ថ្នាក់ដឹកនាំស្រុកប្រាសាទបាគង ចុះពិនិត្យស្ថានភាពទឹកជំនន់ ទូទៅក្នុងភូមិសាស្ត្រ និងជួបសំណេះសំណាល សាកសួរសុខទុក្ខ ប្រជាពលរដ្ឋ ក្នុងមូលដ្ឋាន
ខេត្តសៀមរាប៖កាលពីថ្ងៃទី២៥ ខែកញ្ញា ឆ្នាំ២០១៩ លោក សូរ ប្លាតុង អភិបាលស្រុកប្រាសាទបាគង បានដឹកនាំក្រុមការងារ ចុះពិនិត្យស្ថានភាពទឹកជំនន់ ទូទៅក្នុងភូមិសាស្ត្រស្រុកប្រាសាទបាគង និងជួបសំណេះសំណាល សាកសួរសុខទុក្ខ បងប្អូនប្រជាពលរដ្ឋ និងអាជីវករ ក្នុងមូលដ្ឋានផងដែរ បន្ទាប់ពីចូលរួមក្នុងវេទិកាសាធារណៈ។
បើគិតត្រឹមរសៀលថ្ងៃទី២៥ ខែកញ្ញា ឆ្នាំ២០១៩នេះ ស្ថានភាពទឹកជំនន់ទូទៅ ក្នុងស្រុកប្រាសាទបាគង មានការថយចុះ ប្រមាណជិត៨០ភាគរយហើយ មនុស្ស សត្វ ដំណាំរួមផ្សំ របស់បងប្អូនប្រជាពលរដ្ឋ ពុំមានការរងផលប៉ះពាល់ឡើយ។ចំណែកផ្លូវធ្វើដំណើរ ទៅកាន់តំបន់រមណីយដ្ឋានកំពង់ភ្លុក ក៏អាចធ្វើចរាចរណ៍បានឡើងវិញជាធម្មតាដែរ។
ប៉ុន្តែទោះបីយ៉ាងណា ក្នុងនាមអភិបាលស្រុក និងជាប្រធានគណៈបញ្ជាការឯកភាពស្រុក នៅតែបន្ត តាមដានស្ថានភាពទឹកជំនន់ នេះបន្តទៀត ហើយកងកម្លាំង គ្រប់អង្គភាពចំណុះអោយរដ្ឋបាលស្រុកប្រាសាទបាគង ក៏នៅតែបន្ត ត្រៀមវិធានការជួយសង្គ្រោះ បងប្អូនប្រជាពលរដ្ឋដដែល៕
