សាខាកាកបាទក្រហមខេត្តត្បូងឃ្មុំ នាំយកអំណោយ ចែកជូនពលរដ្ឋចំនួន៥០០គ្រួសារ ដែលរងគ្រោះដោយសារទឹកជំនន់
ខេត្តត្បូងឃ្មុំ៖នៅថ្ងៃទី១៤ ខែកញ្ញា ឆ្នាំ២០១៩នេះ លោក ជាម ច័ន្ទសោភ័ណ អភិបាលខេត្តត្បូងឃ្មុំ និងជាប្រធានគណៈកម្មាធិការ សាខាកាកបាទក្រហមខេត្ត និងលោកស្រី បានដឹកនាំក្រុមការងារ មន្ទីរអង្គភាព អាជ្ញាធរស្រុក សាខាកាកបាទក្រហមខេត្ត បានបន្តចុះពិនិត្យមើលស្ថានភាពការរស់នៅរបស់ប្រជាពលរដ្ឋ និងនាំយកអំណោយ ទៅចែកជូនពលរដ្ឋ ដែលរងគ្រោះដោយទឹកជំនន់នៅបរិវេណវត្តថ្មពេជ្រ។
ក្នុងឱកាសនោះ លោក ជាម ច័ន្ទសោភ័ណ បានសំណេះសំណាលផ្តល់ភាពកក់ក្តៅ និងនាំនូវការផ្តាំផ្ញើសួរសុខទុក្ខពីសំណាក់សម្តេចតេជោ ហ៊ុន សែន ប្រមុខរាជរដ្ឋាភិបាលកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ក៏ដូចជាឧបនាយករដ្ឋមន្ត្រី ជា សុផារ៉ា ប្រធានក្រុមការងារថ្នាក់ជាតិចុះមូលដ្ឋានខេត្តត្បូងឃ្មុំ ជូនចំពោះបងប្អូនដោយក្តីនឹករលឹក និងយកចិត្តទុកដាក់បំផុតពីសុខទុក្ខបងប្អូន។
អំណោយដែលត្រូវចែកជូនប្រជាពលរដ្ឋចំនួន៥០០គ្រួសារ មកពីឃុំជីរោទ៍ទី១ និងឃុំបឹងព្រួល ស្រុកត្បូងឃ្មុំ មួយគ្រួសារទទួលបានគ្រឿងឧបភោគបរិភោគ និងថវិការមួយចំនួនផងដែរ។
ទន្ទឹមនោះលោកអភិបាលខេត្ត និងលោកស្រី បានចែកជូននំចំណីដល់ក្មេងៗ ព្រមទាំងចែកថវិកាផ្ទាល់ខ្លួន ដល់ប្រជាការពារភូមិ កងកម្លាំង និងអ្នកដែលចូលរួម លើការងារមនុស្សធម៌នេះទាំងអស់ ដើម្បីជាការលើកទឹកចិត្ត ផ្តល់ភាពកក់ក្តៅទាំងពលរដ្ឋរងគ្រោះ និងបងប្អូនជាអ្នកជួយសង្គ្រោះយ៉ាងសស្រាក់សស្រាំផងដែរ៕
