នារីលោតទឹកធ្វើអត្តឃាតសម្លាប់ខ្លួន នៅលើស្ពានគីសូណា ត្រូវបានគេប្រទះឃើញអណ្តែតទឹក ត្រង់ចំណុចកំពង់ទឹក ក្រោយវត្តឥន្ទលីបូណ៌
ខេត្តកណ្ដាល៖ករណីស្ត្រីម្នាក់លោតទឹកធ្វើអត្តឃាតសម្លាប់ខ្លួននៅចំណុចលើស្ពានគីសូណា ខេត្តកំពង់ចាម កាលពីនៅវេលាម៉ោង ១៥និង៤០នាទី ថ្ងៃទី៨ ខែកញ្ញា ឆ្នាំ២០១៩ កន្លងទៅ ដោយមិនដឹងពីមូលហេតុនោះ ត្រូវបានប្រជាពលរដ្ឋប្រទះឃើញអណ្តែតទឹក ត្រង់ចំណុចកំពង់ទឹក ក្រោយវត្តឥន្ទលីបូណ៌ ស្ថិតក្នុងភូមិពុកឫស្សីកណ្តាល ឃុំពុកឫស្សី ស្រុកខ្សាច់កណ្តាល ខេត្តកណ្តាល ថ្ងៃទី១២ ខែកញ្ញា ឆ្នាំ២០១៩។
បើតាមប្រភពព័ត៌មានបានឲ្យដឹងថា៖នារីរងគ្រោះមានឈ្មោះ អ៊ុន ស្រីនិច ភេទស្រី អាយុ៣២ឆ្នាំ មានទីលំនៅភូមិព្រៃស្រឡៅ ឃុំត្រពាំងព្រះ ស្រុកព្រៃឈរ ខេត្តកំពង់ចាម។
បន្ទាប់ពីមានការភ្ញាក់ផ្អើលសមត្ថកិច្ចជំនាញនគរបាលប៉ុស្តិ៍រដ្ឋបាលពុកឫស្សី ក្នុងនោះមានការចូលរួមពីក្រុមប្រឹក្សាឃុំ មេភូមិ គ្រូពេទ្យ បានចុះមកត្រួតពិនិត្យនិងធ្វើកោសល្យវិច័យ ជាលទ្ធផលឃើញថា ជនរងគ្រោះពិតជាស្លាប់ដោយសារលង់ទឹកប្រាកដមែន ដោយពុំមានស្លាកស្នាមអ្វីគួរឲ្យកត់សម្គាល់នោះទេ។
ភិនភាគជនរងគ្រោះពាក់អាវយឺតដៃវែង ពណ៌ក្រហម ពាក់អាវទ្រនាប់ពណ៌ទឹកដោះគោ ស្លៀកខោយឺត ចង្កេះកៅស៊ូ មានឆ្នូតពណ៌សពីរ (ខោកីឡា) មានកម្ពស់១.៥២ម៉ែត្រ មានពាក់ខ្សែអំបោះ ពណ៌ក្រហម មានកថានៅកដៃខាងឆ្វេង មានពាក់ខ្សែចង្កេះពណ៌សកថា នៅក្នុងហោប៉ៅខាងស្តាំ មានលុយ២៥០០រៀល និងអត្តសញ្ញាណបណ្ណ សញ្ជាតិខ្មែរ មួយសន្លឹក ដោយសពមានសភាពសភាពស្អុយរលួយ។
ក្រោយពីត្រួតពិនិត្យរួច សមត្ថកិច្ចជំនាញប្រគល់សព ជូនក្រុមគ្រួសារ ដើម្បីយកទៅធ្វើបុណ្យតាមប្រពៃណី៕