ឯកឧត្តម ហ៊ុន ម៉ាណែត អញ្ជើញជួបសំណេះសំណាល និងនាំយកពូជស្រូវចែកជូនប្រជាពលរដ្ឋ៦៦៥០គ្រួសារ ដែលរងផលប៉ះពាល់ ដោយទឹកជំនន់នៅខេត្តកំពង់ធំ
ខេត្តកំពង់ធំ៖ប្រជាពលរដ្ឋចំនួន៦៦៥០គ្រួសារ ដែលរងផលប៉ះពាល់ដោយសារទឹកជំនន់នៅខេត្តកំពង់ធំ ទទួលបានពូជស្រូវពីឯកឧត្តម ហ៊ុន ម៉ាណែត តំណាងសម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត នៅព្រឹកថ្ងៃទី១៣ ខែវិច្ឆិកា ឆ្នាំ២០២០ នៅពហុកីឡដ្ឋានខេត្ត ស្ថិតនៅក្នុងភូមិរូង ឃុំត្រពាំងប្ញស្សី ស្រុកកំពង់ស្វាយ ដើម្បីស្តារផលិតកម្មស្បៀងឡើងវិញ ក្រោយពេលទឹកស្រក។
នៅក្នុងឱកាសនោះឯកឧត្តម ហ៊ុន ម៉ាណែត បានផ្តាំផ្ញើការសួរសុខទុក្ខពីសំណាក់សម្តេចតេជោ និងសម្តេចកិត្តិព្រឹទ្ធបណ្ឌិត ដែលសម្តេចតែងតែយកចិត្តទុកដាក់បំផុត ហើយសម្រាប់គ្រោះទឹកជំនន់នៅឆ្នាំ២០២០នេះ សម្តេចបានជួយសង្គ្រោះអាយុជីវិតរបស់បងប្អូនប្រជាពលរដ្ឋ និងផ្តល់គ្រាប់ពូជដាំដុះបង្កបង្កើនផលឡើងវិញ ឲ្យទាន់ពេលវេលា ដើម្បីជួយទ្រង់ជីវភាពបង្កើនសុវត្ថិភាពស្បៀងអាហារឡើងវិញ។
ក្នុងនោះឯកឧត្តម សុខ លូ អភិបាលខេត្តកំពង់ធំ បានធ្វើរបាយការណ៍ថា រដូវវស្សាឆ្នាំនេះ ពីដើមរដូវមកមានភ្លៀងខ្លាំងល្អ ធ្វើឲ្យការបង្កបង្កើនផលអនុវត្តសរុបបានទូទាំងខេត្តចំនួន ២២៣៧៨៥ហិចតាស្មើនឹង១០៤.៩៣% នៃផែនការប៉ុន្តែមកដល់ខែតុលា មានភ្លៀងធ្លាក់ជាប់គ្នាបង្កជាទឹកជំនន់ទឹកភ្លៀងនៅស្ទឹងស្ទោង ស្ទឹងសែន និងស្ទឹងជីនិត ធ្វើឲ្យខេត្តកំពង់ធំរងនៅការប៉ះពាល់ដល់ដំណាំស្រូវ លើផ្ទៃដីសរុបចំនួន១៨.៨៥០ហិចតា និងខូចខាតទាំងស្រុងចំនួន១០.៣៣៥ហិចតាស្មើនឹង ១២៣៦៥គ្រួសារ និងដំណាំបន្លែរួមផ្សំលើផ្ទៃដី៣៤២ហិចតា។
ឯកឧត្តមបញ្ជាក់ថា គ្រួសារដាំដំណាំស្រូវដែលអាចស្ដារឡើងវិញ ដោយមានប្រភពទឹកស្រោចស្រពចំនួន ៧.៣៩៤ហិចតាស្មើនឹង ៦.៦៥០គ្រួសារ និងអាចធ្វើការស្ដារឡើងវិញបាន ក្នុងខែវិច្ឆិកានេះ និងគ្រួសារមានប្រភពទឹកអាចធ្វើការដាំដុះបន្លែបានចំនួន ៨.៣៨៤ហ្នឹង អាចដាំដុះចាប់ពីខែធ្នូ ២០២០បាន។
ឯកឧត្តមបញ្ជាក់ទៀតថា ខេត្តកំពង់ធំរងផលប៉ះពាល់លំនៅដ្ឋានប្រជាពលរដ្ឋ១១៦៩៥ខ្នង និងបណ្ដាលឱ្យស្លាប់មនុស្ស៨នាក់ និងរងការខូចខាតហេដ្ឋារចនាសម្ព័ន្ធជាច្រើនរួមមាន៖ផ្លូវកៅស៊ូ៩.៧០០ម ផ្លូវគ្រួសក្រហម ៥.៣៨៥០ម លូ៩កន្លែង និងស្ពាន៣កន្លែង៕