ឯកឧត្តម ជាវ តាយ បានទទួលជួបជាមួយ ក្រុមហ៊ុនមេឌាអ៊ែកសិន ដើម្បីរៀបចំពិព័រណ៍ និងព្រឹត្តិការណ៍ផ្សេងៗ ក្នុងឱកាសបុណ្យសមុទ្រ លើកទី៨ ជុំទី២ ឆ្នាំ២០១៩
ខេត្តកំពត៖នៅព្រឹក ថ្ងៃព្រហស្បតិ៍ ១៣ រោច ខែភទ្របទ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី២៦ ខែកញ្ញា ឆ្នាំ២០១៩ ឯកឧត្តម ជាវ តាយ អភិបាល នៃគណៈអភិបាលខេត្តកំពត រួមជាមួយឯកឧត្តមអភិបាលរងខេត្ត ប្រធានមន្ទីរ-អង្គភាព ពាក់ព័ន្ធជុំវិញខេត្ត អភិបាលរងក្រុង ទទួលជួបជាមួយ ក្រុមហ៊ុនមេឌាអ៊ែកសិន ដើម្បីរៀបចំពិព័រណ៍ និងព្រឹត្តិការណ៍ផ្សេងៗ ក្នុងឱកាសបុណ្យសមុទ្រ លើកទី៨ ជុំទី២ ឆ្នាំ២០១៩ នៅខេត្តកំពត ដែលនឹងប្រព្រឹត្តិទៅនៅថ្ងៃទី២១ ខែធ្នូ ឆ្នាំ២០១៩ខាងមុខនេះ។
ក្នុងឱកាសនោះដែរ ក្រុមហ៊ុនបានបង្ហាញអំពីបទពិសោធន៍ ដែលក្រុមហ៊ុនធ្លាប់ធ្វើបុណ្យទន្លេនៅខេត្តកំពង់ឆ្នាំងកន្លងមក។
ឯកឧត្តមអភិបាលខេត្ត បានមានប្រសាសន៍ថា៖
-សូមឯកភាព លើគម្រោងរៀបចំពិព័រណ៍របស់ក្រុមហ៊ុន និងសំណូមពរឲ្យ មានការចូលរួមខិតខំប្រឹងប្រែង និងសាមគ្គីគ្នាដើម្បីទទួលបានជោគជ័យក្នុងការរៀបចំព្រឹត្តិការណ៍នេះ។
-សូមឲ្យក្រុមហ៊ុនសហការជាមួយ មន្ទីអប់រំ យុវជន និងកីឡា និងមន្ទីវប្បធម៌វិចិត្រ និងសិល្បះ ក្នុងរៀបចំឲ្យមានសោភណ្ឌភាព និងរចនាបទ បង្ហាញអំពីវប្បធម៌ខ្មែរឲ្យបានច្រើន៕
