ឃាត់ជនសង្ស័យម្នាក់ ជំនាញគាស់បន្ទប់លួចទ្រព្យសម្បត្តិ របស់ប្រជាពលរដ្ឋ
រាជធានីភ្នំពេញ៖ជនសង្ស័យម្នាក់ ត្រូវសមត្ថកិច្ចកម្លាំងប៉ុស្តិ៍នគរបាលចោមចៅទី៣ ឃាត់បានកាលពីវេលាម៉ោង២និង១០នាទីរំលងអាធ្រាត ឈានចូលថ្ងៃទី២៩ ខែតុលា ឆ្នាំ២០២០ បន្ទាប់ពីធ្វើសកម្មភាពគាស់បន្ទប់ជួលរបស់ប្រជាពលរដ្ឋម្នាក់ ស្ថិតនៅក្នុងភូមិព្រៃព្រីងខាងជើង២ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ។
ជនសង្ស័យមានឈ្មោះ ឌៀម ដារី ភេទប្រុស អាយុ៣០ឆ្នាំ មានទីលំនៅស្នាក់នៅភូមិព្រៃព្រីងខាងជើង២ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ។ចំណែកជនរងគ្រោះឈ្មោះ ជា ផល្លី ភេទប្រុស អាយុ៥៦ឆ្នាំ (ម្ចាស់ផ្ទះជួល) ស្នាក់នៅទីតាំងកន្លែងកើតហេតុ។
ប្រភពព័ត៌មានបានឲ្យដឹងថា មុនពេលកើតហេតុជនរងគ្រោះបានសម្រាកនៅក្នុងផ្ទះ ក្បែរបន្ទប់ជួលខាងលើរហូតមកដល់ម៉ោងកើតហេតុ ដោយឬសម្លេងឆ្កែព្រូស ដោយមានការសង្ស័យទើបក្រោកដើរទៅមើលស្រាប់តែឃើញជនសង្ស័យកំពុងធ្វើសកម្មភាព ក៏នាំគ្នាឃាត់ និងស្វាគមន៍ម្នាក់មួយដៃមួយជើង រួចទើបប្រគល់ឲ្យសមត្ថកិច្ចប៉ុស្តិ៍នគរបានចោមចៅទី៣តែម្តង។
បច្ចុប្បន្នជនសង្ស័យ ត្រូវសមត្ថកិច្ចកសាងសំណុំរឿង ដើម្បីចាត់ការតាមនិតិវិធី៕