អធិការនគរបាលស្រុកថ្មពួក ដឹកនាំកម្លាំងចុះណែនាំដល់អាជីវករ ហាមដាក់តាំងលក់គ្រឿងផ្ទុះ ជាដាច់ខាត ក្នុងឱកាសបុណ្យចូលឆ្នាំចិន វៀតណាម
ខេត្តបន្ទាយមានជ័យ៖ដើម្បីធានាក្នុងការការពារសន្តិសុខសុវត្ថិភាព និងសណ្ដាប់ធ្នាប់ជូនប្រជាពលរដ្ឋ នៅក្នុងឱកាសបុណ្យប្រពៃណីចិន វៀតណាមចំនួន៣ថ្ងៃចាប់ពីថ្ងៃទី២៥.២៦.២៧ ខែមករា ឆ្នាំ២០២០ខាងមុននេះ លោក វរសេនីយ៍ទោ សៅ សារឿន អធិការនគរបាលស្រុកថ្មពួក បានដឹកនាំកម្លាំងចុះផ្សព្វផ្សាយអប់រំ ណែនាំដល់ក្រុមអាជីវករលក់គ្រឿងសម្ភារៈ សែន ចិន វៀតណាមហាមដាក់តាំងលក់គ្រឿងផ្ទុះដាច់ខាត។
លោកវរសេនីយ៍ទោ សៅ សារឿន អធិការនគរបាលស្រុកថ្មពួកបានមានប្រសាសន៍ថា ការចុះផ្សព្វផ្សាយអប់រំ ណែនាំដល់អាជីវករលក់គ្រឿងសម្ភារៈសែន ចិន វៀតណាមហាមដាក់តាំងលក់គ្រឿងផ្ទុះនេះ ដោយអនុវត្តតាមប្រសាសន៍ណែនាំរបស់លោកឧត្តមសេនីយ៍ទោ អាត់ ខែម ស្នងការដ្ឋាននគរបាលខេត្តបន្ទាយមានជ័យ លោកបានដឹកនាំកម្លាំងជំនាញ និងមេប៉ុស្តិ៍រដ្ឋបាល ចុះផ្សព្វផ្សាយអប់រំណែនាំដល់អាជីវករនៅចំណុចផ្សារ៣កន្លែង មានផ្សារចាស់ ផ្សារបន្ទាយ ឃុំថ្មពួក និងផ្សារថ្មី ឃុំគំរូ ស្រុកថ្មពួក ខេត្តបន្ទាហមានជ័យ កាលពីព្រឹកថ្ងៃទី២០ ខែមករា ឆ្នាំ២០២០។
លោកវរសេនីយ៍ទោ សៅ សារឿន បានបញ្ជាក់ថា នាពេលកន្លងទៅថ្មីៗនេះ លោឧត្ដមសេនីយទោ អាត់ ខែម បានមានប្រសាសន៍ក្នុងកិច្ចប្រជុំនៅសាលប្រជុំស្នងការការខេត្ត ដោយលោកបានបញ្ជាដល់បណ្ដាអធិការ ក្រុង ស្រុកទាំង៩ក្នុងខេត្តបន្ទាយមានជ័យ ធ្វើការជូនដំណឹងដល់បងប្អូនប្រជាពលរដ្ឋ ក្នុងឱកាសចូលឆ្នាំប្រពៃណីជាតិ ចិន វៀតណាម កូរ៉េ នៅពេលខាងមុខនេះ ហាមលេងផាវ រំសេវ កាំជ្រួចគ្រប់ប្រភេទពោលគឺគ្រឿងផ្ទុះតែម្តង ដើម្បីធានាក្នុងការការពារសន្តិសុខសុវត្ថិភាព និងសណ្ដាប់ធ្នាប់។ក្នុងនោះលោកឧត្ដមសេនីយទោ អាត់ ខែម បានបញ្ជាក់ពីអំពីផលប៉ះពាល់នៃរំសេវនិងកាំជ្រួចដែលជាអាវុធមួយប្រើខុសអាចធ្វើឲ្យមនុស្សស្លាប់បាន ដូច្នេះមន្ត្រីនគរបាលជំនាញ ត្រូវចុះធ្វើការសព្វផ្សាយដល់ប្រជាពលរដ្ឋ មិនអនុញ្ញាតឲ្យលេងនៅតាមទីសាធារណៈ ដែលនាំឲ្យបាត់បង់សណ្ដាប់ធ្នាប់និងមានការរំខានដល់អ្នកដទៃផងដែរ។
លោកបញ្ជាក់ឲ្យដឹងទៀតថា សេចក្តីជូនដំណឹងនេះតាមច្បាប់ស្ដីពីការគ្រប់គ្រងអាវុធជាតិផ្ទុះ និងគ្រាប់រំសេវដែលប្រកាសឱ្យប្រើដោយព្រះរាជក្រមលេខ ន ស រកម /០៦០៥/០១៦ ចុះថ្ងៃទី១ ខែមិថុនា ឆ្នាំ១០១៥។សេចក្តីលេខ០១ ៤០០ ចុះថ្ងៃទី១៧ ខែមករា ឆ្នាំ២០២០ ស្តីពីវិធានការការប្រើប្រាស់នឹងផ្ទុករំសេវជាតិផ្ទុះទុកថាវគ្រប់ប្រភេទរបស់អគ្គស្នងការនគរបាលជាតិ ដើម្បីធានាក្នុងការការពារសន្តិសុខសុវត្ថិភាព និងសណ្ដាប់ធ្នាប់ជូនប្រជាពលរដ្ឋនៅក្នុងឱកាសបុណ្យប្រពៃណីចិន វៀតណាម៕
