ឯកឧត្តម ហ៊ុន ម៉ានី ដឹកនាំក្រុមការងា ចូលរួមគោរពវិញ្ញាណក្ខន្ធ ឯកឧត្តម នាយឧត្ដមសេនីយ៍ព្រឹទ្ធាចារ្យ ប៊ូ ថង នៅគេហដ្ឋានសព ក្នុងខេត្តរតនគីរី
ខេត្តរតនគីរី៖នាព្រឹកថ្ងៃទី១៦ ខែកញ្ញា ឆ្នាំ២០១៩ ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា អមដំណើរដោយឯកឧត្តម ទៀ សីហា អភិបាល នៃគណៈអភិបាលខេត្តសៀមរាប បានអញ្ជើញចូលរួមគោរពវិញ្ញាណក្ខន្ធ ឯកឧត្តម នាយឧត្ដមសេនីយ៍ព្រឹទ្ធាចារ្យ ប៊ូ ថង នៅគេហដ្ឋានសពក្នុងខេត្តរតនគីរី។
សូមបញ្ជាក់ដែរថា៖នាយឧត្តមសេនីយ៍ ព្រឹទ្ធាចារ្យ ប៊ូ ថង ទទួលមរណភាព កាលពីថ្ងៃព្រហស្បតិ៍ ១៤កើត ត្រូវនឹងថ្ងៃទី១២ ខែកញ្ញា ឆ្នាំ២០១៩ វេលាម៉ោង១:២០នាទីទៀបភ្លឺ ក្នុងជន្មាយុ៨២ឆ្នាំ ដោយរោគាពាធ។សព ត្រូវបានតម្កល់ទុកធ្វើបុណ្យទក្ខិណានុប្បទានតាមប្រពៃណីសាសនាចាប់ពីថ្ងៃទី១២ ដល់ថ្ងៃទី២២ ខែកញ្ញា ឆ្នាំ២០១៩ ស្ថិតនៅក្នុងគេហដ្ឋានលេខ១៤៧ ភូមិទេសអន្លុង សង្កាត់បឹងកន្សែង ក្រុងបានលុង ខេត្តរតនគិរី។
គួរបញ្ជាក់ដែរថា៖ឯកឧត្តម នាយឧត្ដមសេនីយ៍ព្រឹទ្ធាចារ្យ ប៊ូ ថង បានលះបង់យុវភាពរបស់ឯកឧត្តមតស៊ូលះបង់កម្លាំងកាយចិត្តក្នុងបុព្វហេតុជាតិមាតុភូមិ ដើម្បីស្វែងរកសុខសន្ដិភាព និងស្ថិរភាពជូនប្រជាជាតិទាំងមូល។លោកក៏ជាសហស្ថាបនិកនៃស្មារតី ២ធ្នូ (ដែលជាថ្ងៃកំណើតរបស់ ស.ស.យ.ក.) ដោយយកផលប្រយោជន៍ផ្ទាល់ខ្លួនដាក់ដោយឡែក ហើយរួបរួមគ្នាសាមគ្គីជាធ្លុងមួយ ដើម្បីផលប្រយោជន៍រួមសម្រាប់ជាតិមាតុភូមិ។
ការទទួលមរណភាពរបស់ឯកឧត្តម នាយឧត្ដមសេនីយ៍ព្រឹទ្ធាចារ្យ ប៊ូ ថង គឺជាការបាត់បង់នូវ ស្វាមី បិតា ជីតា ជីតាទួត ជាទីគោរពស្រឡាញ់ ប្រកបដោយព្រហ្មវិហារធម៌មួយរូបចំពោះក្រុមគ្រួសារ ដែលបានចិញ្ចឹមបីបាច់ថែរក្សា និងអប់រំទូន្មានកូនចៅ ប្រកបដោយគន្លងធម៌ ហើយក៏ជាការបាត់បង់នូវឥស្សរជនមួយរូប ដែលធ្លាប់បានចូលរួមចំណែកយ៉ាងសកម្មក្នុងបុព្វហេតុកសាង ស្តារ អភិវឌ្ឍសង្គម និងមាតុភូមិកម្ពុជាផងដែរ៕
