បុរសជនជាតិទំពួនម្នាក់ បើកម៉ូតូខ្វះការប្រុងប្រយ័ត្ន បុកក្មេងស្រីវ័យ៥ឆ្នាំម្នាក់ បណ្តាលឲ្យស្លាប់ ខណៈបញ្ជូនទៅដល់មន្ទីរពេទ្យបង្អែកខេត្ត
ខេត្តរតនគិរី៖ករណីគ្រោះថ្នាក់ចរាចរណ៍បង្កឡើង ដោយបុរសជនជាតិទំពួនម្នាក់ បើកម៉ូតូក្នុងល្បឿនយ៉ាងលឿន ទៅបុកក្មេងស្រីម្នាក់ចំពីមុខយ៉ាងពេញទំហឹង ខណៈដែលកំពុងដើរឆ្លងផ្លូវលំ បណ្តាលឲ្យក្មេងស្រីនោះ រងរបួសធ្ងន់ធ្ងរ ត្រូវបានគេដឹកបញ្ជូនទៅមន្ទីរពេទ្យបង្អែកខេត្ត ដោយអាការ:ធ្ងន់ធ្ងរពេក ក៏បានស្លាប់បាត់បង់ជីវិតតែម្តង។
ហេតុការណ៍គ្រោះថ្នាក់ចរាចរណ៍នេះបានកើតឡើងកាលពីវេលាម៉ោងជាង៦ល្ងាចថ្ងៃទី២៩ ខែកញ្ញាឆ្នាំ២០១៩ តាមផ្លូវលំក្រាលក្រួសក្រហមមួយខ្សែ ត្រង់ចំណុចមុខចម្ការយាយឃីម ស្ថិតនៅក្នុងភូមិពីង ឃុំសាមគ្គី ស្រុកអូរជុំ ខេត្តរតនគិរី។
បើតាមសមត្ថកិច្ចស្រុកអូរជុំបានឲ្យដឹងថា អ្នកបើកបរម៉ូតូបង្កមានឈ្មោះ ថូ ភេទប្រុស អាយុ១៨ឆ្នាំ ជាជនជាតិទំពួន មុខរបរកសិករ មានទីលំនៅភូមិទុយ ឃុំទីងចាក់ ស្រុកបរកែវ ខេត្តរតនគិរី ក្រោយពីកើតហេតុជនបង្កបានលើកម៉ូតូ បើករត់គេចខ្លួនបាត់ស្រមោល។ចំណែកក្មេងស្រីរងគ្រោះឈ្មោះ ណាង ស្រីនាង អាយុ០៥ឆ្នាំ ជនជាតិខ្មែរ មានទីលំនៅភូមិ ឃុំកើតហេតុខាងលើ ម៉ូតូបានបុកចំដើមទ្រូងហើយនិងបោកក្បាលចេញឈាមតាមត្រចៀក បណ្តាលឲ្យស្លាប់ បន្ទាប់ពីដឹកបញ្ជូនទៅដល់មន្ទីរពេទ្យខេត្ត។
ប្រភពដដែរបន្តថា នាព្រឹកថ្ងៃទី៣០ ខែកញ្ញា ឆ្នាំ២០១៩នេះ អ្នកបើកបរម៉ូតូបង្កបានចូលខ្លួនមកសម្របសម្រួលនៅអធិការដ្ឋាននគរបាលស្រុកអូរជុំ ដើម្បីសំណងសងប្រាក់មួយចំនួនទៅឲ្យជនរងគ្រោះយកមកធ្វើបុណ្យតាមប្រពៃណី។
សូមបញ្ជាក់ដែរថា៖ក្រុមគ្រួសារក្មេងស្រីរងគ្រោះមានជីវភាពក្រីក្រពេកគ្មានលុយធ្វើបុណ្យឲ្យកូនដែលបានស្លាប់ទៅនោះ ហើយឪពុកម្តាយបានយកកូនមកវត្តភ្នំស្វាយដើម្បីធ្វើបុណ្យតាមប្រពៃណី៕