ជនបរទេសម្នាក់ ត្រូវបានគេប្រទះឃើញដេកស្លាប់ នៅក្នុងបន្ទប់ជួលជាន់ទី២ ក្រោយកាស៊ីណូហ្គ្រែន សង្ស័យខ្យល់គរ
ខេត្តបន្ទាយមានជ័យ៖កាលពីថ្ងៃសុក្រ ១៥កើត ខែភទ្របទ ឆ្នាំកុរ ឯកស័ក ពុទ្ធសករាជ ២៥៦៣ ត្រូវនឹងថ្ងៃទី១៣ ខែកញ្ញា ឆ្នាំ២០១៩ វេលាម៉ោង៨យប់ កម្លាំងសមត្ថកិច្ចក្រុងប៉ោយប៉ែតបានទទួលព័ត៌មានពីម្ចាស់ផ្ទះជួលឈ្មោះ រស់ លឹមហុង ភេទប្រុស អាយុ៥៧ឆ្នាំ ជនជាតិខ្មែរ រស់នៅភូមិប៉ោយប៉ែត សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ មកថា មានជនបរទេសម្នាក់ បានដេកស្លាប់នៅក្នុងបន្ទប់ជួលជាន់ទី២ បន្ទប់លេខ៦៨ ចំណុចក្រោយកាស៊ីណូហ្គ្រែន ស្ថិតក្នុងភូមិប៉ោយប៉ែត សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។
ភ្លាមនោះកម្លាំងសមត្ថកិច្ច និងក្រុមគ្រួពេទ្យជំនាញបានចុះធ្វើការត្រួតពិនិត្យឃើញថា សាកសពមានឈ្មោះយ៉ាង. កៃ (YANG KAI ) ភេទប្រុស កើតនៅថ្ងៃទី១០ ខែវិច្ឆិកា ឆ្នាំ១៩៦៣(៥៦ឆ្នាំ)ជនជាតិកាណាដា កាន់លិខិតឆ្លងដែនលេខBA 461150 មានសុពលភាពដល់ថ្ងៃទី២០ ខែធ្នូ ឆ្នាំ២០១៧ មានសភាពធម្មតា ដេកស្លាប់នៅលើគ្រែ(ដេកផ្ងា) អត់មានអាវស្លៀកខោលីអូ សាកសពមានសភាពស្អុយរលួយ ក្នុងសភាពពីហើមមកស្រក នៅតួខ្លួនសាកសពពុំមានស្លាកស្នាមអ្វីពាក់ព័ន្ធនិងអំពើឃាតកម្មឡើយ។
ក្រោយពីពិនិត្យ និងធ្វើកោសលវិច្ច័យពីសំណាក់លោកវេជ្ជបណ្ឌិត ឡុង សុធីរះ សាកសពអាចស្លាប់ដោយសាខ្យល់គ រួចត្រូវបាននាយកដ្ឋាននគរបាលបច្ចេកទេសនិងវិទ្យាសាស្រ្តឲ្យបញ្ជូនយកទៅតំកល់ទុកនៅវត្តស្ទឹងមានជ័យ ដើម្បីរក្សាទុកប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី៕