ទំនិញខុសច្បាប់ និងខូចគុណភាព ដែលឈ្មួញស្តុកទុក នៅក្នុងបុរីសៀងណាំ ត្រូវបានកម្លាំងចម្រុះខេត្តសៀមរាប ចុះឆែកឆេរ និងបង្ក្រាបបាន សរុបចំនួន៦៦,០០៤.៥គីឡូក្រាម
ខេត្តសៀមរាប៖ដើម្បីសុវត្ថិភាពចំណីអហារ ក៏ដូចជាសុខមាលភាពរបស់បងប្អូនប្រជាពលរដ្ឋ ឯកឧត្តម ទៀ សីហា អភិបាល នៃគណៈអភិបាលខេត្តបានបញ្ជាផ្ទាល់ដល់កម្លាំងចម្រុះ ដោយមានការសហការណ៍ជាមួយមន្ត្រីគយ និងរដ្ឋករខេត្តសៀមរាប មន្ត្រីសាខាកាំកុងត្រូលខេត្តសៀមរាប ក្រោមការដឹកនាំនិងសម្របសម្រួលនិតិវិធីដោយលោក កើត សុវណ្ណារ៉េត ព្រះរាជអាជ្ញាអមសាលាដំបូងខេត្តសៀមរាប កាលពីថ្ងៃទី១០ ខែមករា ឆ្នាំ២០២០ លោកឧត្តមសេនីយ៍ត្រី ម៉ក ធារ៉ា ស្នងការរងទទួលផែនការងារនគរបាលប្រឆាំងបទល្មើសសេដ្ឋកិច្ច ព្រមទាំងមានការចូលរួមពីអាជ្ញាធរមូលដ្ឋាន បានចុះធ្វើការត្រួតពិនិត្យ ឆែកឆេរ និងបង្ក្រាបទីតាំងស្តុកទុកចែកចាយទំនិញខុសច្បាប់ និងខូចគុណភាព នៅទីតាំងក្នុងបុរីសៀងណាំ ស្ថិតនៅអាគារផ្ទះ០២ល្វែង គ្មានលេខ នៅក្នុងភូមិសាស្ត្រ ភូមិខ្នារ សង្កាត់ជ្រាវ ក្រុងសៀមរាប ខេត្តសៀមរាប។
ក្នុងកិច្ចប្រតិបត្តិការនេះ សមត្ថកិច្ច បានឆែកឆេរជាក់ស្តែងរកឃើញនូវវត្ថុតាងបទល្មើសរួមមានៈ
-ប្រេងឆា កានមានទំងន់២៥គីឡូក្រាម ចំនួន១,១៤០កាន ស្មើរ២៧,៣៦០គីឡូក្រាម។
-ប្រេងឆា កានតូចចំណុះ១០គីឡូក្រាម ចំនួន១០០កេស ស្មើរ១,០០០គីឡូក្រាម។
-ប្រេងឆាដបធំ ចំនួន៩៧កេស ស្មើរ១,៦៩៧.៥គីឡូក្រាម។
- ប្រេងឆា ដបតូចចំណុះ៥លីត្រ ចំនួន៣កេសស្មើរ៥៧គីឡូក្រាម។
- ប័រលឿង ចំណុះ១៦គីឡូក្រាម ចំនួន៥០កេសស្មើរ៨០០គីឡូក្រាម។
- ប័រស ចំណុះ២៥គីឡូក្រាម ចំនួន១៧កេសស្មើរ៤២៥គីឡូក្រាម។
- មេនំប៉័ង ចំនួន២១កេសស្មើរ២១០គីឡូក្រាម។
- ម៉្សៅមីសញ្ញាកូនសោទឹកក្រូច ចំនួន១,១៥៣ការ៉ុងស្មើរ២៨,៨២៥គីឡូក្រាម។
- ម៉្សៅមីសញ្ញាត្រីវិស័យក្រហម ចំនួន១៣០ការ៉ុងស្មើរ៣,២៥០គីឡូក្រាម។
- ត្រីខកំប៉ុងរូបស្រីបីនាក់ ចំនួន២១,១១៩កេសស្មើរ២,៣៨០គីឡូក្រាម។
សរុបចំនួន៦៦,០០៤.៥ គីឡូក្រាមស្មើរ៦៦តោន និង ៤គីឡូកន្លះ៕