រដ្ឋបាលខេត្តកែប និងមន្ទីរសាធារណការ បើកកិច្ចប្រជុំផ្សព្វផ្សាយ សុវត្ថិភាពចរាចរណ៍ ដើម្បីចូលរួមកាត់បន្ថយអត្រាគ្រោះថ្នាក់ចរាចរណ៍
ខេត្តកែប៖ដើម្បីចូលរួមកាត់បន្ថយអត្រាគ្រោះថ្នាក់ចរាចរណ៍ និងផ្សព្វផ្សាយការការពារជម្ងឺកូវីដ១៩ នៅព្រឹកថ្ងៃទី៣០ ខែតុលា ឆ្នាំ២០២០ រដ្ឋបាលខេត្តកែប បានសហការណ៍ជាមួយមន្ទីរសាធារណការ និងដឹកជញ្ជូនខេត្ត បានរៀបចំយុទ្ធនាការអប់រំផ្សព្វផ្សាយអប់រំណែនាំ ដល់អ្នកបើកបរយានយន្ត ឲ្យចូលរួមគោរពច្បាប់ចរាចរណ៍ផ្លូវគោក បើកបរឲ្យមានការប្រុងប្រយ័ត្នខ្ពស់ មិនត្រូវបើកបរក្រោមឥទ្ធិពល នៃគ្រឿងស្រវឹងដាច់ខាត ត្រូវចេះគោរពសិទ្ធិអាទិភាព និងមានការអធ្យាស្រ័យខ្ពស់ រាល់ពេលបើកបរធ្វើយ៉ាងណា ចូលរួមទប់ស្កាត់ កាត់បន្ថយគ្រោះថ្នាក់ ចរាចរណ៍ផ្លូវគោក ដោយបានចែកជូននូវឯកសារពាក់ព័ន្ធ និងច្បាប់ស្តីពីសុវត្ថិភាព ចរាចរណ៍ផ្លូវគោក និងរៀបចំកម្មវិធីសួរ និងឆ្លើយ សំណួរពាក់ព័ន្ធនឹងច្បាប់ចរាចរណ៍ផ្លូវគោក ដើម្បីទទួលបានមួក សុវត្ថិភាពជារង្វាន់ផងដែរ ។
ក្នុងកិច្ចប្រជុំនេះដែរឯកឧត្តម សោម ពិសិដ្ឋអភិបាល នៃគណអភិបាលខេត្តកែប បានណែនាំអ្នកចូលបងប្អូនប្រជាពលរដ្ឋរួមគ្នាប្រុងប្រយ័ត្នឱ្យបានខ្ពស់បំផុត ដើម្បីចៀសវាងគ្រោះថ្នាក់ចរាចរណ៍ និងការពារកូវីដ ១៩ ដោយពាក់ម៉ាស លាងដៃដោយសាប៊ូ អាល់កុលនការអង្គុយជួបជុំអោយមានចន្លោះសុវត្ថិភាព ជាពិសេសគោរព និងអនុវត្តន៍តាមការណែនាំរបស់ក្រសួងសុខាភិបាលអោយបានត្រឹមត្រូវ។
ឯកឧត្តមអភិបាលខេត្តបន្ដថា យុវជនដែលបានចូលរួមឆ្លើយសំណួរ នៅក្នុងយុទ្ធនាការនេះ បានយល់ដឹងច្បាស់ អំពីចំនួនអ្នកស្លាប់ ដោយគ្រោះថ្នាក់ចរាចរណ៍ប្រចាំថ្ងៃនៅទូទាំងប្រទេស និងមូលហេតុការស្លាប់អ្នកទាំងនោះផងដែរ ហើយតាមរយៈចំណេះដឹងបន្ថែមពីយុទ្ធនាការនេះដែរ បងប្អូននឹងបន្ថែមការការពារ និងប្រុងប្រយ័ត្ន នៅពេលបើកបរ និងបន្តផ្សព្វផ្សាយដល់អ្នកដទៃទៀត ឲ្យបានយល់ដឹងផងដែរ ។
ក្នុងយុទ្ធនាការនេះបានប្រើប្រាស់សម្ភារ និងឯកសារមួយចំនួន ដូចជា ម៉ាស់៣០០ម៉ាស់ កូនសៀវភៅមូលដ្ឋានគ្រឹះសុវត្ថិភាពចរាចរណ៍ ចំនួន១០០ក្បាល កូនសៀវភៅផលប៉ះពាល់គ្រឿងស្រវឹង១០០ក្បាល, ខិតប័ណ្ណពាក់មួកសុវត្ថិភាពឲ្យបានត្រឹមត្រូវ ១០០សន្លឹក, ប័ណ្ណអនុក្រឹត្យផាកពិន័យអន្តរការ ថ្មី ១០០សន្លឹក,សៀវភៅច្បាប់ចរាចរ ចំនួន១០០ក្បាល និងមានសំណួរ ចម្លើយ យកមួកសុវត្ថិភាព ១៥រង្វាន់ ខិត្តប័ណ្ណ និងផូស្ទ័រជំងឺកូវីដ១៩ចំនួន ១០០ផ្ទាំង ផូស្ទ័រA4 ១០០សន្លឹក ផ្សព្វផ្សាយ និងចែកដល់ប្រជាពលរដ្ឋដែលអ្នកធ្វើដំណើរតាមដងផ្លូវ,ម៉ូតូកង់បី, pass app, អាជីវករលក់ដូរ និងភ្ញៀវទេសចរណ៍ជាតិ អន្តរជាតិ ដែលមកសម្រាកកំសាន្តតាមឆ្នេរសមុទ្រ ប្រជាពលរដ្ឋដែលទទួលបានការអប់រំផ្សព្វផ្សាយមានប្រមាណ ៤២៣នាក់, ស្រី២២៥នាក់ ហើយលទ្ឋផលទទួលបានល្អប្រសើរ និងជោគជ័យ៕
