ផឹកស៊ីស្រវឹង វាយកម្មករធ្វើផ្លូវថ្នល់ ប្រជាការពារភូមិ ក្របួចដាក់ខ្នោះបាន២នាក់ នៅពោធិ៍សាត់
ខេត្តពោធិ៍សាត់៖ជនដៃដល់២នាក់ ផឹកស៊ីស្រវឹងវាយកម្មករធ្វើផ្លូវថ្នល់ ត្រូវបានប្រជាការពារភូមិ ក្របួចដាក់ខ្នោះ កាលពីរំលងអធ្រាត្រឈានចូលថ្ងៃពុធ ៧កើត ខែបុស្ស ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី១ ខែមករា ឆ្នាំ២០២០ ស្ថិតក្នុងភូមិទី៤ ឃុំកំពង់លួង ស្រុកក្រគរ ខេត្តពោធិ៍សាត់។
ជនសង្ស័យមានឈ្មោះ សុខ ខា ហៅថា ភេទប្រុស អាយុ៣៤ឆ្នាំ ជនជាតិខ្មែរ បច្ចុប្បន្ន រស់នៅភូមិទី៤ ឃុំកំពង់លួង ស្រុកក្រគរ ខេត្តពោធិ៍សាត់ និងឈ្មោះ សុខ ឌៀក ភេទប្រុស អាយុ២៨ឆ្នាំ ជនជាតិវៀតណាម បច្ចុប្បន្នស្នាក់នៅភូមិទី៤ ឃុំកំពង់លួង ស្រុកក្រគរ ខេត្តពោធិ៍សាត់។អ្នកទាំង២នាក់ជាមុខសញ្ញាក្មេងទំនើង និងប្រើប្រាសសារធាតុញៀនផងដែរ ការធ្វើតេស្កទឹកនោម(វិជ្ជមាន)។
ជនរងគ្រោះដែលត្រូវជនដៃដល់វាយនោះមានឈ្មោះ សៅ នី ភេទប្រុស អាយុ១៨ឆ្នាំ ជនជាតិខ្មែរ មានទីលំនៅភូមិរការ ឃុំសន្រ្ទែ ស្រុកភ្នំក្រវាញ ខេត្តពោធិ៍សាត់ បច្ចុប្បន្នជាកម្មករធ្វើផ្លូវលេខ៥៩ ស្ថិតក្នុងភូមិ.ឃុំកើតហេតុខាងលើ។
បច្ចុប្បន្នជនសង្ស័យ កំពុងស្ថិតនៅក្រោមការសាកសួរបស់អធិការដ្ឋាននគរបាលស្រុកក្រគរ និងកសាងសុំណុំរឿងដើម្បីចាត់តាមនីតិវិធី៕