អភិបាលខេត្តកំពង់ចាម ដឹកនាំក្រុមការងារ នាំយកអំណោយ ចែកជូនប្រជាពលរដ្ឋ១៦គ្រួសារ ដែលរងគ្រោះ ដោយខ្យល់កន្ត្រាក់ ប៉ើងដំបូល និងរលំផ្ទះ
ខេត្តកំពង់ចាម៖ប្រជាពលរដ្ឋចំនួន១៦គ្រួសារ រស់នៅភូមិមេសរ ឃុំព្រែកកុយ ស្រុកកងមាស ខេត្តកំពង់ចាម រងគ្រោះដោយសារខ្យល់កន្ត្រាក់ ប៉ើងដំបូល និងរលំផ្ទះ ទទួលអំណោយពីលោក អ៊ុន ចាន់ដា អភិបាល នៃគណៈអភិបាលខេត្តកំពង់ចាម នៅព្រឹកថ្ងៃទី៣០ ខែកញ្ញា ឆ្នាំ២០១៩។
លោក អ៊ុន ចាន់ដា បានមានប្រសាសន៍ថា បន្ទាប់ពីបានទទួលដំណឹង អំពីបងប្អូនប្រជាពលរដ្ឋដែលរងគ្រោះប៉ើងដំបូលផ្ទះ និងរលំផ្ទះសម្បែង ដោយសារខ្យល់កន្ត្រាក់ លោកបានកោះប្រជុំ និងពិភាក្សាបន្ទាន់ ដើម្បីនាំយកនូវអំណោយមកសង្គ្រោះបឋម ដល់បងប្អូនប្រជាពលរដ្ឋ ដែលកំពុងជួបការលំបាក។
លោក អ៊ុន ចាន់ដា ក៏បានសំដែងការចូលរួមសោកស្ដាយ ដល់បងប្អូនប្រជាពលរដ្ឋ ដែលបានខិតខំរកទទួលទាន និងបានសាងសង់លំនៅដ្ឋាន តែបែរជាទទួលរងគ្រោះដោយសារខ្យល់កន្ត្រាក់ បណ្ដាលឲ្យខូចខាតផ្ទះសម្បែង ដោយសារតែគ្រោះធម្មជាតិនេះ។
ជាមួយគ្នានោះលោកក៏បានផ្ដាំផ្ញើដល់បងប្អូនប្រជាពលរដ្ឋសូមប្រកបការងាររកស៊ី ដោយសុខសាន្ត ជៀសវាងការជឿទៅលើការញុះញង់ របស់បុគ្គលអគតិមួយចំនួន ដែលតែងតែបង្កភាពអសន្តិសុខ នៅក្នុងប្រទេសកម្ពុជារបស់យើង។
ទទន្ទឹមនោះលោកអភិបាលខេត្តកំពង់ចាមក៏បានផ្តាំផ្ញើការសួរសុខទុក្ខប្រជាពលរដ្ឋទាំងអស់ពីសំណាក់ប្រមុខរាជរដ្ឋាភិបាលសម្ដេចតេជោ ហ៊ុន សែន នាយករដ្ឋមន្ត្រី នៃកម្ពុជា និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលជានិច្ចជាកាលលោកទាំងពីរ តែងតែយកចិត្តទុកដាក់គិតគូរដល់សុខ និងទុក្ខរបស់បងប្អូនប្រជាពលរដ្ឋ។
អំណោយដែលត្រូវផ្ដល់ជូនប្រជាពលរដ្ឋដែលរលំផ្ទះទាំងស្រុង ក្នុង១គ្រួសារទទួលអង្ករ២០គីឡូក្រាម,ត្រីខកំប៉ុង១យួរ,មី១កេស និងថវិកាចំនួន២០ម៉ឺនរៀល។ចំណែកប្រជាពលរដ្ឋ២គ្រួសារទៀត ដែលរងគ្រោះប៉ើងដំបូលផ្ទះ១គ្រួសារបានទទួលថវិកាចំនួន១០ម៉ឺនរៀល,អង្ករ២០គីឡូក្រាម,មី ១កេស និងត្រីខ១យួរផងដែរ៕
