ក្រុមប្រឹក្សាស្រុកប្រាសាទបាគង បើកកិច្ចប្រជុំសាមញ្ញលើកទី៨ អាណត្តិទី៣ នៅសាលប្រជុំសាលាស្រុក
ខេត្តសៀមរាប៖នៅព្រឹកថ្ងៃទី១០ ខែមករា ឆ្នាំ២០២០លោក ទៀប ប៊ុនឈួយ ប្រធានក្រុមប្រឹក្សាស្រុកប្រាសាទបាគង បានដឹកនាំកិច្ចប្រជុំសាមញ្ញក្រុមប្រឹក្សាលើកទី៨ របស់ក្រុមប្រឹក្សាស្រុកអាណត្តិទី៣
នៅសាលប្រជុំសាលាស្រុកដោយមានការចូលរួមពីលោក សូរ ប្លាតុង អភិបាលស្រុក លោក លោកស្រីអភិបាលរងស្រុក លោកនាយក នាយករងរដ្ឋបាលស្រុក កងកម្លាំងប្រដាប់អាវុធទាំង៣ប្រភេទ ថ្នាក់ដឹកនាំការិយាល័យស្រុកនិងការិយាល័យជំនាញជុំវិញស្រុក លោក លោកស្រីមេឃុំ និងមណ្ឌលសុខភាពទាំង៨ ។
កិច្ចប្រជុំក្រុមប្រឹក្សាបានអនុម័ត និងពិភាក្សាទៅតាមរបៀបវារៈដែលបានគ្រោងទុក ជាបន្តបន្ទាប់ ។
ក្នុងឱកាសនោះលោកប្រធានក្រុមប្រឹក្សា បានសំណូមពរអោយយកចិត្តទុកដាក់ករណីទឹកស្រោចស្រពធ្វើស្រែប្រាំងរបស់ឃុំមានជ័យឆ្នាំខាងមុខ ករណីពង្រឹងរបៀបរបបធ្វើការងារ និងកិច្ចប្រជុំរបស់ក្រុមប្រឹក្សាឃុំ ការអនុវត្តនីរិវិធីផ្លាស់ប្តូរមេភូមិ អនុភូមិ រឺសមាជិកភូមិ និងការលែងសត្វពាហនៈ មានគោក្របីនៅវាលខាងក្រោមគ្មានសណ្តាប់ធ្នាប់ ។
លោក សូរ ប្លាតុង អភិបាលស្រុក បានថ្លែងអំណរគុណដល់សមាជិកក្រុមប្រឹក្សា គណៈអភិបាលស្រុក មន្រ្តីរដ្ឋបាលស្រុកទាំងអស់ ក៏ដូចជាគណៈបញ្ជាការឯកភាព ក្រុមប្រឹក្សាឃុំ មេភូមិ ដែលបានគាំទ្រ និងចូលរួមអនុវត្តគ្រប់សកម្មភាពទាំងអស់ធ្វើអោយស្រុកទទួលបានការគាំទ្រ ពីប្រជាពលរដ្ឋជាពិសេសប្រជាពលរដ្ឋ នៅស្រុកប្រាសាទបាគងទាំងមូល។
លោកអភិបាលក៏បានអរគុណដល់បងប្អូនប្រជាពលរដ្ឋស្រុកប្រាសាទបាគងទាំងអស់ដែលចូលរួមរក្សាបាននូវសន្តិភាព និងមិនចាញ់តាមការញ៉ុះញ៉ង់ចូលរួមធ្វើសកម្មភាពខុសច្បាប់ប៉ុនប៉ងធ្វើរដ្ឋប្រហារបស់មេដឹកនាំអតីតគណបក្សប្រឆាំង៕
