បុរសម្នាក់ជិះម៉ូតូទៅលេងផ្ទះសង្សារ ចោរធាក់ប្លន់យកម៉ូតូស្កុបពីសេរី២០១៩ទៅបាត់ រួមទាំងកាបូបលុយ
រាជធានីភ្នំពេញ៖ចេញពីផឹកស៊ីនៅផ្ទះជួលជួបជុំមិត្តភ័ក្រ ជិះម៉ូតូគោលបំណងឆ្ពោះទៅផ្ទះមិត្តស្រី ត្រូវបានជនសង្ស័ធាក់ផ្តួលដណ្តើមយកម៉ូតូទៅបាត់ អស់ទាំងកាបូបលុយ ឯកសារម៉ូតូ អត្តសញ្ញាណប័ណ្ណ ដេកដួលសន្លប់ តាមចិញ្ចើមផ្លូវតាំងពីយប់ថ្ងៃទី១៧ ខែមករា ឆ្នាំ២០២០ នៅតាមផ្លូវបេតុងលេខ១ តាកន ភូមិព្រៃជីសាក់ សង្កាត់ចោមចៅ៣ ខណ្ឌពោធិសែនជ័យ រហូតដល់ព្រឹកថ្ងៃទី១៨ ខែមករាទើបពលរដ្ឋប្រទះឃើញ ដេកននៀលចិញ្ចើមផ្លូវ ដាស់សាកសួរទើបដឹងថា គេយកម៉ូតូ កាបូបលុយបាត់អស់ ផ្អើលឆោឡោរាយការណ៍ទៅសមត្ថកិច្ច ចុះទៅពិនិត្យមើលជាក់ស្តែង។
តាមការសាកសួរ បុរសរងគ្រោះមានឈ្មោះ យឹម វិទូ ភេទប្រុស អាយុ៣២ឆ្នាំ មុខរបរមេជាងសំណង់ ស្នាក់នៅផ្ទះជួល ភូមិត្រពាំងជ្រៃ សង្កាត់កាកាបទី២ ខណ្ឌពោធិសែនជ័យ មានស្រុកកំណើត ក្រុងព្រៃវែង ខេត្តព្រៃវែង ជនរងគ្រោះក្នុងសភាពរបួសឆ្អឹងជំនី ក្រោមក្លៀកឆ្វេងរបួសដៃជើង។
តាមបុរសរងគ្រោះបានឲ្យដឹងថា មុនកើតហេតុ នៅយប់ថ្ងៃទី១៧ ខែមករា ខ្លួនជួបជុំមិត្តភ័ក្រផឹកស៊ី លុះដល់វេលាម៉ោង១១យប់ ថ្ងៃដដែល ជិះម៉ូតូស្កុបពីពណ៌ស សេរី២០១៩ មិនចាំស្លាកលេខ គោលបំណងជិះឆ្ពោះទៅផ្ទះមិត្តស្រី នៅផ្សារអង្គតាសោម ស្រុកត្រាំកក់ ខេត្តតាកែវ ដោយជិះតាមផ្លូវបេតុង ភូមិព្រៃទា ចេញមកដល់ផ្លូវបេតុង ភូមិព្រៃជីសាក់ សង្កាត់ចោមចៅ៣ មានជនមួយក្រុមជិះម៉ូតូ មកធាក់ បណ្តាលឲ្យដួល ហើយដណ្តើមយកម៉ូតូ កាបូបលុយ ហើយគេចទៅបាត់ ដោយឈឺខ្លួនពេក ម្យ៉ាងស្រវឹងស្រើងៗផង ដេកដួលចិញ្ចើមផ្លូវ ចំកន្លែងស្ងាត់លង់លក់ រហូតដល់ព្រឹកថ្ងៃទី១៨ ខែមករា ដឹងខ្លួន។
តាមប្រជាពលរដ្ឋបានឲ្យដឹងថា ឃើញបុរសរងគ្រោះ ដេកចិញ្ចើមផ្លូវមិនងើបសោះ មិនហ៊ានទៅដាស់ ស្មានតែមនុស្សអនាថា ដើរដេកតាមផ្លូវរហូតដល់វេលាម៉ោង៨និង៣០នាទីព្រឹកថ្ងៃទី១៨ ខែមករា ឆ្នាំ២០២០ទៅដាស់ ទើបដឹងថា មានអ្នកយកម៉ូតូរបស់គាត់ផ្អើលឆោឡោ។
ក្រោយពីប្រទះឃើញជនរងគ្រោះ ប្រជាពលរដ្ឋជួយនាំមកអង្គុយមុខផ្ទះឲ្យហូបទឹក ទឹកក្រូច លុបលាងមុខ ដើម្បីឲ្យស្វាងរាយការណ៍ទៅសមត្ថកិច្ច ចុះទៅពិនិត្យមើលសាកសួរជាក់ស្តែង តែជនរងគ្រោះក្នុងសភាពក្រំខ្លួន ឈឺចុកចាប់ ទើបសមត្ថកិច្ច ប្រាប់ឲ្យទៅផ្ទះ ទៅពេទ្យសិនរងចាំឲ្យស្រួលខ្លួន ចាំទៅដាក់ពាក្យបណ្តឹងនៅប៉ុស្តិ៍ប៉ូលិស៕
