មន្ទីរកសិកម្មរុក្ខាប្រមាញ់ និងនេសាទខេត្តសៀមរាប បើកសន្និបាទបូកសរុបលទ្ធផលការងារឆ្នាំ២០១៩ និងលើកទិសដៅការងារឆ្នាំ២០២០
ខេត្តសៀមរាប៖នាព្រឹកថ្ងៃទី១៦ ខែមករា ឆ្នាំ២០២០ ឯកឧត្តមបណ្ឌិត ណៅ ធួក រដ្ឋលេខាធិការក្រសួងកសិកម្មរុក្ខាប្រមាញ់ និងនេសាទ តំណាងដ៏ខ្ពង់ខ្ពស់ឯកឧត្តម វេង សុខុន រដ្ឋមន្ត្រីក្រសួងកសិកម្មរុក្ខាប្រមាញ់ និងនេសាទ ឯកឧត្តម កុយ សង សមាជិកក្រុប្រឹក្សាខេត្ត លោក ង៉ាន់ ភិរុណ អភិបាលរងនៃគណៈអភិបាលខេត្តសៀមរាប បានអញ្ជើញជាអធិបតីក្នុងពិធីបើកសន្និបាទបូកសរុបលទ្ធផលការងារឆ្នាំ២០១៩ និងលើកទិសដៅការងារឆ្នាំ២០២០ នៅមន្ទីរកសិកម្មរុក្ខាប្រមាញ់ និងនេសាទខេត្តសៀមរាប ដោយមានការអញ្ជើញចូលរួម ពីសំណាក់អស់លោក លោកស្រី ជាថ្នាក់ដឹកនាំការិយាល័យ និង មន្ត្រី ចំណុះមន្ទីរកសិកម្មផងដែរ។
លោក ទា គឹមសុទ្ធ ប្រធានមន្ទីរកសិកម្មរុក្ខាប្រមាញ់ និងនេសាទខេត្ត ដែលបានលើកឡើងពីលទ្ធផលសម្រេចបាន និង បញ្ហាប្រឈមនាពេលអនុវត្តកន្លងមក ព្រមទាំងលើកនូវទិសដៅសម្រាប់អនុវត្តឆ្នាំ២០២០រួចមក។ក្នុងនោះដែរលោក ង៉ាន់ ភិរុណ ក៏បានធ្វើការកោតសសើរ អំពីលទ្ធផលសម្រេចជោគជ័យក្នុងវិស័យកសិកម្ម រុក្ខាប្រមាញ់ និងនេសាទខេត្តក្នុងឆ្នាំ២០១៩កន្លងទៅនេះ គឺជាការខិតខំប្រឹងប្រែងរបស់ថ្នាក់ដឹកនាំ និងមន្រ្តីរាជការទាំងអស់ នៃមន្ទីរកសិកម្ម រុក្ខាប្រមាញ់ និងនេសាទខេត្ត ក្នុងកិច្ចសហការសម្របសម្រួល និងបំពេញការងារ ព្រមទាំងការលះបង់កម្លាំងកាយចិត្តនានា ដែលកន្លងមក មន្ទីរ បានចុះផ្សព្វផ្សាយ អប់រំ និងការកំណត់ឲ្យបាននូវមុខសញ្ញាជនល្មើសក្នុងការងាររដ្ឋបាលព្រៃឈើ និងជលផល ដែលមានការចូលរួមសហការល្អ ជាមួយសមត្ថកិច្ចពាក់ព័ន្ធ រួមទាំងអាជ្ញាធរដែនដី ក្នុងការទប់ស្កាត់ និងបង្ក្រាបនូវបទល្មើសជលផល ព្រៃឈើ ទាំងក្នុងតំបន់អភិរក្ស តំបន់ព្រៃលិចទឹក ក៏ដូចជាតំបន់ ដែលមានសក្តានុពលធនធានធម្មជាតិផ្សេងៗទៀត ទើបធ្វើឲ្យយើងសម្រេចបាននូវសមិទ្ធផលជាច្រើន ក្នុងរយៈពេលមួយឆ្នាំកន្លងមកនេះ។
នាឱកាសនោះឯកឧត្តមបណ្ឌិត ណៅ ធួក ក៏បានធ្វើការវាយតម្លៃខ្ពស់ចំពោះលទ្ធផល ដែល មន្ទីរកសិកម្ម រុក្ខាប្រមាញ់ និងនេសាទខេត្តសៀមរាបអនុវត្តបានក្នុងឆ្នាំ២០១៩មកនេះ។ឯកឧត្តមក៏បានលើកឡងពីផលិតភាពកសិកម្ម ដើមី្បបម្រើនូវតម្រូវការក្នុងប្រទេស និង ការនាំចេញ ព្រមទាំងធានានូវគុណភាព សុវត្ថិភាព តាមរយៈកាលលើកកម្ពស់ការផលិតស្បៀង និងបង្កើនតម្លៃបន្ថែម ក្នុងការពង្រីកការប្រកួតប្រជែងនៅទីផ្សារ ព្រមទាំងរក្សាតុល្យភាពនាការប្រើប្រាស់ដីកសិកម្ម និង ធានាការគ្រប់ គ្រងធនធានធម្មជាតិ ប្រកបទៅដោយនិរន្តរភាព។
ឯកឧត្តមរដ្ឋលេខាធិការក៏បានបញ្ជាក់ថា បច្ចុប្បន្ននេះ វិស័យកសិកម្មកម្ពុជា បានកំពុងមានសក្តានុពល កាលានុវត្តភាព និង ឧត្តមភាព សម្រាប់ទីផ្សារផលិតផលកសិកម្ម និង វត្ថុធាតុដើមនៅក្នុងតំបន់ និងនៅលើពិភពលោក ដោយប្រទេសកម្ពុជា បានក្លាយជាប្រទេសមួយ ក្នុងចំណោមប្រទេសនាំចេញអង្ករធំៗទាំង១០ ។
ឯកឧត្តមបន្តទៀតថា បច្ចុប្បន្ននេះដើម្បីឲ្យវិស័យកសិកម្មនេះមានការរីកចម្រើនថែមមួយកម្រិតទៀត រាជរដ្ឋាភិបាលកម្ពុជាបានដាក់ចេញនូវគោលនយោបាយ និងចក្ខុវិស័យក្នុងការធ្វើទំនើបភាវូបនីយកម្មផលិតកម្មកសិកម្មឲ្យមានលក្ខណៈប្រកួតប្រជែង បរិយាប័ន្ន ធន់នឹងការប្រែប្រួលអាកាសធាតុ និងមាននិរន្តរភាព ដែលនាំដល់ កំណើនប្រាក់ចំណូល វិបុលភាព និងសុខុមាលភាពជូនប្រជាជន។
ជារួមគោលដៅ អភិវឌ្ឍន៍វិស័យកសិកម្មគឺត្រូវបង្កើនការនាំចេញកសិផល ប្រកបដោយគុណភាព និងសុវត្ថិភាព តាមរយៈការលើកកម្ពស់ផលិតភាពផលិតកម្ម បង្កើនតម្លៃបន្ថែម និងពង្រីកការ ប្រកួតប្រជែងទីផ្សារ ព្រមទាំងរក្សាបានតុល្យភាពនៃការប្រើប្រាស់ ដីកសិកម្មប្រកប ដោយនិរន្តរភាព៕
