ចាប់ខ្លួនជនជាតិវៀតណាមម្នាក់ ដែលបង្ហោះលក់ផលិតផល និងឧបករណ៍នេសាទខុសច្បាប់ នៅតាមបណ្ដាញសង្គម Facebook និងYoutube
ខេត្តកណ្ដាល៖ជនជាតិវៀតណាមម្នាក់ ដែលបង្ហោះលក់ផលិតផល និងឧបករណ៍នេសាទខុសច្បាប់(ដុំឆក់ត្រី) នៅតាមបណ្ដាញសង្គម Facebook និងYoutubeត្រូវបានកម្លាំងនាយកដ្ឋានប្រឆាំងបទល្មើសបច្ចេកវិទ្យា នៃអគ្គស្នងការដ្ឋាននគរបាលជាតិ និងមានការសម្របសម្រួលនិតិវិធីពីលោក ទិន សុចិត្រា ព្រះរាជអាជ្ញារង នៃអយ្យការអមសាលាដំបូងខេត្តកណ្ដាល ចាប់ខ្លួននៅចំណុចមុខផ្ទះជួលគ្មានលេខ ផ្លូវជាតិលេខ០១ ភូមិស្ដៅកន្លែង ឃុំដីឥដ្ឋ ស្រុកកៀនស្វាយ ខេត្តកណ្ដាល បញ្ជូនទៅកាន់សាលាដំបូងខេត្តកណ្ដាល នាថ្ងៃទី១៣ ខែមករា ឆ្នាំ២០២០នេះដើម្បីចាត់ការតាមនិតិវិធី។
បើតាមសមត្ថកិច្ចបានឲ្យដឹងថា៖ជនសង្ស័យមានឈ្មោះ ង្វៀន យ៉ាំងតេវ អាយុ៣១ឆ្នាំ។ក្រោយពីឃាត់ខ្លួនកម្លាំងរឹបអូសបានឧបករណ៍ឆក់ត្រីកែច្នៃរួច០៩គ្រឿង។
បើតាមចម្លើយសារភាពរបស់ជនសង្ស័យបានឲ្យដឹងថា ដំបូងឡើយខ្លួនជាជាងជួសជុលម៉ូទ័រ កង្ហារឆ្នាំងដាំបាយ និងធ្វើសោរ បន្ទាប់មកខ្លួនបានទៅរៀន ធ្វើឧបករណ៍ឆក់ត្រី ដោយសារឧបករណ៍នេះកំពុងពេញនិយមក្រោយមកក៏បានចាប់ផ្ដើមផលិតឧបករណ៍ឆក់ត្រី ដែលមានប្រសិទ្ធភាពខ្ពស់ និងផ្សព្វផ្សាយលក់ ដែលកន្លងមកធ្លាប់បានលក់ទៅឲ្យអតិថិជនជាច្រើន រួមមាន ខេត្តកំពង់ចាម រតនគីរី ពោធិ៍សាត់ តាកែវ។ល។ ដោយឲ្យអតិថិជនទាំងនោះ កក់ប្រាក់ពាក់កណ្ដាល នៅពេលគេផលិតរួច គេនឹងបញ្ជូនឧបករណ៍ទាំងនោះ តាមរថយន្តឈ្នួលទៅអតិថិជន។
សូមបញ្ជាក់ផងដែរថា ការប្រើប្រាស់ឧបករណ៍ឆក់ ដើម្បីនេសាទត្រី បែបនេះកំពុងបំផ្លាញនិងបានធ្វើឲ្យបាត់បង់នូវធនធានមច្ឆាជាតិ យ៉ាងធ្ងន់ធ្ងរបំផុត៕