គម្រោងការកសាងផ្លូវ និងស្ពានឆ្លងកាត់ដៃព្រែកកំពត ក្នុងសង្កាត់ត្រើយកោះ និងសង្កាត់អណ្ដូងខ្មែរ នឹងត្រូវចាប់ផ្ដើមកសាងថ្មីឡើងវិញ ចុងឆ្នាំ២០១៩ និងដើមឆ្នាំ២០២០នេះហើយ
ខេត្តកំពត៖បន្ទាប់ពីបានមើលឃើញនូវការលំបាកទាំងការធ្វើចរាចរដឹកជញ្ជូនទំនិញក៏ដូចជាការធ្វើដំណើរឆ្លងកាត់រួម នឹងការឆ្លើយតបនូវសំណូមពរជាចាំបាច់របស់ប្រជាពលរដ្ឋ។អាជ្ញាធរខេត្តកំពតបានជំរុញការអនុវត្តនូវគម្រោងការកសាងផ្លូវនិងស្ពានថ្មី ដែលឆ្លងកាត់ដៃព្រែកកំពត ស្ថិតក្នុងសង្កាត់ត្រើយកោះក្រុងកំពត ដែលអាចនឹងត្រូវចាប់ដំណើរការកសាងឡើង នៅចុងឆ្នាំ២០១៩និងដើមឆ្នាំ ២០២០ខាងមុខនេះហើយ។
នេះបើផ្អែកតាមការឲ្យដឹងនៅក្នុងកិច្ចប្រជុំកាលពីរសៀលថ្ងៃទី១៧ខែកញ្ញា ឆ្នាំ២០១៩ ស្ដីពីកិច្ចពិភាក្សាផ្ដល់យោបល់ដោយចូលរួមពីសំណាក់ មន្ទីរ អង្គភាពជំនាញពាក់ព័ន្ធមួយចំនួនក្នុងខេត្ត និងអាជ្ញាធរក្រុងសង្កាត់ទាំង៥នៃក្រុងកំពត ក្រោមកិច្ចដឹកនាំអង្គប្រជុំរបស់ លោក ជាវ តាយអភិបាលនៃគណៈអភិបាលខេត្ត។
ក្នុងកិច្ចប្រជុំនេះបានផ្ដោតជាសំខាន់លើការចូលរួមពិភាក្សាផ្ដល់មតិយោបល់ពីមន្ទីរអង្គភាពជំនាញពាក់ព័ន្ធ អាជ្ញាធរក្រុងនិងសង្កាត់ ស្ដីអំពីផលប៉ះពាល់នៃការអនុវត្តគម្រោងកសាងស្ពាននិងផ្លូវ ពិសេសបញ្ហាលំនៅដ្ឋានប្រជាពលរដ្ឋដែលរស់នៅជាប់សងខាងផ្លូវនៃក្បាលស្ពានដែល ត្រូវសាងសង់នាពេលនេះ។
គម្រោងស្ពាននេះដែរគឺធ្វើឡើងពីបេតុងដែលមានទទឹង១០ម៉ែត្រ បណ្ដោយ៧៥ម៉ែត្រគឺជាគម្រោងប្រើប្រាស់ថវិកា របស់រាជរដ្ឋាភិបាលផ្ដល់តាមរយៈក្រសួងសាធារណការ និងដឹកជញ្ជូនដែល នឹងត្រូវចាប់ផ្ដើមកសាងនៅដើមឆ្នាំ២០២០ខាងមុខនេះ។
ដោយឡែក នៅក្នុងកិច្ចប្រជុំនេះដែរ ក៏បានពិភាក្សានូវបញ្ហាសំខាន់ៗមួយចំនួនរកដំណោះស្រាយពីផលប៉ះពាល់ ដើម្បីចាប់ដំណើរការកសាងផ្លូវបេតុងថ្មីមួយខ្សែឡើងវិញបន្ថែមទៀតនៅចុងឆ្នាំ២០១៩នេះ ដែលផ្លូវនេះមានទទឹង១០ម៉ែត្រ ប្រវែង៧៦០ម៉ែត្រ ជាគម្រោងថវិការបស់រដ្ឋបាលខេត្តកំពត ស្ថិតតាមបណ្ដោយស្ពានត្រើយកោះនេះដែលនឹងត្រូវកសាងថ្មីឡើងវិញផងដែរ។
មានប្រសាសន៍ក្នុងកិច្ចប្រជុំនេះ លោក ជាវ តាយអភិបាលខេត្ត បានណែនាំជំរុញដល់មន្ទីរ អង្គភាពពាក់ព័ន្ធ និងអាជ្ញាធរក្រុង សង្កាត់ សូមឲ្យរួមសហការគ្នាបានល្អ ដោយសិក្សាឲ្យបានច្បាស់លាស់ពីផលប៉ះពាល់ ដើម្បីធ្វើរបាយការណ៍ជាក់លាក់បញ្ជូនទៅថ្នាក់ជាតិឲ្យបានឆាប់រហ័ស នឹងដើម្បីបានដំណើរការកសាងស្ពានបេតុងនេះដំណើរការបានលឿនដើម្បីសម្រួលដល់ការធ្វើចរាចរជូនដល់ប្រជាពលរដ្ឋក្នុងតំបន់នេះ ក៏ដូចជាការដឹកជញ្ជូននូវទំនិញផ្សេងៗឆ្លងកាត់ផងដែរ។
ជាមួយឱកាសនោះដែរដើម្បីធ្វើឲ្យសោភ័ណភាព អានាម័យបរិស្ថានក្នុងក្រុងកំពតបានកាន់តែល្អប្រសើរ សម្រាប់ត្រៀមលក្ខណៈអបអរពិធីបុណ្យសមុទ្រចុងឆ្នាំ២០១៩នេះ លោក ជាវ តាយអភិបាលខេត្ត ក៏បានក្រើនរំឭកដល់អាជ្ញាធរក្រុង សង្កាត់ទាំងអស់ ត្រូវបន្តយកចិត្តទុកដាក់ឲ្យបានសស្រាក់សស្រាំបន្ថែមទៀត ដោយត្រូវឈរលើស្មារតីទទួលខុសត្រូវខ្ពស់ក្នុងមូលដ្ឋានសង្កាត់នីមួយៗរបស់ខ្លួនផងដែរ។
បន្ទាប់ពីបញ្ចប់កិច្ចប្រជុំនៅក្នុងឱកាសនោះ លោក ជាវ តាយ អភិបាលខេត្ត រួមជាមួយសមាជិកក៏បានអញ្ជើញចុះទៅពិនិត្យស្វែងយល់ អំពីស្ថានភាពផ្លូវ និងស្ពានដែលមានការខូចខាត ទ្រុឌទ្រោមដើម្បីធ្វើយ៉ាងណានៅក្នុងដំណាក់កាលនៃដំណើរការកសាងនេះធ្វើឲ្យប្រជាពលរដ្ឋបានធ្វើដំណើរឆ្លងកាត់កាន់តែមានភាពងាយស្រួលជាងមុន។
គួរបញ្ជាក់ថា៖ផ្លូវនិងស្ពានចាស់ដែលនឹងត្រូវដំណើរការជួសជុលកសាងថ្មីឡើងវិញនេះ គឺជាស្ពានប្រភេទដែកបាឡេ និងផ្លូវបេតុងដោយបានឆ្លងកាត់ក្នុងសង្កាត់អណ្ដូងខ្មែរ និងសង្កាត់ត្រើកោះក្រុងកំពត។ ហើយផ្លូវនិងស្ពាននេះមានសារៈសំខាន់ក្នុងការរួមចំណែកដល់ការធ្វើចរាចរនូវរថយន្តធុនធំដឹកទំនិញឆ្លងកាត់ក្នុងតំបន់នេះ។ប៉ុន្តែបច្ចុប្បន្នផ្លូវនិងស្ពាននេះមានស្ថានភាពដល់ដំណាក់កាលខូចខាតទ្រុឌទ្រោមយ៉ាងខ្លាំងដែលមិនអាចឲ្យរថយន្តដឹកទំនិញប្រភេទធុនធំឆ្លងកាត់បានឡើយ ទើបអាជ្ញាធរខេត្តកំពត ជំរុញឲ្យមានការជួសជុល និងកសាងឡើងវិញតែម្តង៕
