ប្រតិភូគណ:កម្មការទី១ នៃព្រឹទ្ធសភា ឈ្វេងយល់ពីការអភិវឌ្ឍន៍ និងបញ្ហាប្រឈមរបស់ខេត្តព្រះសីហនុ
ខេត្តព្រះសីហនុ៖ដោយមើលឃើញនូវបញ្ហាមួយចំនួនដែលកំពុងប្រឈមដូចជា៖ ផ្លូវ ទឹក ភ្លើង និងធនធានមនុស្ស ដោយសារខេត្តព្រះសីហនុមានការអភិវឌ្ឍន៍លូតលាស់លើវិស័យសំណង់ ម្យ៉ាងទៀតពាក់ព័ន្ធលូ អូ ប្រឡាយ ចរាចរណ៍ នាពេលបច្ចុប្បន្ន ទឹកស្អាត មិនទាន់ឆ្លើយ តបតាមតម្រូវការរបស់ប្រជាពលរដ្ឋ១០០ភាគរយ រដ្ឋបាលខេត្តកំពុងធ្វើការដោះស្រាយបញ្ហាប្រឈមទាំងនេះផងនោះ។
នាព្រឹកថ្ងៃចន្ទ ៣រោជ ខែភទ្របទ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី១៦ ខែកញ្ញា ឆ្នាំ២០១៩ ឯកឧត្តម ខៀវ មុត ប្រធានស្តីទីគណ:កម្មការទី១ នៃព្រឹទ្ធសភា ដឹកនាំគណៈប្រតិភូឈ្វេងយល់ពីការអភិវឌ្ឍ និងបញ្ហាប្រឈមរបស់ខេត្តព្រះសីហនុ នាពេលបច្ចុប្បន្ន និងពិភាក្សាការងារជាមួយរដ្ឋបាលខេត្តព្រះសីហនុ នៅ សាលាខេត្តព្រះសីហនុ។
ក្នុងនោះលោក ម៉ាង ស៊ីណេត អភិបាលស្តីទី នៃគណ:អភិបាលខេត្តព្រះសីហនុ បានជំរាបជូនពីសក្តានុពលខេត្តព្រះសីហនុ ក្នុងការអភិវឌ្ឍសេដ្ឋកិច្ច រួមមាន ឧស្សាហកម្ម កសិកម្ម ពាណិជ្ជកម្ម សំណង់ ដែលជាវិស័យគោលដៅធ្វើឱ្យខេត្តមានការអភិវឌ្ឍន៍ខឿនសេដ្ឋកិច្ច រួមមានកំពង់ផែទឹកជ្រៅ តំបន់សេដ្ឋកិច្ចពិសេស ព្រលានយន្តហោះអន្តរជាតិ និងឆ្នេរសមុទ្រដ៏ស្រស់ស្អាត ជាប្រភពសក្តានុពល និងធនធានធម្មជាតិ បាននឹងកំពុងជំរុញការអភិវឌ្ឍន៍សេដ្ឋកិច្ចខេត្ត ឱ្យមានភាពរីកចម្រើនជាលំដាប់។រាជរដ្ឋាភិបាលកម្ពុជា បានចាត់ទុក និងប្រកាសប្រែក្លាយខេត្តព្រះសីហនុ ជាតំបន់សេដ្ឋកិច្ចពិសេសគំរូពហុបំណង ស្របតាមគោលនយោបាយអភិវឌ្ឍវិស័យឧស្សាហកម្មកម្ពុជាឆ្នាំ២០១៥-២០២៥។
លោកបញ្ជាក់ថា៖ខេត្តមានតំបន់សេដ្ឋកិច្ចចំនួន៩ ក្នុងនោះ៥ កំពុងដំណើរការ មានរោងចក្រធំ តូច ២១១កន្លែង សិប្បកម្មចំនួន ១.០៣៧កន្លែង និងអាជីវកម្មផ្សេងៗជាច្រើនទៀត ស្រូបយកកម្លាំងពលកម្មចំនួន ៩១.០៨៩នាក់ ស្រី ៤១.២៥៩ នាក់ ក្នុងនោះពលកម្មបរទេស២៨.៨០៩នាក់។បច្ចុប្បន្នវិនិយោគចិន ឋិតនៅលំដាប់លេខ១ មករកស៊ី និងវិនិយោគលើវិស័យឧស្សាហកម្ម ពាណិជ្ជកម្ម ដឹកជញ្ជូន សំណង់ និងទេសចរណ៍។
ឯកឧត្តម ខៀវ មុត ប្រធានស្តីទីគណៈកម្មការទី១ នៃព្រឹទ្ធសភា មានប្រសាសន៍ថា ប្រតិភូមកបំពេញទស្សនកិច្ចខេត្តព្រះសីហនុ ដើម្បីឈ្វេងយល់ពីជីវភាពរស់នៅរបស់ប្រជាពលរដ្ឋ ពិរុទ្ធជននៅតាមពន្ធនាគារ ប្រព័ន្ធតុលាការ និងកង្វល់ប្រជាពលរដ្ឋនៅតាមឃុំ សង្កាត់ បញ្ហាប្រឈម និងការអភិវឌ្ឍនៅតាមមូលដ្ឋាន។ តួនាទី របស់ព្រឹទ្ធសភា គឺទី១ ការអនុវត្តច្បាប់ ទី២ ការត្រួតពិនិត្យច្បាប់ និងទី៣ តំណាងឱ្យក្រុមប្រឹក្សាឃុំ សង្កាត់ និងប្រជាពលរដ្ឋ ព្រមទាំងប្រមូលពត៌មាន ដើម្បីពាំនាំកង្វល់ និងបញ្ហាប្រឈមនានា ដើម្បីរាយការណ៍ជូនប្រធានព្រឹទ្ធសភា។
ក្នុងឱកាសនោះ ឯកឧត្តម ក៏បានកោតសរសើរថ្នាក់ដឹកនាំខេត្ត ក្រុង ឃុំ សង្កាត់ ដែលបានអនុវត្តការងារល្អ នឹងបន្តពង្រឹងការដោះស្រាយបញ្ហានានា ក្រុមប្រឹក្សាឃុំ សង្កាត់ ដែលជាភ្នែកច្រមុះ និងជាសេនាធិការឱ្យរដ្ឋបាលក្រុង ខេត្ត និងរាជរដ្ឋាភិបាល បន្តពង្រឹងអភិបាលកិច្ចល្អនៅតាម ឃុំ សង្កាត់ ស្របតាមគោលនយោបាយភូមិ ឃុំ មានសុវត្ថិភាព៕