ថ្នាក់ដឹកនាំខេត្តស្ទឹងត្រែង ចុះសួរសុខទុក្ខ នឹងចែកអំណោយជូនពលរដ្ឋ រងគ្រោះដោយទឹកជំនន់ ចំនួន២៣៧គ្រួសារ នៅឃុំសន្តិភាព ថ្មកែវ និងសេកុង ស្រុកសៀមប៉ាង
ខេត្តស្ទឹងត្រែង៖ខណៈដែលប្រជាពលរដ្ឋកំពុងស្នាក់នៅទីទួលសុវត្ថិភាព ដោយសារគ្រោះទឹកជំនន់ នៅថ្ងៃព្រហស្បតិ៍ ១២កើត ខែភទ្របទ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី១២ ខែកញ្ញា ឆ្នាំ២០១៩ ឯកឧត្តម ម៉ុម សារឿន អភិបាល នៃគណៈអភិបាលខេត្ត និងជាប្រធានគណៈកម្មាធិការគ្រប់គ្រោះហន្តរាយខេត្តស្ទឹងត្រែង និងលោកជំទាវ ព្រមទាំអាជ្ញាធរស្រុក មន្ទីរអង្គភាពពាក់ព័ន្ធ និងអាជ្ញាធរភូមិ ឃុំ បាននាំយកអំណោយជូនប្រជាពលរដ្ឋរងគ្រោះដោយទឹកជំនន់ចំនួន២៣៧គ្រួសារ ក្នុងគោលដៅទីទួលសុវត្ថិភាពចំនួន៣។
គោលដៅទី១ នៅភូមិទាក់ទាម ឃុំសន្តិភាព,គោលដៅទី២ ភូមិឡាយកាយ ឃុំថ្មកែវ និងគោលដៅទី៣ ភូមិកែងញ៉ៃ ឃុំសេកុង ស្រុកសៀមប៉ាង ខេត្តស្ទឹងត្រែង ក្រោយទឹកជំនន់ជន់លិចផ្លូវ និងផ្ទះសម្បែងរបស់ពួគាត់។
ក្នុងឱកាសជួបសំណេះសំណាលជាមួយប្រជាពលរដ្ឋរងគ្រោះ ឯកឧត្តម ម៉ុម សារឿន បានពាំនាំនូវប្រសាសន៍របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងសម្តេចក្រឡាហោម ស ខេង ឧបនាយរដ្ឋ រដ្ឋមន្រ្តីក្រសួងមហាផ្ទៃ ដែលបានផ្ដាំផ្ញើសួរសុខទុក្ខ ក្តីនឹករលឹក ការស្រឡាញ់ យ៉ាងជ្រាលជ្រៅ និងគិតគូរជានិច្ច ចំពោះសុខទុក្ខបងប្អូនប្រជាពលរដ្ឋ និងបានចូលរួមសោកស្តាយជាខ្លាំងជាមួយបងប្អូនប្រជាពលរដ្ឋរងគ្រោះទឹកជំនន់ នាពេលនេះ។
អំណោយដ៏ថ្លៃថ្លារបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលបានផ្តល់ជូនគ្រួសារនីមួយៗរួមមាន៖ថ្នាំក្លរ៉ាមីន មុងចំនួន១,អង្ក តង់ និងគ្រឿងឧបភោគបរិភោគ៕