រដ្ឋមន្ត្រីក្រសួងព័ត៌មាន៖សារព័ត៌មាន មានតួនាទីសំខាន់ណាស់ សម្រាប់ជាស្ពានចម្លងព័ត៌មានពីពលរដ្ឋ ទៅថ្នាក់ដឹកនាំ និងពីថ្នាក់ដឹកនាំ មកប្រជាពលរដ្ឋវិញ
ខេត្តកែប៖ឯកឧត្តម ខៀវ កញារីទ្ធ រដ្ឋមន្ត្រីក្រសួងព័ត៌មាន បានណែនាំ ក៏ដូចជាក្រើនរំលឹកដល់ប្រធានមន្ទីរព័ត៌ទាំងអស់ថា ការងារព័ត៌មាន២៤ម៉ោងលើ២៤ម៉ោង និង៧ថ្ងៃក្នុង១សប្តាហ៍ គ្មានពេលត្រូវឈប់សម្រាកទេ។ដូច្នេះមន្ត្រី និងប្រធានមន្ទីរព័ត៌មាន ត្រូវខិតខំប្រឹងប្រែង និងយកចិត្តទុកដាក់ឲ្យកាន់តែខ្លាំងខ្លាបន្ថែមទៀត។
ជាងនេះទៅទៀតឯកឧត្តមបញ្ជាក់ថា សារព័ត៌មាន មានតួនាទីសំខាន់ណាស់សម្រាប់ជាស្ពានចម្លងព័ត៌មានពីពលរដ្ឋ ទៅថ្នាក់ដឹកនាំ និងពីថ្នាក់ដឹកនាំ មកប្រជាពលរដ្ឋវិញ អំពីហេតុការណ៍ ស្ថានភាពសង្គមនៅតាមមូលដ្ឋាននានា សេចក្តីត្រូវការ និងការស្នើសុំជាដើម។
ឯកឧត្តមរដ្ឋមន្ត្រីក្រសួងព័ត៌មាន បញ្ជាក់ទៀតថា ដើម្បីឲ្យការងារទាំងនេះប្រព្រឹត្តទៅរលូន លឿនរហ័ស និងមានប្រសិទ្ធភាពខ្ពស់ ប្រធានមន្ទីរ ត្រូវអនុវត្តនូវចំណុចសំខាន់ចំនួន៣៖
ទី១) ប្រធានមន្ទីរត្រូវរក្សាទំនាក់ទំនងល្អជាមួយស្ថាប័នរដ្ឋ និងឯកជន ក្រុមហ៊ុន មន្ទីរនានាជុំវិញខេត្តរបស់ខ្លួនឲ្យបានល្អ។
ទី២) ប្រធានមន្ទីរត្រូវកំណត់រៀបចំការប្រជុំជាទៀតទាត់ជាមួយនឹងមន្ត្រីក្រោមឧវាទ ឲ្យបានញឹកញាប់ ហើយបើអាចត្រូវធ្វើការប្រជុំរាល់ព្រឹកដើម្បីរៀបចំផែនការ ថាតើត្រូវធ្វើអ្វីខ្លះ? តើមានរឿង ឬព្រឹត្តិការណ៍អ្វី ដែលបាននិងកំពុងកើតឡើងក្នុងខេត្ត។
ទី៣) ប្រធានមន្ទីរត្រូវចេះប្រមូលផ្តុំ សាមគ្គីគ្នា ពិសេសត្រូវចេះគ្រប់គ្រងចាត់ចែង មន្ត្រីធ្វើការឲ្យបានត្រឹមត្រូវតាមជំនាញរបស់ពួកគេ ដោយមិនចាំបាច់ទាល់តែប្រធានចេះគ្រប់សព្វនោះទេ។
ឯកឧត្តម រដ្ឋមន្ត្រីក្រសួងព័ត៌មាន មានប្រសាសន៍ណែនាំបែបនេះក្នុងឱកាសដែលឯកឧត្តមបានអញ្ជើញជាអធិបតីក្នុងពិធីប្រកាសចូលកាន់មុខតំណែងជាប្រធានមន្ទីរព័ត៌មានថ្មីខេត្តកែប នៅព្រឹកថ្ងៃទី២១ ខែមករា ឆ្នាំ២០២០ ដោយលោក រស់ ឧត្តុង្គ ត្រូវបានប្រកាសចូលកាន់មុខតំណែងជំនួសលោក លៀវ ស៊ុនសារី ដែលត្រូវចូលនិវត្តន៍ និងត្រូវតែងតាំងជាទីប្រឹក្សាក្រសួងព័ត៌មាន។
ក្នុងពិធីប្រកាសចូលកាន់តំណែងនេះ បានធ្វើឡើងក្រោមវត្តមានចូលរួមពីឯកឧត្តម សំ សារីម ប្រធានក្រុមប្រឹក្សាខេត្ត និងឯកឧត្តម កែន សត្ថា អភិបាលនៃគណៈអភិបាលខេត្តកែប ព្រមទាំងសមាជិកក្រុមប្រឹក្សាខេត្ត,មន្ត្រីរាជការក្រោមឱវាទ,កងកម្លាំងប្រដាប់អាវុធទាំង៣ប្រភេទប្រមាណជាង២០០នាក់ផងដែរ។
លោក រស់ ឧត្តុង្គ ដែលទើបទទួលការតែងតាំងថ្មី បានឡើងប្តេជ្ញាចិត្តដឹកនាំស្ថានប័នមួយនេះ ឲ្យមានប្រសិទ្ធភាពខ្ពស់ មានសាមគ្គីភាពផ្ទៃក្នុងល្អ សហការជាមួយជំនាញនានា និងអាជ្ញាធរខេត្ត នឹងស្មោះត្រង់នឹងអង្គព្រះមហាក្សត្រ ចូលរួមបម្រើរដ្ឋាភិបាល ក៏ដូចជាប្រជាពលរដ្ឋ ឲ្យអស់ពីចិត្តពីថ្លើមផងដែរ។
ទន្ទឹមនោះដែរឯកឧត្តម កែវ សត្ថា បានកោតសរសើរ និងវាយតម្លៃខ្ពស់ចំពោះលទ្ធផលការងារ ដែលថ្នាក់ដឹកនាំមន្ត្រីរាជការគ្រប់លំដាប់ថ្នាក់ នៃមន្ទីរព័ត៌មានខេត្ត ព្រមទាំងអាជ្ញាធរ សមត្ថកិច្ចពាក់ព័ន្ធទាំងអស់ ក្នុងខេត្តកែប ដែលរយៈពេលកន្លងមក បានរួមសហការគ្នាខិតខំបំពេញភារកិច្ច បម្រើរដ្ឋ និងប្រជាពលរដ្ឋ ទទួលបានលទ្ធផលល្អប្រសើរ។
ឯកឧត្តមបញ្ជាក់ថា ការតែងតាំងផ្លាស់ប្ដូរមុខតំណែងមន្ត្រីរាជការសាធារណៈ ជាការងារធម្មតាធ្វើឡើង ដើម្បីផ្លាស់ប្ដូរបទពិសោធន៍ នៃមុខតំណែងផ្សេងទៀតរបស់ស្ថាប័នរដ្ឋ តាមតម្រូវការចាំបាច់ ស្របតាមលិខិតបទដ្ឋានគតិយុត្តជាធរមាន ដើម្បីលើកកម្ពស់សមត្ថភាពការងារ និងការដឹកនាំគ្រប់គ្រង សំដៅធ្វើឲ្យមានកំណែទម្រង់ ក្នុងប្រព័ន្ធការងារឲ្យកាន់តែប្រសើរឡើង ស្របតាមគោលនយោបាយរបស់រាជរដ្ឋាភិបាល៕
