បុរសម្នាក់ ដេកស្លាប់ផ្កាប់មុខ នៅក្នុងទឹកស្រែ សង្ស័យខ្យល់គ
ខេត្តកំពង់ឆ្នាំង:សពបុរសម្នាក់ត្រូវបានប្រជាពលរដ្ឋប្រទះឃើញ ដេកស្លាប់ក្នុងទឹកស្រែបង្កការភ្ញាក់ផ្អើលកាលពីវេលាម៉ោង០៨យប់ ថ្ងៃទី១១ ខែវិច្ឆិកា ឆ្នាំ២០២០ នៅចំណុចត្រពាំងតាមិល ស្ថិតក្នុង ភូមិចំបក់ខ្ពស់ ឃុំស្វាយរំពារ ស្រុកកំពង់លែង ខេត្តកំពង់ឆ្នាំង។
បើតាមប្រភពព័ត៌មានបានឲ្យដឹងថា មុនកើតហេតុបុរសឈ្មោះ រិត សារីម ភេទប្រុស អាយុ៣៦ឆ្នាំ រស់នៅភូមិ-ឃុំខាងលើ បានដើរឆ្លុះកង្កែប ពេលដើរដល់ចំណុចកើតហតុខាងលើ ក៏បានប្រទះឃើញឈ្មោះ លឹម លឿន ភេទប្រុស អាយុ៤៣ឆ្នាំ រស់នៅភូមិ-ឃុំជាមួយគ្នា ដេកដួលផ្កាប់មុខនៅនឹងទឹកក្នុងស្រែរបស់ខ្លួន។ពេលឃើញដូចនេះ ឈ្មោះ រិត សារីម ក៏បានរាយការណ៍ មកសមត្ថកិច្ចប៉ុស្តិ៍នគរបាលរដ្ឋបាលស្វាយរំពារ។
ក្រោយពីទទួលបានព័ត៌មានខាងលើ លោកអធិការនគរបាលស្រុកកំពង់លែង បានចាត់តាំង កម្លាំងជំនាញ សហការជាមួយអាជ្ញាធរមូលដ្ឋាន ចុះដល់កន្លែងកើតហេតុ ពិនិត្យឃើញថា ជនរងគ្រោះឈ្មោះ លឹម លឿន មិនមានភិនភាគស្លាកស្នាម អ្វីគួរឲ្យកត់សម្គាល់ទេគឺពិតជាខ្យល់គស្លាប់ពិតប្រាកដមែន រួចប្រគល់សពទៅក្រុមគ្រួសារ ដើម្បីយកទៅធ្វើបុណ្យតាមប្រពៃណី៕