រដ្ឋបាលខេត្តបន្ទាយមានជ័យ បើកកិច្ចប្រជុំផ្សព្វផ្សាយការពង្រឹងការគ្រប់គ្រង និងការចាត់ចែងមន្ត្រីបុគ្គលិកនៃរដ្ឋបាលក្រុង ស្រុក ខណ្ឌ
ខេត្តបន្ទាយមានជ័យ៖ឯកឧត្តម ខេង ស៊ុម ប្រធានក្រុមប្រឹក្សាខេត្តបន្ទាយមានជ័យ ឯកឧត្តម អ៊ុំ រាត្រី អភិបាលនៃគណ:អភិបាលខេត្តនៅព្រឹកថ្ងៃទី១៦ ខែវិច្ឆិការ ឆ្នាំ២០២០ អញ្ជើញជាអធិបតីក្នុងកិច្ចប្រជុំផ្សព្វផ្សាយការពង្រឹងការគ្រប់គ្រង និងការចាត់ចែងមន្ត្រីបុគ្គលិកនៃរដ្ឋបាលក្រុង ស្រុក ខណ្ឌ។
ពិធីនេះបានប្រព្រឹត្តទៅនៅសាលប្រជុំធំសាលាខេត្ត ដោយមានការអញ្ជើញចូលរួមពីសមាជិកក្រុមប្រឹក្សារខេត្ត មន្ត្រីរដ្ឋបាលខេត្ត ប្រធានក្រុមប្រឹក្សារក្រុង/ស្រុក ទាំង៩ រួមនឹងប្រធានមន្ទីរ ការិយាល័យជុំវិញខេត្តផងដែរ។
ក្នុងកិច្ចប្រជុំនេះគណ:អធិបតីបានលើកយកនូវប្រធានបទការណែនាំរបស់ក្រសួងមហាផ្ទៃ ស្តីពីការធានានិរន្តភាព ការងាររដ្ឋបាលនិងការផ្ដល់សេវាក្នុងដំណើរការរៀបចំរចនាសម្ព័ន្ធថ្មី នៃរដ្ឋបាលក្រុង ស្រុក ខណ្ឌ។ផ្អែកតាមគោលការណ៍ក្រសួងមហាផ្ទៃ បាននាំដល់រដ្ឋបាលរាជធានី ខេត្ត ក្រុង ស្រុក ខណ្ឌ មន្ទីរ ការិយាល័យនិងអង្គភាពជំនាញពាក់ព័ន្ធនានារបស់ក្រសួងស្ថាប័ន ដែលមាននៅក្នុងថ្នាក់ក្រុង ស្រុក ខណ្ឌ ទាំងអស់ឲ្យសហការគ្នាធ្វើការកត់ត្រានូវការផ្ទេរ និងការទទួលយកសិទ្ធិកាតព្វកិច្ច និងការទទួលខុសត្រូវ ទាំងអស់លើកិច្ចការនិងឯកសាររួមទាំងកម្មសិទ្ធិ ទ្រព្យសម្បត្តិ ចំណូល ចំណាយ បំណុល និងថវិការពីការិយាល័យ អង្គភាពជំនាញពាក់ពន្ធ័នានារបស់ក្រសួង ស្ថាប័នដែលមាននៅក្នុងថ្នាក់ក្រុង ស្រុក ខណ្ឌ តាមរចនាសម្ព័ន្ធថ្មី ដើម្បីបន្តគ្រប់គ្រង ចាត់ចែង និងប្រើប្រាស់ដោយធានាឲ្យបាននូវនិរន្តភាព តម្លាភាព និងប្រសិទ្ធភាពការងារ ជាពិសេសការផ្តល់សេវារដ្ឋបាល និងសេវាសាធារណៈនានាជូនប្រជាពលរដ្ឋ។
បើតាមរបាយរការណ៍របស់ក្រសួងមហាផ្ទៃជម្រាបជូនគណៈអធិបតីបានបញ្ចាក់ថា ថ្មីៗនេះ ក្រសួងបានពិនិត្យឃើញថា មន្ទីរ អង្គភាពជំនាញមួយចំនួននៅតែបន្តទំនាក់ទំនងការងារតាមរយះលិខិតរដ្ឋបាលផ្លូវការជាមួយគ្នាតាមប្រព័ន្ធចាស់ ដោយមិនបានឆ្លងកាត់រដ្ឋបាលក្រុង ស្រុក ខណ្ឌ សាមីនីមួយៗឡើ់យ។
ដើម្បីពង្រឹងការគ្រប់គ្រង និងការចាត់ចែងការងាររបស់រដ្ឋបាលក្រុង ស្រុក ខណ្ឌឲ្យកាន់តែមានប្រសិទ្ធភាពស្របតាមគោលការណ៍ច្បាប់ និងលិខិតបទដ្ឋានគិតិយុត្តជាធរមាន ក្រសួងមហាផ្ទៃ បានផ្តល់ការណែនាំបន្ថែមនូវគោលការសំខាន់ៗមួយចំនួនដូចជាៈ
រាល់លិខិតរបស់រដ្ឋបាលក្រុង ស្រុក ខណ្ឌ សម្រាប់ធ្វើការទំនាក់ទំនងការងារទៅស្ថាប័នខាងក្រៅ ទាំងថ្នាក់ជាតិ និងក្រោមជាតិ ព្រមទាំងស្ថាប័នមិនមែនរដ្ឋ ត្រូវពិនិត្យ សម្រេច និងចុះហេត្ថលេខាដោយថ្នាក់ដឹកនាំនៃរដ្ឋបាលក្រុង ស្រុក ខណ្ឌ។
ប្រធានការិយាល័យ ឬប្រធានអង្គភាពនានានៃរដ្ឋបាលក្រុង ស្រុក ខណ្ឌ ពុំមានសិទ្ធិក្នុងការសម្រេច និងចុះហេត្ថលេខាលើលិខិតរដ្ឋបាលណាមួយក្នុងនាមរដ្ឋបាលក្រុង ស្រុក ខណ្ឌ ដើម្បីធ្វើការទំនាក់ទំនងការងារទៅស្ថាប័នខាងក្រៅបានឡើយ។
ប្រធានការិយាល័យ ឬប្រធានអង្គភាពនានា អាចទំនាក់ទំនងការងារផ្ទៃក្នុងតាមរយះលិខិតរដ្ឋបាល។
ដើម្បីធានាដល់ការផ្តល់សេវាជូនប្រជាពលរដ្ឋបានឆាប់រហ័ស និងទាន់ពេលវេលា អភិបាលក្រុង ស្រុក ខណ្ឌត្រូវកំណត់ក្របខណ្ឌពេលវេលាជាក់លាក់ សម្រាប់ពិនិត្យ សម្រេច និងចុះហត្ថលេខាលើឯកសារទាំងនេះ ត្រូវអនុវត្តតាមក្របខណ្ឌពេលវេលាដែលបានកំណត់ឲ្យបានម៉ឺងម៉ាត់៕