សាខាកាកបាទក្រហមកម្ពុជាខេត្តកំពត នាំអំណោយមនុស្សធម៌ ផ្តល់ជូនគ្រួសារប្រជាពលរដ្ឋងាយរងគ្រោះ ខ្វះខាតជីវភាព នៅក្នុងស្រុកឈូក និងស្រុកជុំគិរី
ខេត្តកំពត៖ប្រជាពលរដ្ឋងាយរងគ្រោះខ្វះខាតក្នុងជីវភាព ចំនួន១០០គ្រួសារ មកពីស្រុកចំនួន២គឺក្នុងនោះមកពីស្រុកឈូកចំនួន៥០គ្រួសារ និងស្រុកជុំគីរីចំនួន៥០គ្រួសារ ទទួលអំណោយមនុស្សធម៌ជាគ្រឿងឧបភោគ បរិភោគ និងថវិកា ពីសាខាកាកបាទក្រហមកម្ពុជាខេត្តកំពត នៅព្រឹកថ្ងៃចន្ទ ០១រោជ ខែមិគសិរ ឆ្នាំជូត ទោស័ក ព.ស២៥៦៤ ត្រូវនឹងថ្ងៃទី១៦ ខែវិច្ឆិកា ឆ្នាំ២០២០ ដែលដឹកនាំដោយឯកឧត្តម ជាវ តាយ ប្រធានគណៈកម្មាធិការសាខា និងជាអភិបាលនៃគណៈអភិបាលខេត្តកំពត និងអមដំណើរដោយឯកឧត្តម លោកជំទាវ លោក លោកស្រី សមាជិកក្រុមប្រឹក្សាខេត្ត អភិបាលរងខេត្ត និងថ្នាក់ដឹកនាំមន្ទីរ អង្គភាពក្នុងខេត្ត សមាជិក សមាជិកាគណៈកម្មាធិការសាខា ក្រុមប្រតិបត្តិសាខា អនុសាខា អ្នកស្ម័គ្រចិត្ត យុវជនកាកបាទក្រហម និងអាជ្ញាធរមូលដ្ឋានផងដែរ។
មានប្រសាសន៍សំណេះសំណាល ឯកឧត្តម ជាវ តាយ ប្រធានគណៈកម្មាធិការសាខា និងជាអភិបាលខេត្ត បាននាំនូវប្រសាសន៍ ផ្តាំផ្ញើសួរសុខទុក្ខ ពីសំណាក់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលជានិច្ចកាលសម្តេចទាំងទ្វេរតែងតែគិតគូរខ្ពស់ពីសុខទុក្ខ និងបញ្ហាប្រឈមនានា របស់បងប្អូនប្រជាពលរដ្ឋ ជួបការលំបាក អ្នកមានជំងឺ ជនងាយរងគ្រោះ និងជនរងគ្រោះដោយគ្រោះមហន្តរាយផ្សេងៗ មិនប្រកាន់រើសអើងវណ្ណៈ ជាតិសាសន៍ ពណ៌សម្បុរ ឬនិន្នាការនយោបាយ ដោយសម្តេច គោរពស្រលាញ់ប្រជាពលរដ្ឋគ្រប់ៗគ្នាទាំងអស់ ហើយមិនទុកអោយប្រជាពលរដ្ឋណាម្នាក់ស្លាប់ដោយអត់ស្បៀងអាហារនិងគ្មានការដោះស្រាយឡើយ។
ឯកឧត្តម ជាវ តាយ បានបញ្ជាក់ថា បច្ចុប្បន្នកម្ពុជាយើងមានសម្ដេចតេជោ ហ៊ុន សែន ប្រមុខរាជរដ្ឋាភិបាលបានយកចិត្តទុកដាក់ខ្ពស់ និងបានដាក់ចេញនូវយន្តការដ៏មានប្រសិទ្ធិភាពក្នុងការ ការពារ និងទប់ស្កាត់ការឆ្លងជំងឺកូវិដ-១៩ គឺមិនមានការឆ្លងដល់សហគមន៍ឡើយ។ប៉ុន្តែទោះបីយ៉ាងនេះក្ដី ឯកឧត្តមអភិបាលខេត្ត ក៏បានក្រើនរំលឹកអំពាវនាវដល់បងប្អូនប្រជាពលរដ្ឋ បង្កើនការប្រុងប្រយ័ត្ន យកចិត្តទុកដាក់ឲ្យបានខ្ពស់បន្ថែមទៀតដោយ ចូលរួមអនុវត្តតាមវិធានការណែនាំរបស់ក្រសួងសុខាភិបាលឱ្យបានគ្រប់ៗគ្នា។
ជាមួយឱកាសនោះឯកឧត្តមអភិបាលខេត្ត ក៏បានផ្ដាំផ្ញើ អំពាវនាវផងដែរ ដល់អាជ្ញាធរមូលដ្ឋាន និង ប្រជាពលរដ្ឋ ត្រូវបង្កើនការ យកចិត្តទុកដាក់ចូលរួមជំរុញ អប់រំផ្សព្វផ្សាយឲ្យដល់គ្រួសារកូនចៅប្រជាពលរដ្ឋពិសេសយុវជនត្រូវចូលរួមអនុវត្តគោរពច្បាប់ឲ្យបានខ្ជាប់ខ្ជួន ជៀសឲ្យផុតពីការចរាចរ និងប្រើប្រាស់គ្រឿងញៀន នឹងត្រូវគោរពច្បាប់ចរាចរណ៍ផ្លូវគោកឲ្យបានល្អ ដើម្បីយើងរួមគ្នា ជាមួយរាជរដ្ឋាភិបាល ប្រយុទ្ធប្រឆាំង និងបង្ការទប់ស្កាត់ ចំពោះបញ្ហាទាំងនេះអោយបាន។
អំណោយដែលបានផ្ដល់ជូនគ្រួសារប្រជាពលរដ្ឋទាំង១០០គ្រួសារនាឱកាសនោះរួមមាន៖ ក្នុងមួយគ្រួសារទទួលបាន អង្ករ២៥គីឡូក្រាម មី១កេស ទឹកត្រី១យួរ ស្ករស១គីឡូនិងថវិកាចំនួន២ម៉ឺនរៀល ព្រមទាំងបានចែកជូនថវិកាដល់គ្រូពេទ្យ យុវជនកាកបាទក្រហម អ្នកស្ម័គ្រចិត្តកាកបាទក្រហម ប្រជាការពារភូមិ និងកងកម្លាំងប្រដាប់អាវុធម្នាក់ៗទទួលបាន១ម៉ឺនរៀល សរុបថវិកាអស់ចំនួន២,៤១០,០០០រៀលផងដែរ៕
