំ​រឿង ដើម្បីបញ្ជូនទៅ​កាន់តុលាការចា​ត់ការតាម​នីតិ​វិធី៕