បុរសម្នាក់បានស្លាប់ ខណៈបញ្ជូនទៅមន្ទីរពេទ្យ បន្ទាប់ពីយកពងគីង្គក់ទៅចំហុយហូប
ខេត្តកណ្ដាល៖បុរសម្នាក់ក្អួតបីដង ដាច់ខ្យល់ ខណៈបញ្ជូនដល់មន្ទីរពេទ្យ បន្ទាប់ពីយកពងគីង្គក់ទៅចំហុយហូប។ករណីដែលបង្កឱ្យមានការភ្ញាក់ផ្អើលនេះបានកើតឡើងកាលពីវេលាម៉ោងជាង១រំលងអាធ្រាត្រឈានចូលថ្ងៃទី១៣ ខែកញ្ញា ឆ្នាំ២០១៩ ស្ថិតក្នុងភូមិកោះកែវក្រោម ឃុំកោះកែវ ស្រុកល្វាឯម ខេត្តកណ្តាល។
បើតាមសមត្ថកិច្ចបានឲ្យដឹងថា ជនរងគ្រោះមានឈ្មោះ គង់ សុភ័ក្ត ភេទប្រុស អាយុ៤៥ឆ្នាំ មុខរបរ កសិករ មានទីលំនៅភូមិ ឃុំកើតហេតុខាងលើ។
បើតាមប្រភពព័ត៌មានបានឲ្យដឹងថា មុនពេលកើតហេតុ ជនរងគ្រោះបានចេញពីផ្ទះទៅរកចាប់គីង្គក់ ដើម្បីយកមកធ្វើម្ហូបលុះពេលចាប់បានគីង្គក់ហើយ ជនរងគ្រោះក៏បានយកមកធ្វើ ដោយយកពងគីង្គក់ទុកនៅក្នុងចាន រួចហើយយកទៅចំហុយក្រោយមកពីហូបបានមួយសន្ទុះ ជនរងគ្រោះក៏មានអក្ការៈក្អួតបីទៅបួនដង ភ្លាមនោះស្រ្តីជាប្រពន្ធបាននាំជនរងគ្រោះទៅមណ្ឌលសុខភាពឃុំសំបួរ ដើម្បីសង្រ្គោះ តែជាអកុសល ជនរងគ្រោះបានដាច់ខ្យល់ស្លាប់ទៅហើយ។
បន្ទាប់ពីសមត្ថកិច្ចនគរបាលប៉ុស្តិ៍រដ្ឋបាលទទួលបានព័ត៌មានករណីខាងលើ ភ្លាមនោះក៏រាយការណ៍បន្តទៅនគរបាជំនាញស្រុក រួចធ្វើការពិនិត្យ ដោយសន្និដ្ឋានថា ករណីនេះបណ្ដាលមកពីជនរងគ្រោះហូបពងគីង្គក់ ទើបបណ្ដាលឲ្យពុលស្លាប់បែបនេះ។
ក្រោយពីធ្វើកោសល្យវិច្ច័យរួច សាកសពជនរងគ្រោះ ត្រូវបានសមត្ថកិច្ចជំនាញ ប្រគល់ទៅឲ្យក្រុមគ្រួសារ យកទៅចាត់ចែងធ្វើបុណ្យតាមប្រពៃណី៕
