ចាប់ឃាត់ខ្លួនជនសង្ស័យម្នាក់ ពាក់ព័ន្ធករណីបាញ់សត្វខ្ទីង និងប្រើប្រាស់អាវុធជាតិផ្ទុះខុសច្បាប់
ខេត្តមណ្ឌលគិរី៖បុរសម្នាក់ត្រូវបាន មន្រ្តីឧទ្យានុរក្សដែនជម្រកសត្វព្រៃភ្នំព្រេច សហការជាមួយប៉ុស្តិ៍នគរបាលរដ្ឋបាលឃុំមេម៉ង់ ចាប់ឃាត់ខ្លួននៅព្រឹកថ្ងៃទី១៤ ខែកញ្ញា ឆ្នាំ២០១៩ នៅចំណុចផ្ទះជនសង្ស័យ ពាក់ព័ន្ធនឹងករណីបរបាញ់សត្វខ្ទីង និងប្រើប្រាស់អាវុធជាតិផ្ទុះខុសច្បាប់ ស្ថិតក្នុងភូមិពូងោល ឃុំមេម៉ង់ ស្រុកកែវសីមា ខេត្តមណ្ឌលគិរី។
បើតាមមន្ត្រីជំនាញ បានឲ្យដឹងថា ជនសង្ស័យមានឈ្មោះ ចប់ ហាញ ភេទប្រុស ជនជាតិព្នង មានទីលំនៅបច្ចុប្បន្ន ភូមិពូងោល ឃុំមេម៉ង់ ស្រុកកែវសីមា ខេត្តមណ្ឌលគិរី ជាឪពុកក្មេករបស់ជនដៃដល់ ដែលបានរត់គេចខ្លួនបាត់។
វត្ថុតាងដែលដកហូតបានរួមមាន៖
១.អាវុធអាកាស្វ័យបត់ចំនួន០១ដើម និងគ្រាប់ចំនួន០៩គ្រាប់
២.សាច់សត្វខ្ទីងស្រស់ចំនួន៣០គីឡូក្រាម
៣. សាច់ខ្ទីងចម្អិនឆ្អិនចំនួន ០១ឆ្នាំង
៤. អាវុធកែច្នៃ (កាំភ្លើងខ្យល់) ចំនួន០២ដើម។
បច្ចុប្បន្ន មន្រ្តីជំនាញកំពុងសាកសួរជនសង្ស័យ ដើម្បីកសាងសំណុំរឿងចាត់ការបន្តតាមនីតិវិធី និងកំពុងស្វែងរកជនដៃដល់ និងបក្ខពួកយកមកផ្តន្ទាទោសតាមច្បាប់៕